ފަލަސްތީނުގެ އަހުންނާއި އުހުތުންގެ ހައްގުތައް ފުރިހަމައަށް ހިމާޔަތްކޮށް، އަމިއްލަ ވަޒަނުގައި ދެމިތިބުމުގެ ހައްގާއި، އަޅުކަންކުރުމުގެ ފުރިހަމަ މިނިވަންކަން ކަށަވަރުކޮށްދިނުމަށްޓަކައި، ބައިނަލްއަގުވާމީ ފެންވަރުގައި އެކަތިގަނޑެއްގެ ގޮތުގައި މަސައްކަތްކުރުމަށް ދިވެހިރާއްޖޭގެ ފޮރިންގ މިނިސްޓަރު އިރުތިޝާމް އާދަމް ގޮވާލައްވައިފިއެވެ.
ވަޒީރު މިކަމަށް ގޮވާލެއްވީ، ގުދުސްގެ މައްސަލައިގައި އަރަބި އަދި އިސްލާމީ ގައުމުތަކުގެ ފޮރިންގ މިނިސްޓަރުންގެ މެދުގައި ބޭއްވުނު ހާއްސަ ބައްދަލުވުމުގައި ވާހަކަފުޅުދައްކަވަމުންނެވެ.
ފޮރިންގ މިނިސްޓަރުގެ ވާހަކަފުޅުގައި، ގުދުސްއަކީ ހަމައެކަނި ސިޔާސީ އެޖެންޑާއެއްގައި އޮތް ތަނެއް ނޫންކަމަށާއި، އެއީ މުޅި އިސްލާމީ އުންމަތުގެ ހިތްތަކާ ގުޅިފައިވާ މުގައްދަސް ބިމެއްކަން ފާހަގަކުރެއްވިއެވެ. އަދި ސަރަހައްދީ ހަމަޖެހުމާއި ދެމެހެއްޓެނިވި ސުލްހަ ގާއިމުކުރުމަށްޓަކައި ގުދުސްގެ ރައްކާތެރިކަން ކަށަވަރުކުރުމަކީ ކޮންމެހެން މުހިންމު ކަމެއް ކަމަށް ވިދާޅުވިއެވެ. މީގެއިތުރުން، ޒަޔަނިސްޓު އިސްރާއީލުން އަލްއަގްސާ މިސްކިތުގެ ހުރުމަތް ކަނޑައި، ފަލަސްތީނުގެ އާއިލާތައް ގެދޮރުން ނެރެ، ގާނޫނާ ހިލާފަށް ޔަހޫދީން ވަޒަންވެރިކުރުވަމުންދާ ލާއިންސާނީ ޖަރީމާތަކަށް އެއްވެސް ޖާގައެއް ދެވިގެން ނުވާނެކަމަށް ވަޒީރު ބާރުއަޅުއްވައި ވިދާޅުވިއެވެ.
ފަލަސްތީނުގެ މައްސަލައިގައި ދިވެހިރާއްޖޭގެ ސިޔާސަތު ސާފުކަން ހާމަކުރައްވަމުން މިނިސްޓަރު ވިދާޅުވީ، ބައިނަލްއަގުވާމީ ގާނޫނުތަކާއި މުޢާހަދާތަކާ ހިލާފަށް ހިންގާ އެއްވެސް އުދުވާނަކުން ގުދުސްގެ މާތްކަމާއި މުގައްދަސްކަމަށް އެއްވެސް އުނިކަމެއް ނުގެނެވޭނެ ކަމަށެވެ. އަދި މިހާރުން މިހާރަށް އެ ބިމުގައި ހިންގަމުންދާ ލާއިންސާނީ ޖަރީމާތައް ހުއްޓުވައި، ބައިތުލްމަގްދިސް ހިމާޔަތްކުރުމަށް މުޅި ދުނިޔެ ގުޅިގެން ފިޔަވަޅު އަޅަންޖެހިފައިވާ ކަމަށްވެސް ވިދާޅުވިއެވެ.
ހަމައެއާއެކު، ފަލަސްޠީނުގެ ރައްޔިތުންނަށް އަމިއްލަ މުސްތަޤުބަލު ކަނޑައެޅުމުގެ ޙައްޤު ހޯދައިދިނުމަށާއި، މިނިވަން މުސްތަޤިއްލު ދައުލަތެއްގެ ގޮތުގައި ފަލަސްޠީނު ބަލައިގަތުން އިތުރުކޮށް، އދގެ ފުރިހަމަ މެންބަރުކަން އެ ގައުމަށް ހޯދައިދިނުމަށް އިސްލާމީ ގައުމުތަކުން އެކުގައި މަސައްކަތްކުރުމަށް މިނިސްޓަރު އިރުތިޝާމް އިލްތިމާސްކުރެއްވިއެވެ.
މި ބައްދަލުވުމުގައި، ފަލަސްތީނުގެ ބިންތަކުގައި ޔަހޫދީން ވަޒަންވެރިކުރުވުމާ ދެކޮޅަށް ހުޅަނގުގެ ބައެއް ގައުމުތަކުން ނެގި ހަރުދަނާ ސްޓޭންޑަށާއި، ގައިރު ގާނޫނީ ވަޒަންވެރިންނާ ދެކޮޅަށް އަޅަމުންދާ ފިޔަވަޅުތަކަށް ދިވެހިރާއްޖޭގެ ފަރާތުން ވަޒީރު ވަނީ މަރުހަބާ ދަންނަވައިފައެވެ. ”ޖޮއިންޓް އަރަބް އިސްލާމިކް މިނިސްޓީރިއަލް މީޓިންގ އޮން ޖެރުސަލެމް“ އަކީ ގުދުސްގެ މައްސަލައިގައި އަދުލުވެރި ހައްލެއް ހޯދުމަށްޓަކައި އުރުދުންގެ އިސްނެގުމުގެ މަތިން އަރަބި އަދި އިސްލާމީ ގައުމުތައް ގުޅިގެން ބާއްވަމުން އަންނަ މުހިންމު ސިލްސިލާ ބައްދަލުވުމެކެވެ.
