މާލޭސިޓީ ކައުންސިލްގެ ރަސްމީ ބައްދަލުވުމެއްގައި ކައުންސިލަރު އިރާޝާ ދެއްކި ވާހަކަތަކުންނާއި ގެންގުޅުނު ހަމަތަކުން، އާންމު ރައްޔިތުންގެ މަސްލަހަތާ ގުޅުންހުރި މުހިންމު ކަންކަމުގައި އޭނާގެ ހުރި ނާޤާބިލުކަން ވަރަށް ސާފުކޮށް ހާމަވެގެންގޮސްފިއެވެ.
ކައުންސިލްގެ މަސްއޫލިއްޔަތުތަކާއި، ސިޓީގެ ތަރައްޤީއަށް ބޭނުންވާ ފަންނީ އަދި އިދާރީ ކަންކަމަށް ފުންކޮށް ވިސްނުމުގެ ބަދަލުގައި، އޭނާގެ ވާހަކަތައް ބައްޓަންވެފައިވަނީ ސިޔާސީ ސަބަބުތަކަށްޓަކައި ހަމައެކަނި ލަފާކުރުންތަކެއްގެ މައްޗަށެވެ. މިއީ ސިޓީ ކައުންސިލް ފަދަ އާންމު ހިދުމަތްތަކާ އެންމެ ބޮޑަށް ގުޅިފައިވާ މުއައްސަސާއެއްގެ މެންބަރެއްގެ ކިބައިން ފެނިގެންވާނެ ސޫރައެއް ނޫންކަމަށްވާއިރު، މިކަމުން އަންގައިދެނީ ރައްޔިތުންގެ ކަންކަން ނިންމުމުގައި އޭނާގެ ހުރި އުނިކަމެވެ.
މާލޭ ސިޓީ ކައުންސިލްގެ ގަލޮޅު އުތުރު ދާއިރާގެ އެމްޑީޕީ ކައުންސިލަރު އާމިނަތު އިރާޝާ ދެއްކި ވާހަކަތަކަކީ ސިޔާސީ ގޮތުންނާއި އިޤްތިޞާދީ ތަރައްޤީގެ ނަޒަރިއްޔާތުން އެއްވެސް ދެކޮޅެއް ޖެހޭ ވާހަކަތަކެއް ނޫނެވެ. ހިޔާ ފްލެޓްތަކުގެ މަސައްކަތް ދެބުރިއަށް ނިމިފައި ވަނިކޮށް އެމްޑީޕީ ސަރުކާރުން އެތަން ނިންމި ކަމަށް ބުނެ، ސަރުކާރުތައް ބަދަލުވާއިރު ކަންކަން ހުންނާނީ ނުނިމި ކަމަށާއި އެހެންވެ ”ރަސްމާލެ“ ހިއްކަން ނުޖެހޭނެ ކަމަށް އިރާޝާ ވިދާޅުވުމަކީ ތަރައްޤީގެ ސަރީޙަ ތަޞައްވުރެއް ނެތްކަން ހާމަވާ ކަމެކެވެ.
އެމްޑީޕީ ސަރުކާރުން ކުރީގެ މަޝްރޫޢުތައް ނިންމި ކަމަށް ބުނެ ސަނާ ކިޔަމުން، ރައްޔިތުންގެ ބޯހިޔާވަހިކަމުގެ ބޮޑު މައްސަލައަށް ދާއިމީ ޙައްލެއް ހޯދައިދިނުމަށް ފަށާ ”ރަސްމާލެ“ ފަދަ ބިޔަ މަޝްރޫޢުތަކާ އިރާޝާ ދެކޮޅުހެއްދެވުމަކީ ދެކޮޅުނުޖެހޭ ބޭކާރު އުޒުރެކެވެ. ސަރުކާރުތައް ބަދަލުވިޔަސް، ދައުލަތުގެ ހިންގުމާއި ތަރައްޤީގެ މަޝްރޫޢުތައް ހުއްޓުމެއްނެތި ކުރިއަށްދާންޖެހޭނެއެވެ.
ތަޢުލީމީ ފެންވަރެއް އަދި ތަޞައްވުރެއް ނެތް މީހުން ރައްޔިތުން ތަމްސީލުކުރާ މަޤާމުތަކަށް އައުމުގެ ހިތި ނަތީޖާ މިއަދު މިދަނީ ފެންނަމުންނެވެ. ޤައުމުގެ ކުރިމަގާމެދު ފުންކޮށް ވިސްނުމުގެ ޤާބިލުކަން ނެތް މީހުން ވެރިކަމުގެ ބާރުތަކާ ހަވާލުވުމުން، ސިޔާސީ ވާދަވެރިކަމުގައި ތަރައްޤީގެ މަޝްރޫޢުތަކަށް ހުރަސްއެޅި، އޭގެ އެންމެ ބޮޑު ގެއްލުމާއި ނިކަމެތިކަން ތަހައްމަލުކުރަންޖެހެނީ އާންމު ރައްޔިތުންނެވެ.
