ރ. މަޑުއްވަރީގައި ބިދޭސީ އަންހެނަކަށް އަނިޔާކޮށް، ފޭރެން އުޅުނު މައްސަލައަކާ ގުޅިގެން ނޭޕާލުގެ ފިރިހެނަކު ހައްޔަރުކޮށްފިއެވެ.
މީސްމީޑިއާގައި އާންމުވެފައިވާ ވީޑިއޯއަކުން ފެންނަ ގޮތުގައި އެ ފިރިހެން މީހާ ވަނީ ބިދޭސީ އަންހެން މީހާ މަގުމައްޗަށް ވައްޓާލައި، އޭނާގެ އަނގަ ބަންދުކޮށް ބިރު ދައްކައިފައެވެ. އެ ވަގުތު އެ ސަރަހައްދަށް ދިޔަ ދިވެއްސަކު ވަނީ އޭނާ ހުއްޓުވައިފައެވެ. ވީޑިއޯއިން ފެންނަ ގޮތުގައި އެ އަންހެން މީހާގެ އަތުގައި ހުރި ފައިސާތައް ވެސް މަގުމަތީގައި ވެއްޓިފައި އޮއްވާ ފެނެއެވެ.
މައުލޫމާތު ލިބިފައިވާ ގޮތުގައި މި އަންހެން މީހާއަކީ އެ ރަށު ރެސްޓޯރެންޓެއްގައި މަސައްކަތް ކުރަމުން އަންނަ އަންހެނެކެވެ.
މި މައްސަލައާ ގުޅިގެން ފުލުހުން ބުނެފައިވަނީ، ކޯޓު އަމުރެއްގެ ދަށުން 24 އަހަރުގެ ނޭޕާލުގެ ފިރިހެނަކު ހައްޔަރުކޮށްފައި ކަމަށެވެ. އަދި އޭނާ ހައްޔަރުކޮށްފައިވަނީ މިދިޔަ ހޮނިހިރު ދުވަހު ކަމަށްވެސް ފުލުހުން ވަނީ ބުނެފައެވެ. ފުލުހުން ބުނީ، އޭނާގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން، ކޯޓުން ފަސް ދުވަހުގެ މުއްދަތަށް އޭނާ ބަންދުކުރަން އަމުރުކޮށްފައިވާ ކަމަށެވެ.
ފުލުހުން ބުނީ އެ މައްސަލަ އިތުރަށް ތަހުގީގުކުރަމުން އަންނަ ކަމަށެވެ.
