ރަސްމާލޭގައި 20 ބިލިއަން ޑޮލަރުގެ ބިޔަ ވޯޓާފްރަންޓް އަދި މެރީނާ މަޝްރޫއު ކުރިއަށްގެންދިއުމަށް ހަމަޖެހިފައިވާ ޔޫއޭއީގެ އީގަލް ހިލްސް ކުންފުނިން، ހުޅުމާލޭގައި 5،000 ހައުސިންގ ޔުނިޓް ތަރައްގީކުރުމަށް ނިންމައިފިއެވެ.
މިކަމާ ގުޅޭގޮތުން ހައުސިންގ މިނިސްޓްރީން ބުނީ، ޔޫއޭއީގެ ވެރިރަށް އަބޫދާބީގައި ބޭއްވުނު ހާއްސަ ރަސްމިއްޔާތެއްގައި މި މަޝްރޫއު މިހާރު އެ ކުންފުންޏާ ރަސްމީކޮށް ހަވާލުކޮށްފައިވާ ކަމަށެވެ. މިއީ ރާއްޖޭގެ ތާރީހުގައި މިހާތަނަށް ހިންގޭ އެންމެ ބޮޑު އުމްރާނީ ތަރައްގީގެ އިންވެސްޓްމަންޓެވެ. ރާއްޖޭގެ މުޅި ޖީޑީޕީ 8.13 ބިލިއަން ޑޮލަރުގައި އޮތްއިރު، މި މަޝްރޫއުގެ އަގު ރާއްޖޭގެ ޖުމްލަ އިގްތިސާދަށްވުރެ ދެގުނަ ބޮޑުކަން ފާހަގަކޮށްލަންޖެހެއެވެ.
ހައުސިންގ މިނިސްޓްރީން އިތުރަށް ހާމަކޮށްފައިވާ ގޮތުގައި، އީގަލް ހިލްސް ކުންފުނިން ހުޅުމާލޭގައި ތަރައްގީކުރާ 5،000 ހައުސިންގ ޔުނިޓުގެ ސަބަބުން، މީގެކުރިން ސަރުކާރުން އިއުލާންކޮށްފައިވާ ސޯޝަލް ހައުސިންގ މަޝްރޫއުތަކުގެ އަދަދަށް އެއްވެސް އުނިއިތުރެއް ނާންނާނެއެވެ. ރާއްޖޭގެ ގެދޮރުވެރިކަމުގެ މައްސަލައަށް ދާއިމީ ހައްލެއް ހޯއްދަވައިދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ ރަސްމާލޭގައި ގޯއްޗާއި ފްލެޓް ހިމެނޭހެން ޖުމްލަ 65،000 ހައުސިންގ ޔުނިޓް ތަރައްގީކުރުމަށް ކަނޑައަޅައިފައެވެ.
މީގެއިތުރުން، މި ބިޔަ މަޝްރޫއަށް ދައުލަތުން އެއްވެސް ސަވަރިން ގެރެންޓީއެއް ދީފައި ނުވާނެ ކަމަށް މިނިސްޓްރީން ބުންޏެވެ. އަދި މި މަޝްރޫއު ހިންގާ ކުންފުންޏަށް ފައިސާ ދެއްކުމަށް ހަމަޖެހިފައިވަނީ ހައުސިންގ ޔުނިޓްތަކުގެ މަސައްކަތް އެއްކޮށް ނިންމައި، ސަރުކާރާ ހަވާލުކުރުމަށްފަހު އެ ތަންތަން ވިއްކުމުގެ މަރުހަލާގެ ތެރެއިން ކަމަށްވެސް އެ މިނިސްޓްރީން މައުލޫމާތު ދެއެވެ.
ރަސްމާލޭ ބިން ހިއްކުމުގެ މަޝްރޫއުގެ ދަށުން ޖުމްލަ 1،153 ހެކްޓަރުގެ ބިން ހިއްކުމަށް ހަމަޖެހިފައިވާއިރު، މިހާތަނަށް ވަނީ 716 ހެކްޓަރުގެ ބިން ހިއްކައި ނިންމާލައިފައެވެ. މިއާއެކު ރަސްމާލެ ވެގެން ގޮސްފައިވަނީ ދިވެހިރާއްޖޭގެ އެންމެ ބިން ބޮޑު ރަށަށެވެ.
ރަސްމާލޭގެ އިތުރުން ހުޅުމާލޭގައިވެސް މި މުހިންމު މަޝްރޫއު ކުރިއަށްގެންދާ އީގަލް ހިލްސް ކުންފުންޏަކީ ދުނިޔޭގެ މަޝްހޫރު ބުރްޖު ޚަލީފާ އަދި ދުބާއީ މޯލް ތަރައްގީކުރި އީމާރު ޕްރޮޕަޓީޒްގެ ބާނީ މުހައްމަދު އަލް އައްބާރުގެ ވިޔަފާރި ހިއްސާ އޮންނަ، ދުނިޔޭގެ އެކި ގައުމުތަކުގައި ފުޅާ ދާއިރާއެއްގައި އުމްރާނީ ތަރައްގީގެ ބޮޑެތި މަޝްރޫއުތައް ކާމިޔާބުކަމާއެކު ހިންގަމުން އަންނަ ބައިނަލްއަގުވާމީ ފެންވަރުގެ އިތުބާރު ހޯދާފައިވާ ކުންފުންޏެއްކަން ފާހަގަކޮށްލަންޖެހެއެވެ.
