ޚާއްޞަ އެހީއަށް ބޭނުންވާ ފަރާތްތަކުގެ ޙައްޤުތައް ބައިނަލްއަޤްވާމީ މިންގަނޑުތަކާ އެއްގޮތަށް ކަށަވަރުކޮށްދިނުމަށްޓަކައި، ”އޮޕްޝަނަލް ޕްރޮޓޮކޯލް ޓު ދަ ކޮންވެންޝަން އޮން ދަ ރައިޓްސް އޮފް ޕަރސަންސް ވިތް ޑިސްއެބިލިޓީސް“ ގައި ދިވެހިރާއްޖެއިން ބައިވެރިވުމަށް ވަޒީރުންގެ މަޖިލީހުން ނިންމަވައިފިއެވެ.
ރައީސުލްޖުމްހޫރިއްޔާގެ އޮފީހުން މަޢުލޫމާތު ދެއްވި ގޮތުގައި، މި މަހުގެ 20 ވީ އާދިއްތަ ދުވަހު ބޭއްވި ކެބިނެޓް ބައްދަލުވުމުގައި މިގޮތަށް ނިންމެވީ މިނިސްޓްރީ އޮފް ހެލްތު، ފެމިލީ އެންޑް ވެލްފެއަރއިން ހުށަހެޅުއްވި ކަރުދާހަށް ވަޒީރުންގެ މެދުގައި މަޝްވަރާ ކުރެއްވުމަށް ފަހުގައެވެ. އަދި ޤާނޫނުއަސާސީގެ 93 ވަނަ މާއްދާގެ (ހ) ގެ ދަށުން މިއީ ރައްޔިތުންގެ މަޖިލީހުގެ ރުހުން ހޯދަންޖެހޭ ކަމަކަށްވާތީ، އެ މަޖިލީހަށް ހުށަހެޅުއްވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ނިންމަވާފައެވެ.
ދިވެހިރާއްޖެއިން 5 އެޕްރީލް 2010 ގައި ”ކޮންވެންޝަން އޮން ދަ ރައިޓްސް އޮފް ޕަރސަންސް ވިތް ޑިސްއެބިލިޓީސް“ ތަޞްދީޤުކޮށްފައިވީ ނަމަވެސް، މީގެ ކުރިން މި އޮޕްޝަނަލް ޕްރޮޓޮކޯލްގައި ބައިވެރިވެފައެއް ނުވެއެވެ. ނަމަވެސް ބައިނަލްއަޤްވާމީ ތަފާތު ނިޒާމުތަކުގެ ދަށުން ރާއްޖޭގެ ޙާލަތު ވަޒަންކުރުމުގައި، މިއީ ވީ އެންމެ އަވަހަކަށް ތަޞްދީޤުކުރުމަށް ރެކޮމެންޑޭޝަން ލިބިފައިވާ މުހިންމު ޕްރޮޓޮކޯލެކެވެ.
މި ޕްރޮޓޮކޯލަކީ ނުކުޅެދުންތެރިކަން ހުންނަ ފަރާތްތަކަށް ލިބިދޭ ޙައްޤުތައް އިތުރަށް މުޠާލިއާކޮށް ހަރުދަނާކުރުމާއެކު، މުޢާހަދާ ތަންފީޒުކުރުމުގައި މެންބަރު ޤައުމުތައް ޒިންމާދާރުކުރުވުމުގެ މަޤްޞަދުގައި އެކުލަވާލާފައިވާ އެއްބަސްވުމެކެވެ. މީގެ ދަށުން، ވަކިވަކި ފަރުދުންގެ ޙައްޤެއް ނިގުޅައިގަނެވިއްޖެ ހާލަތެއްގައި ދާޚިލީ ޤާނޫނީ މަރުޙަލާތައް ފުރިހަމަކުރުމަށްފަހު އދ. ގެ ކޮމިޓީއަށް ޝަކުވާ ހުށަހެޅުމުގެ ފުރުޞަތު ލިބިގެންދެއެވެ.
އޭގެ އިތުރުން، މެންބަރު ޤައުމަކުން މުޢާހަދާގައިވާ ޙައްޤުތަކާ ނިޒާމީ ގޮތެއްގައި ބޮޑެތި ޚިލާފުވުންތަކެއް އުޅޭކަމުގެ އިތުބާރުހުރި ތުހުމަތެއް ކުރެވިއްޖެނަމަ، އެކަމާ ގުޅިގެން އިންކުއަރީއެއް ހިންގުމުގެ ބާރު އދ. ގެ ކޮމިޓީއަށް މި ޕްރޮޓޮކޯލްގެ ދަށުން ލިބިގެންދާނެއެވެ.
