ރ. މަޑުއްވަރީގައި ބިދޭސީ އަންހެނަކަށް ހަމަލާދީ، އޭނާގެ އަތުން ފައިސާ ފޭރުނު މައްސަލައެއްގައި ބަންގްލަދޭޝް ފިރިހެނަކު ހައްޔަރުކޮށް، ފުލުހުން އެ ހާދިސާގެ ތަހުގީގު ފަށައިފިއެވެ.
އިއްޔެ ހެނދުނު 06:04 ހާއިރު ހިނގި މި ހާދިސާއާ ގުޅިގެން ފުލުހުން ބުނީ، މަޑުއްވަރީގައި ބިދޭސީ އަންހެނަކަށް މާރާމާރީ ހިންގައި ފައިސާ ފޭރުނު މައްސަލައެއް ހުށަހެޅިގެން ބަލަމުންދާ ކަމަށެވެ. ނަމަވެސް، މި މައްސަލައާ ގުޅޭ އިތުރު ތަފްސީލެއް ފުލުހުން ހާމައެއް ނުކުރެއެވެ.
މަޑުއްވަރީ ކައުންސިލުން މައުލޫމާތު ދިން ގޮތުގައި، އަންހެން މީހާއަށް އަނިޔާކޮށް ފައިސާ ފޭރުނީ ބަންގްލަދޭޝްއަށް ނިސްބަތްވާ ފިރިހެނެކެވެ. އަދި އެ މައްސަލައާ ގުޅިގެން ފުލުހުން މިހާރު ވަނީ އޭނާ ހައްޔަރުކޮށްފައެވެ.
މި ހާދިސާގެ މަންޒަރުތައް ފެންނަ ވީޑިއޯއެއް ސޯޝަލް މީޑިއާގައި ދައުރުވަމުންދާއިރު، އެ ވީޑިއޯއިން ފެންނަނީ ބިދޭސީ ފިރިހެން މީހާ، އަންހެން މީހާ ބިންމައްޗަށް ވައްޓާލައި، އޭނާގެ ގައިމައްޗަށް އަރައި އަނގަމަތީ އަތްއަޅައި ބާރުކުރާ މަންޒަރެވެ. މީގެ އިތުރުން، އެ ސަރަހައްދުގެ މަގުމައްޗަށް ގިނަ އަދަދެއްގެ ފައިސާ ވަޔަށް ބުރައިގެން ގޮސްފައި ހުރި މަންޒަރުވެސް ފެނެއެވެ.
މި މައްސަލައާ ގުޅިގެން އަދި މީހަކު ހައްޔަރުކޮށްފައެއް ނުވެއެވެ. ނަމަވެސް މި މައްސަލަ ފުލުހުން ދަނީ އިތުރަށް ތަހުގީގުކުރަމުންނެވެ.
