މާދަމާއިން ފެށިގެން މި މަހުގެ 30 ވަނަ ދުވަހުގެ ނިޔަލަށް ހުޅުމާލޭ ސިންތެޓިކް ޓްރެކްގައި ކުރިއަށްދާ މިއަހަރުގެ ”ހޮޓެލް އޭޝިއާ އެގްޒިބިޝަން 2026“ ގައި ރާއްޖޭގެ އެންމެ ބޮޑު އެއް ވިޔަފާރި ކުންފުނި ކަމަށްވާ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ބައިވެރިވާން ނިންމައިފިއެވެ. ރާއްޖޭގެ ފަތުރުވެރިކަމާއި ހޮސްޕިޓަލިޓީ ދާއިރާއަށް ހާއްސަކޮށްގެން ބާއްވާ މި އެގްޒިބިޝަންގައި އެސްޓީއޯއިން ބައިވެރިވަނީ ހާއްސަ ހަރަކާތްތަކަކާއި އުފެއްދުންތަކާއެކުގައެވެ.
މިފަހަރުގެ އެގްޒިބިޝަންގައި އެސްޓީއޯގެ ސްޓޯލް ހާއްސަކުރެވިފައިވަނީ އެ ކުންފުނީގެ ޖެނެރަލް ޓްރޭޑިންގ އެސްޓީއޯ ޕީޕަލްސް ޗޮއިސް އަދި އެސްޓީއޯ އެނާޖީ އަށެވެ. އެސްޓީއޯއިން އެތެރެކޮށް ވިއްކާ ތަފާތު އެކި ޕްރޮޑަކްޓްތަކާ ބެހޭ މައުލޫމާތު މި ސްޓޯލް މެދުވެރިކޮށް ޒިޔާރަތްކުރާ ފަރާތްތަކަށް ފޯރުކޮށްދިނުމަށް ވަނީ ހަމަޖެހިފައެވެ.
އެސްޓީއޯ ޕީޕަލްސް ޗޮއިސް ސުޕާމާކެޓުން ލިބެން ހުންނަ ބައެއް އުފެއްދުންތައް ބޭނުންކޮށްގެން ތައްޔާރުކުރާ ލުއިކާނާ ވަގުތުން ތައްޔާރުކޮށްދޭ ސްޓޭޝަނެއް އެސްޓީއޯގެ ސްޓޯލްގައި ހުންނާނެއެވެ. މީގެ އިތުރުން، އެގްޒިބިޝަން ކުރިއަށްދާ ތިން ދުވަހުވެސް ކޮފީސްޓޭޓްގެ ވަކި ބުއިންތަކެއް ހިލޭ ލިބޭނެ އިންތިޒާމުވެސް ވަނީ ހަމަޖައްސާފައެވެ.
މި އެގްޒިބިޝަންގެ ތެރެއިން އެސްޓީއޯއިން އާ ބްރޭންޑެއް ތައާރަފްކުރުމަށް ވަނީ ނިންމާފައެވެ. މި އާ ބްރޭންޑް ތައާރަފްކުރުން އޮންނާނީ އެގްޒިބިޝަންގެ ދެވަނަ ދުވަހުއެވެ. އަދި މި އާ ޕްރޮޑަކްޓް ބޭނުންކޮށްގެން ތައްޔާރުކުރާ އައިސްކްރީމާއި ފޮނިކާތަކެތީގެ ރަހަ ބެލުމުގެ ފުރުސަތު އެސްޓީއޯ ސްޓޯލަށް ޒިޔާރަތްކުރާ ފަރާތްތަކަށް ލިބިގެންދާނެއެވެ.
އެސްޓީއޯ އެނާޖީގެ ފަރާތުން މިއަހަރުގެ އެގްޒިބިޝަންގައި ހާއްސަ އިސްކަމެއް ދެނީ ރިޒޯޓު ކަސްޓަމަރުންނަށެވެ. އެގޮތުން ތެޔޮ އުފުލައިދިނުމުގައި އެސްޓީއޯއިން ފޯރުކޮށްދޭ ހިދުމަތްތަކުގެ މައުލޫމާތު ދިނުމާއި، މި މާކެޓުގައި ކަސްޓަމަރުންގެ ޑިމާންޑްތައް ހުރި ނެތްގޮތް ބެލުމުގެ ހަރަކާތްތަކެއް އެސްޓީއޯ އެނާޖީން ކުރިއަށްގެންދާނެއެވެ.
އެސްޓީއޯއިން ވަނީ ސްޓޯލަށް ޒިޔާރަތްކުރާ ފަރާތްތަކަށް ހާއްސަކޮށްގެން ޕްރޮމޯޝަނަލް ހަރަކާތްތަކެއްވެސް ރާވާފައެވެ. އެގޮތުން ”ރެޖިސްޓަރ އެންޑް ވިން“ ގެ ނަމުގައި ކުރިއަށްދާ ހަރަކާތުގައި ސްޓޯލްގައި ރަޖިސްޓްރީކުރާ ފަރާތްތަކުގެ މެދުގައި ގުރުއަތުލައި، ކޮންމެ ދުވަހަކުވެސް ނަސީބުވެރި އެއްފަރާތަކަށް އިނާމު ދިނުމަށް ވަނީ ހަމަޖެހިފައެވެ. އަދި ”ފޮލޯ އެންޑް ވިން“ ހަރަކާތުގެ ދަށުން އެސްޓީއޯ ޕީޕަލްސް ޗޮއިސް ޕޭޖް ފޮލޯކުރާ ފަރާތްތަކުގެ ތެރެއިން ނަސީބުވެރި ފަރާތަކަށް ޑިޝްވޮޝަރެއް ލިބުމުގެ ފުރުސަތު ފަހިވެގެންދާނެއެވެ.
