ގަން އިންޓަރނޭޝަނަލް އެއާރޕޯޓް މެދުވެރިކޮށް ރާއްޖެ އެތެރެކުރަން އުޅުނު 3.3 ކިލޯ އަށްވުރެ ގިނަ މަސްތުވާތަކެތި މޯލްޑިވްސް ކަސްޓަމްސް ސާވިސްއިން އަތުލައިގެންފިއެވެ.
ކަސްޓަމްސްއިން މައުލޫމާތު ދީފައިވާ ގޮތުގައި މި ތަކެތި އަތުލައިގަނެފައިވަނީ 2026 ސެޕްޓެންބަރު 22 ވަނަ ދުވަހު އިންޑިއާއިން ރާއްޖެއައި އިންޑިއާގެ ދެ ފަސިންޖަރެއްގެ ލަގެޖް ބަލާފާސްކުރުމުގެ ތެރޭގައެވެ. އެ މީހުންގެ ލަގެޖް ބަލައިފާސްކުރީ މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވިގެންނެވެ.
އެ ދެ ފަސިންޖަރުންގެ ލަގެޖް ބަލައިފާސްކުރުމުގެ ތެރޭގައި އަތުލައިގަތް މަސްތުވާތަކެތީގެ ބާވަތަކީ ކެނަބިސް ކަމަށް ކަސްޓަމްސްއިން ބުނެއެވެ. އަދި އަތުލައިގަނެވުނު ކެނަބިސްގެ ޖުމްލަ ބަރުދަނުގައި 3,345 ގްރާމް (3.3 ކިލޯއަށްވުރެ ގިނަ) ހުރި ކަމަށްވެސް އެ އިދާރާއިން މައުލޫމާތު ދެއެވެ.
މަސްތުވާތަކެތި އެތެރެކުރަން އުޅުނު މައްސަލައާ ގުޅިގެން އަތުލައިގަނެވުނު ތަކެއްޗާއި، ހައްޔަރުކުރެވުނު އިންޑިއާގެ ދެ ފަސިންޖަރުން އިތުރަށް ތަހުގީގުކުރުމަށްޓަކައި މިހާރު ވަނީ ދިވެހި ފުލުހުންގެ ޚިދުމަތާ ހަވާލުކޮށްފައެވެ.
