އީރާނުގެ ރެވޮލިއުޝަނަރީ ގާޑްސް (އައިއާރްޖީސީ) އާ ގުޅުންހުރި ފާރސް ނިއުސް އޭޖެންސީން ރިޕޯޓުކޮށްފައިވާ ގޮތުގައި، ހޮރްމޫޒް ކަނޑުއޮޅިން ”ހުއްދަނެތް މަގަކުން“ ދަތުރުކުރި އުޅަނދަކަށް އަމާޒުކޮށް އީރާނުން ވަނީ ކަނޑުމަތިން ފޮނުވާލާ ކްރޫޒް މިސައިލް ޙަމަލާއެއް ދީފައެވެ. މި ޙަމަލާ މިނިވަން ފަރާތަކުން އަދި ކަށަވަރުކޮށްދީފައި ނުވި ނަމަވެސް، މިއީ އެމެރިކާއާއި އީރާނާ ދެމެދު އޮތް ނުތަނަވަސްކަން އިތުރަށް ގޯސްވެގެންދިޔަ ކަމެކެވެ.
އައިއާރްޖީސީގެ މީޑިއާއިން ބުނެފައިވަނީ، ހޮރްމޫޒް ކަނޑުއޮޅީގައި އީރާނުން ކަނޑައަޅާފައިވާ ގަވާއިދުތަކާ ޚިލާފަށް ދަތުރުކުރި ބޯޓަކަށް ކްރޫޒް މިސައިލުން ޙަމަލާދީފައިވާ ކަމަށެވެ. ބައިނަލްއަޤްވާމީ ކަނޑުދަތުރުފަތުރުގެ ސަލާމަތާބެހޭ އިދާރާތަކުން އަދި މިފަދަ ޙަމަލާއެއް ކަށަވަރުކޮށްދީފައެއް ނުވެއެވެ. ނަމަވެސް މި ޚަބަރާއެކު ދުނިޔޭގެ ތެލުގެ ބާޒާރަށް ވަނީ ބޮޑު ސިހުމެއް ލިބިފައެވެ.
މިފަދަ ޙަމަލާއެއްގެ ވާހަކަ އީރާނުން ފަތުރާފައިމިވަނީ، އެމެރިކާއިން ދަތިކުރުމުގެ ފިޔަވަޅުތައް އުވާލައިފިނަމަ ހޮރްމޫޒް ކަނޑުއޮޅި އަލުން ހުޅުވާލަން އީރާނުން ހުށަހެޅި ހުށަހެޅުމަށް އެމެރިކާގެ ރައީސް ޑޮނަލްޑް ޓްރަމްޕް ދެކޮޅުހެއްދެވި ދަނޑިވަޅެއްގައެވެ. އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވީ، ކަނޑުއޮޅި ހުޅުވާލާނީ އީރާނުގެ ޝަރުޠުތައް ފުރިހަމަކުރުމުން ކަމަށެވެ.
ދާދިފަހުން އެމެރިކާއިން އީރާނުގެ އޭވިއޭޝަން ދާއިރާއަށް ދަތިކުރުމުން، އީރާނުން ވަނީ މެދުއިރުމަތީގެ ވައިގެ ދަތުރުފަތުރަށް ހުރަސްއަޅާނެކަމުގެ އިންޒާރުވެސް ދީފައެވެ. މިއާއެކު މުޅި ސަރަޙައްދުގެ ކަނޑާއި ވައިގެ ދަތުރުފަތުރުގެ ނިޒާމަށް ވަނީ ބޮޑު ނުރައްކަލަކާ ކުރިމަތިވެފައެވެ.














