ކުރިއަށް އޮތް 2028 ވަނަ އަހަރުގެ ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރާނެ ކެންޑިޑޭޓަކު ހޮވުމަށް ބާއްވާ ޕްރައިމަރީގައި ވާދަނުކުރެއްވުމަށް، ކުރީގެ ރައީސް އިބްރާހިމް މުޙައްމަދު ޞާލިޙް ނިންމަވާފައިވާ ކަމުގެ އަޑުތަކެއް ފެތުރެން ފަށައިފިއެވެ.
މީގެ ކުރިން ޕްރައިމަރީގައި ވާދަކުރައްވާނެކަން ހާމަކުރެއްވި ނަމަވެސް، ޕާޓީގެ އެތެރެއާއި އާންމު މެންބަރުންގެ މެދުގައި މަގުބޫލުކަން ކުޑަވުމާ ގުޅިގެން ރައީސް ޞާލިޙް މިހާރު ނިންމަވާފައިވަނީ، އެމަނިކުފާނުގެ ވެރިކަމުގައި ނައިބު ރައީސްކަން ކުރެއްވި ފައިސަލް ނަސީމަށް ތާއީދުކުރެއްވުމަށް ކަމަށް ނުރަސްމީ މަސްދަރުތަކުން މައުލޫމާތު ލިބެއެވެ. އެހެންނަމަވެސް، މި ނިންމެވުމާ ގުޅޭ ރަސްމީ އެއްވެސް ތަފުސީލެއް އެމަނިކުފާނުގެ އަރިސް ބޭފުޅުން ވެސް އަދި އެމްޑީޕީން ވެސް ރަސްމީކޮށް ހާމައެއް ނުކުރައްވައެވެ.
އެމްޑީޕީގެ އެކި ހަރަކާތްތަކުގައި އިސްކޮށް ހަރަކާތްތެރިވާ ބޭފުޅަކު ނަން ނުޖެހުމަށް ޝަރުތުކޮށް މައުލޫމާތު ދެއްވި ގޮތުގައި، ފައިސަލް ނަސީމް ރިޔާސީ ޕްރައިމަރީއަށް ނުކުމެވަޑައިގަންނަވަނީ ރައީސް ޞާލިޙުގެ ފުރިހަމަ ތާއީދާ އެކުގައެވެ. މިގޮތުން ޕްރައިމަރީގެ ޓިކެޓް ހޯއްދެވުމުގެ ޝައުގުވެރިކަމާ އެކު، ފައިސަލް ވަނީ ރައީސް ޞާލިޙާ ބައްދަލުކުރައްވައި މުހިންމު މަޝްވަރާތަކެއް ވެސް ކުރައްވައިފައެވެ. އަދި ފައިސަލްގެ ރަނިންގ މޭޓެއްގެ ގޮތުގައި މާލެ ސިޓީގެ މޭޔަރު އާދަމް އާޒިމް ހަމަޖެއްސެވުމަށް ނިންމަވާފައިވާ ކަމަށް ވެސް މައުލޫމާތު ލިބެއެވެ. އެހެންނަމަވެސް، މި ވާހަކަތަކާ ގުޅޭގޮތުން ރައީސް ޞާލިޙް އަދި ފައިސަލް ވެސް ރަސްމީކޮށް އަދި އެއްވެސް އެއްޗެއް ވިދާޅެއް ނުވެއެވެ.
ޖުމްހޫރީ ޕާޓީގައި 16 އަހަރު ހިދުމަތް ކުރެއްވުމަށްފަހު، އެ ޕާޓީން ވަކިވެވަޑައިގެން ފައިސަލް އެމްޑީޕީއާ ގުޅިވަޑައިގަތީ 22 ފެބްރުއަރީ 2024 ގައެވެ. މިކަމާ ގުޅިގެން ކުރީގެ ރައީސް މުޙައްމަދު ނަޝީދުގެ ފެކްޝަނަށް ނިސްބަތްވާ ބައެއް ފަރާތްތަކުން ދަނީ ފައިސަލްއަށް ފާޑުކިޔުންތައް އަމާޒުކުރަމުންނެވެ. އެގޮތުން، ފައިސަލްއަކީ އެމްޑީޕީއަށް ހިދުމަތް ކޮށްދެއްވާފައިވާ ބޭފުޅެއް ނޫން ކަމަށާއި، ޕާޓީއާ ގުޅިވަޑައިގަތްތާ އަދި ތިން އަހަރުވެސް ނުވާ ކަމަށް ބުނެ އެ ފަރާތްތަކުން ދަނީ ފާޑުކިޔުންތައް އަމާޒުކުރަމުންނެވެ.
އެމްޑީޕީގެ އެތެރޭގެ ވާދަވެރިކަން އިންތިހާއަށް ހޫނުވެފައިވާ މި ދަނޑިވަޅުގައި، އެ ޕާޓީގެ ކުރީގެ ރައީސް ޢަބްދުﷲ ޝާހިދާއި، އެ ޕާޓީގެ ކުރީގެ ޗެއަރޕާސަން ފައްޔާޒު އިސްމާޢީލްގެ އިތުރުން ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަޙްމަދު ޝަމްހީދު ވަނީ ޕްރައިމަރީގައި ވާދަކުރައްވާނެކަން ރަސްމީކޮށް އިއުލާނުކުރައްވައި، ކެމްޕޭން ހަރަކާތްތައް ފައްޓަވައިފައެވެ.
