މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ކަޅުބިލަމަސް ކިލޯއެއް ގަންނަ އަގު 22 ރުފިޔާއަށް މަތިކޮށްފިއެވެ.
މިފްކޯއިން މައުލޫމާތު ދިން ގޮތުގައި، މިއަދުން ފެށިގެން ރާއްޖޭގެ މައިގަނޑު 7 ސަރަހައްދެއްގެ ބަނދަރުން މި ރޭޓުގައި މަސް ގަންނަމުން ގެންދާނެއެވެ. މި އަގުގައި މަސް ގަތުމަށް ހަމަޖެހިފައިވާ ބަނދަރުތަކަކީ:
- ފެލިވަރު ފިޝަރީޒް ކޮމްޕްލެކްސް
- ކޫއްޑޫ ފިޝަރީޒް ކޮމްޕްލެކްސް
- އައްޑޫ ފިޝަރީޒް ކޮމްޕްލެކްސް
- ގދ. ތިނަދޫ ބަނދަރު
- ހއ. އިހަވަންދޫ ބަނދަރު
- ކ. ކަނޑުއޮތްގިރި ބަނދަރު
- މ. މުލަކު ބަނދަރު
މިފްކޯއިން މަސް ގަންނަ އަގު 22 ރުފިޔާއަށް ބޮޑުކުރިއިރު، މިއީ ފަހުގެ ތާރީހެއްގައި މަސްވެރިންނަށް ގަވާއިދުން ފައިސާ ދޫކުރަމުން، މިފަދަ ރަނގަޅު އަގެއްގައި މަސް ގަންނަން ފެށި ފުރަތަމަ ފަހަރެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވި އިރު، ފާއިތުވި ސަރުކާރުން މަސްވެރިންނަށް ނުދީ 200 އެތައް މިލިއަން ރުފިޔާއެއްގެ ބެކްލޮގެއް އޮތެވެ.
ނަމަވެސް، މި ސަރުކާރުން ވަނީ އެ ހުރިހާ ފައިސާއެއް މަސްވެރިންނަށް ދައްކައި ހަލާސްކޮށް، މަސް ކިރާތާ 48 ގަޑިއިރުގެ ތެރޭގައި ފައިސާ ލިބޭނެ ހަރުދަނާ ނިޒާމެއް ގާއިމުކޮށްދެއްވައިފައެވެ.
