ހައުސިންގ މިނިސްޓްރީން އެއްވެސް ލިޔެކިޔުމެއް ގެއްލިފައި ނުވާކަމަށް ދިވެހި ފުލުހުންގެ ހިދުމަތުން ބުނެފިއެވެ.
މިކަމާ ގުޅިގެން ފުލުހުން ބުނީ، ހައުސިންގ މިނިސްޓްރީގެ ރަސްމީ ލިޔެކިޔުންތައް ބަހައްޓާފައި ހުރި ލޮކަރުތަކެއް ހަމަޖެހިފައިވާ އުސޫލުގެ ބޭރުން ހުޅުވާފައިވާ ކަމުގެ ރިޕޯޓެއް ހުކުރު ދުވަހުގެ ރޭ 19:18 ހާއިރު ލިބިފައިވާ ކަމަށެވެ. އެ ރިޕޯޓާ ގުޅިގެން ފުލުހުން ވަގުތުން އެ މިނިސްޓްރީއަށް ގޮސް ހާލަތު ބަލައި ދިރާސާކޮށްފައިވާ ކަމަށްވެސް ފުލުހުން ވަނީ ބުނެފައެވެ.
ބިނާރާއި، ގެދޮރުވެރިކަމާއި، އުމުރާނީ ތަރައްޤީއާ ބެހޭ ވުޒާރާގެ ހުރި ރަސްމީ ލިޔެކިޔުންތަކެއް އަޅާފައިވާ ލޮކަރުތަކެއް އޮންނަ އުސޫލުން ބޭރުން ހުޅުވާފައި ހުރިކަމަށް އެ ވުޒާރާއިން ކުރި ރިޕޯޓާ ގުޅޭ pic.twitter.com/JyKdJCUgUp
— Maldives Police (@PoliceMv) September 26, 2026
އަދި ފުލުހުންގެ ހާޒިރުގައި އެ މިނިސްޓްރީގެ މުވައްޒަފުން އެ ލޮކަރުތަކުގައި ހުރި ލިޔެކިޔުންތައް ބަލައި ޗެކްކުރިއިރު، އެއްވެސް ލިޔުމެއް އަދި އެހެނިހެން އެއްޗެއްވެސް މަދުވެފައި ނުވާކަން ކަށަވަރުކުރެވިފައިވާ ކަމަށް ފުލުހުން ބުނެފައިވެއެވެ.
ފުލުހުން މި މޭރުމުން ބުނެފައި މިވަނީ، ހައުސިންގ މިނިސްޓްރީގެ މުހިންމު ލިޔެކިޔުންތަކެއް ހުރި ލޮކަރުތަކެއް ހުޅުވާފައިވާ ކަމަށް ބުނެ ބައެއް މީޑިއާތަކުގައި ހަބަރު ފަތުރަމުންދާ ދަނޑިވަޅެއްގައެވެ.
