އޭޝިއަން ފުޓްބޯލް ކޮންފެޑެރޭޝަން (އޭއެފްސީ) އިން ރާއްޖޭގެ ފުޓްބޯޅައިގެ މައި އިދާރާ (އެފްއޭއެމް) އަށް ދެމުން އައި މާލީ އެހީތެރިކަން އަލުން ދިނުމަށް ނިންމައި، އެފްއޭއެމްގެ ކުރީގެ މެނޭޖްމަންޓުން ނަހަމަ ގޮތުގައި ބޭނުންކޮށްފައިވާ ފައިސާ މައާފުކޮށްދީފިއެވެ.
އޭއެފްސީގެ އެގްޒެކްޓިވް ކޮމިޓީން ނިންމި މި ނިންމުމާއެކު، އެފްއޭއެމުން ކުރިން އަނބުރާ ދައްކަންޖެހޭ 253،030 ޑޮލަރު (ގާތްގަނޑަކަށް 3.9 މިލިއަން ރުފިޔާ) ދައްކަން ނުޖެހޭ ގޮތަށް ވަނީ ހަމަޖައްސައިދީފައެވެ. އަދި އަންނަ އަހަރުން ފެށިގެން އޭއެފްސީގެ މާލީ އެހީއަށް އެދުމުގެ ފުރުސަތު ރާއްޖެއަށް އަލުން ވަނީ ހުޅުވާލާފައެވެ.
މި ފައިސާއަކީ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލުގެ ދައުރުގައި އޭއެފްސީން ދިން ފައިސާ ނަހަމަ ގޮތުގައި ބޭނުންކޮށްފައިވާތީ އަނބުރާ ދެއްކުމަށް އެ ފެޑެރޭޝަނުން އަންގާފައިވި ފައިސާއެކެވެ. މާލީ އެހީ ހޯދުމުގެ ފުރުސަތު ރާއްޖެއަށް ބަންދުވީ 2024 ވަނަ އަހަރުގެ ތެރޭގައެވެ.
އެފްއޭއެމްގެ މިހާރުގެ ރައީސް އަހުމަދު ތޯރިގް (ޓޮމް) އިސްވެ ހުންނަވައިގެން އޭއެފްސީގައި އެދިވަޑައިގެންފައިވަނީ، ދިވެހި ފުޓްބޯޅައިގެ ހާލަތު ރަނގަޅުކުރުމަށްޓަކައި އެ ފައިސާ މައާފުކޮށްދީ، މާލީ އެހީ އަލުން ލިބޭނެ މަގު ތަނަވަސްކޮށްދިނުމަށެވެ. އެއާއެކު އޭއެފްސީން ވަނީ އެފްއޭއެމްގެ ހުށަހެޅުމާ އެއްގޮތަށް އެ ދެ ކަންތައްވެސް ކޮށްދީފައެވެ.
އެފްއޭއެމްގެ ފައިސާއަށް ހިޔާނާތްތެރިވެ، އަމިއްލަ ކަންކަމަށް ބޭނުންކުރިކަން ސާބިތުވެ ބައްސާމް މިވަގުތު 32 އަހަރުގެ ޖަލު ހުކުމެއް ތަންފީޒުކުރައްވަމުން ދާއިރު، ފީފާއިން ވަނީ އޭނާ 1.23 މިލިއަން ޑޮލަރުން ޖޫރިމަނާކޮށް، ފުޓްބޯޅައިގެ ހުރިހާ ހަރަކާތަކުން މުޅި އުމުރަށް ސަސްޕެންޑްވެސް ކޮށްފައެވެ.
