ދިވެހިރާއްޖެއާއި ސަޢޫދީ ޢަރަބިއްޔާއާ ދެމެދު އޮތީ ޑިޕްލޮމެޓިކް ގުޅުމަކަށްވުރެ މާ ފުން، ވަރުގަދަ އުހުއްވަތްތެރި ގުޅުމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ ސަޢޫދީ ޢަރަބިއްޔާގެ 96 ވަނަ ގައުމީ ދުވަސް ފާހަގަކުރުމުގެ ގޮތުން ބޭއްވި ހާއްސަ ހަފުލާ ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ. އެ މަނިކުފާނުގެ ވާހަކަފުޅުގައި، ދެ ގައުމުގެ ދެމެދުގައިވާ ބަދަހި ގުޅުމުގެ މައިގަނޑު އަސާސަކީ އިސްލާމީ މަތިވެރި އަގީދާއާއި އެއްގޮތް ގަބޫލުކުރުންތަކުގެ މައްޗަށް ބިނާވެފައިވާ އަހުވަންތަކަން ކަމުގައި ފާހަގަކުރެއްވިއެވެ. އަދި ސަގާފީ ގޮތުންނާއި މެހެމާންދާރީ އަދާކުރުމުގައި ދެ ގައުމުގެ މެދުގައި ހުރި އެއްގޮތް ސިފަތަކުގެ ސަބަބުން، ދެ ގައުމުގެ ރައްޔިތުންގެ މެދުގައި އޮތް އިހްލާސްތެރި އެކުވެރިކަން އިތުރަށް ހަރުދަނާވެފައިވާ ކަމަށް އެމަނިކުފާނު ވިދާޅުވިއެވެ.
މީގެއިތުރުން، ސަޢޫދީ ޢަރަބިއްޔާގެ ހަރުދަނާ އުސޫލުތަކަށާއި ދުރުވިސްނޭ ސިޔާސަތުތަކަށް ތައުރީފު ކުރައްވަމުން ރައީސް ވިދާޅުވީ، އެ ގައުމުގެ ކިބައިން ފެންނަނީ ކެރުމާއި، ދުރުވިސްނުމާއި، ދީލަތިކަމުގެ އިތުރުން މެހެމާންދާރީ އަދި އަސްލުވަންތަކަމުގެ ރިވެތި ނަމޫނާއެއް ކަމަށެވެ. އަދި ބައިނަލްއަގުވާމީ މައިދާނުގައި ސަޢޫދީ ޢަރަބިއްޔާއިން އަދާކުރަމުންދާ އިސް ދައުރާއި، ސުލްހަމަސަލަސްކަމާއި ތަރައްގީ ގާއިމުކުރުމަށް ކުރަމުންދާ މަސައްކަތްތައް ފާހަގަކުރެއްވިއެވެ.
ރާއްޖޭގެ ތަރައްގީގައި ސަޢޫދީ ޢަރަބިއްޔާއިން ވެދީފައިވާ ދީލަތި އެހީތައް ފާހަގަކުރައްވަމުން ރައީސް ވިދާޅުވީ، ދަތުރުފަތުރާއި، ގެދޮރުވެރިކަމާއި، ސިއްހީ ދާއިރާ އަދި މަސްވެރިކަމުގެ ދާއިރާ ކުރިއެރުވުމަށާއި، ހާއްސަކޮށް ސުނާމީ ކާރިސާއަށްފަހު ރާއްޖެ އަލުން ބިނާކުރުމުގައި ސަޢޫދީން އަގުހުރި އެހީތަކެއް ފޯރުކޮށްދީފައިވާ ކަމަށެވެ.
މިއަހަރުގެ ސަޢޫދީ ޢަރަބިއްޔާގެ ގައުމީ ދުވަހުގެ ޝިއާރު ކަމުގައިވާ ”އަޅުގަނޑުމެންގެ ފަހުރަކީ އަޅުގަނޑުމެންގެ ތަބީއަތް“ މިއަށް އިޝާރާތްކުރައްވައި ރައީސް މުޢިއްޒު ވިދާޅުވީ، މިއީ ހަމައެކަނި ގައުމީވަންތަކަން ދައްކުވައިދޭ ޝިއާރެއް ނޫން ކަމަށާއި، މިއީ ގައުމެއްގެ ސިފަތައް ބަޔާންކޮށްދީ، މުސްތަގުބަލުގެ މިސްރާބު އަލިކޮށްދޭ އަގުހުރި އުސޫލުތަކެއް ކަމަށެވެ.
