ސަންޑަރލޭންޑް އަދި ސްވިޓްޒަލޭންޑް ޤައުމީ ފުޓްބޯޅަ ޓީމުގެ ކެޕްޓަން ގްރޭނިޓް ޝާކާ، 2022 ވަނަ އަހަރު ސައްޙަނޫން (ފޭކު) ކޮވިޑް-19 ވެކްސިން ސެޓްފިކެޓެއް ހޯދިކަމަށް ޢާންމުކޮށް އެއްބަސްވެއްޖެއެވެ.
ހޯމަ ދުވަހު އޭނާ ސޯޝަލް މީޑިއާގައި ނެރުނު ބަޔާނެއްގައި ބުނެފައިވަނީ، ވެކްސިނާމެދު އޭރު އޮތް ބިރުވެރިކަމަކާއި ނުތަނަވަސްކަމެއްގެ ސަބަބުން ނުބައި މަގަކުން ސެޓްފިކެޓް ހޯދުނީ ކަމަށާއި، އެއީ ހެދުނު ވަރަށް ބޮޑު ގޯހެއްކަމަށް ބަލައިގަނެ މަޢާފަށް އެދޭކަމަށެވެ.
ސްވިޓްޒަލޭންޑުގެ ލުސަރންގެ ޕްރޮސެކިއުޓަރ އޮފީހުން މިހާރު ވަނީ މި މައްސަލައިގައި ލިޔެކިޔުން އޮޅުވާލުމުގެ ޖިނާއީ ތަޙުޤީޤެއް ފަށާފައެވެ. މި ތަޙުޤީޤު އަމާޒުކޮށްފައިވަނީ ވެކްސިން ނުދީ ފޭކު ސެޓްފިކެޓް ދޫކުރި ސްވިސް ޑޮކްޓަރެއްގެ މައްސަލައަށެވެ. ޝާކާ އަންނަނީ ކަމާބެހޭ ފަރާތްތަކަށް އެއްބާރުލުން ދެމުންނެވެ. އަދި އޮކްޓޯބަރު މަހު އޭނާ ތަޙުޤީޤަށް މަޢުލޫމާތު ދޭނެކަމަށް ބެލެވެއެވެ.
މި މައްސަލައާ ގުޅިގެން ސްވިސް ފުޓްބޯޅަ އެސޯސިއޭޝަނުން ވަނީ ޤައުމީ ޓީމުން އޭނާ ވަގުތީގޮތުން ސަސްޕެންޑްކޮށްފައެވެ. އެހެންކަމުން ކުރިއަށް އޮތް ޔުއެފާ ނޭޝަންސް ލީގުގައި ނޯތު މެސެޑޯނިއާ، ސްކޮޓްލޭންޑް އަދި ސްލޮވީނިއާއާ ދެކޮޅަށް ކުޅޭ މެޗުތަކުގައި އޭނާއަކަށް ނުކުޅެވޭނެއެވެ.
މިކަން ހިންގާފައިވަނީ 2022 ވަނަ އަހަރު އޭނާ އާސެނަލްގައި ކުޅުނު ދުވަސްވަރު ކަމަށްވުމުން، ޖުލައި 2025 ގައި އޭނާ ގުޅުނު މިހާރުގެ ކްލަބް ސަންޑަރލޭންޑުން މިކަމާ ގުޅޭގޮތުން ރަސްމީކޮށް އެއްޗެއް ބުނަން ވަނީ އިންކާރުކޮށްފައެވެ.
ވެކްސިނާމެދު އޮތް ”ފުން ނުތަނަވަސްކަމެއްގެ“ ސަބަބުން ފޭކު ސެޓްފިކެޓެއް ހޯދިކަމަށް ޝާކާ އެއްބަސްވުމަކީ، ކޮވިޑްގެ ބަލިމަޑުކަމުގެ ތެރޭގައި ޢާންމު ޞިއްޙީ ނިޒާމުތަކާމެދު މުޅި ދުނިޔޭގައިވެސް އުފެދުނު އިތުބާރުގެ މައްސަލަތަކުގެ ސާފު މިސާލެކެވެ. އެމެރިކާއާއި ވިލާތުގައި، ސަރުކާރުތަކުގެ އަމުރުތަކާއި، އެމެރިކާގެ ސީ.ޑީ.ސީ އަދި ޑރ. އެންތަނީ ފައުޗީ ފަދަ ޞިއްޙީ މާހިރުން މާސްކު އެޅުމާ ގުޅޭގޮތުން ފުރަތަމަ ދިން އިރުޝާދުތައް ފަހުން ބަދަލުކުރުވުމުގެ ސަބަބުން، ޢާންމުންގެ މެދުގައި ބޮޑެތި ޝައްކުތަކެއް އުފެދުނެވެ. ޞިއްޙީ އިދާރާތަކުން މިއީ އައު މަޢުލޫމާތާއެކު ގެނައި ބަދަލުތަކެއް ކަމަށް ބުނި ނަމަވެސް، ފާޑުކިޔާ ފަރާތްތަކުން މިކަން ސިފަކުރީ ސަރުކާރުތަކުން އޮޅުވާލި އޮޅުވާލުމެއްގެ ގޮތުގައެވެ.
ޢާންމުންގެ މެދުގައި ނުތަނަވަސްކަން އުފެދުނު އަނެއް ސަބަބަކީ ވެކްސިން މަސައްކަތްކުރާ ގޮތާމެދު ކުރިން އޮތް ވިސްނުން ބަދަލުވުމެވެ. ފުރަތަމަކޮޅު ޞިއްޙީ އިދާރާތަކުން ބުނަމުންދިޔައީ ވެކްސިންގެ ސަބަބުން ބަލި ފެތުރުން ހުއްޓުވޭނެ ކަމަށެވެ. ނަމަވެސް ފަހުން އެނގިގެންދިޔަ ގޮތުގައި ވެކްސިން ފުރިހަމަކޮށްފައިވާ މީހުންނަށްވެސް ބަލިޖެހި، އެހެން މީހުންނަށް ބަލި ފެތުރުމުގެ ފުރުޞަތު އޮވެއެވެ. ވެކްސިން ޖެހުމަށްފަހުވެސް މީހުން ޕޮޒިޓިވްވަމުން ދިޔޢޭ ޝާކާ ފަދަ މަޝްހޫރު ފަރާތްތަކުގެ ހިތުގައި ވެކްސިނާމެދު ބިރުވެރިކަން އުފެދި، ނުބައި މަގުން ސެޓްފިކެޓް ހޯދަން މެދުވެރިވި މައިގަނޑު އެއް ސަބަބެވެ.
ކޮވިޑް-19 ވެކްސިންތައް އެންމެ ފުރަތަމަ ނެރުނު ދުވަސްވަރު ކަންކަން ހިނގައިދިޔަ ގޮތަށް ބަލާއިރު، ވެކްސިން މަޖުބޫރުކުރުމާއި އޭގެ ސައިޑް އިފެކްޓްތަކާ ގުޅޭގޮތުން ޢާންމުންގެ މެދުގައި އުފެދުނު ކަންބޮޑުވުންތަކަކީ ޞިއްޙީ އިދާރާތަކުންވެސް ފަހުން ބަލައިގަނެފައިވާ ޙަޤީޤަތްތަކެކެވެ.
ކޮވިޑް-19 ގެ ވެކްސިންތައް އެންމެ ފުރަތަމަ ޢާންމުކޮށް ދޭން ފަށާފައިވަނީ ކްލިނިކަލް ޓްރަޔަލްތަކުގެ (ތަޖުރިބާގެ) ފޭސް 3 ނިމުމާއެކު، އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) ފަދަ އިދާރާތަކުން ދިން ”އިމަޖެންސީ ޔޫސް އޮތޮރައިޒޭޝަން“ (އީޔޫއޭ) ނުވަތަ ކުއްލި ޙާލަތުގެ ހުއްދައިގެ ދަށުންނެވެ. ބަލިމަޑުކަމުގެ ނުރައްކާ ބޮޑުވުމުގެ ސަބަބުން މި ހުއްދަ ދިން ނަމަވެސް، އެތައް އަހަރެއްގެ ދިގު މުއްދަތުގެ ސޭފްޓީ ޑޭޓާ ނުލިބެނީސް، އަދި ވެކްސިންތަކަށް ފުރިހަމަ ރަސްމީ އެޕްރޫވަލް ނުލިބެނީސް މުޅި ދުނިޔޭގައި ޢާންމު މަސައްކަތްތެރިންނަށާއި ކުޅިވަރު ކުޅުންތެރިންނަށް ވެކްސިން ޖެހުން މަޖުބޫރުކުރުމަކީ ޤާނޫނީ ގޮތުންނާއި އިންސާނީ ޙައްޤުތަކުގެ ގޮތުން ގިނަ ބައެއްގެ ނުރުހުމާއި ފާޑުކިޔުން އަމާޒުވި ކަމެކެވެ.
އެމެރިކާގެ ސީ.ޑީ.ސީ އާއި ބައިނަލްއަޤްވާމީ ޞިއްޙަތު ޖަމްޢިއްޔާތަކުން ވަނީ ވެކްސިންގެ ބައެއް ނުރައްކާތެރި ސައިޑް އިފެކްޓްތައް ރެކޯޑުކޮށްފައެވެ. މީގެ ތެރޭގައި ފައިޒަރ އަދި މޮޑާނާ ފަދަ ’އެމް.އާރް.އެން.އޭ‘ ވެކްސިން ޖެހި ބައެއް ޒުވާން ފިރިހެނުންނަށް ހިތުގެ މަސްގަނޑު ދުޅަވުން (މަޔޯކާޑައިޓިސް އަދި ޕެރިކާޑައިޓިސް) ދިމާވުމާއި، ޖޯންސަން އެންޑް ޖޯންސަން ވެކްސިން ޖެހި ބައެއް މީހުންނަށް ލޭގަނޑުވުމުގެ (ޓީޓީއެސް) ނުރައްކާތެރި މައްސަލަތައް ފާހަގަކުރެވިފައިވެއެވެ. ފެންނަމުންދިޔަ މިފަދަ ޙަޤީޤީ ސައިޑް އިފެކްޓްތައް ރެކޯޑުކުރެވެން ފެށުމާއެކު، ވެކްސިންގެ ރައްކާތެރިކަމާމެދު ޝާކާ ފަދަ ޕްރޮފެޝަނަލް އެތްލީޓުންގެ މެދުގައި އޮތް ބިރުވެރިކަން އިތުރަށް ބޮޑުވެ، ސައްޙަނޫން ސެޓްފިކެޓް ހޯދުމަށް ގިނަ ބަޔަކު މަސައްކަތްކުރިއެވެ. އެހެންނަމަވެސް ސަރުކާރުތަކުން މިފަދަ އިންސާނީ ޙައްޤުތަައް ނިގުޅާ ގެނެވިގެންދާ މެންޑޭޓުތައް ރައްޔިތުންގެ މައްޗަށް ތަންފީޒުކުރުމަށްފަހު އެކަމުގެ ސަބަބުން ރައްޔިތު މީހާގެ ކަންބޮޑުވުމާއި އަދި ލިބޭނެ ގެއްލުންތަކަށް އެއްވެސް ފަރުވާލެއް ނުބެހެއްޓުމުން އާންމުމީހާ ނަގާ ފިޔަވަޅުތަކުން ސަރުކާރު މެންޑޭޓާ ޚިލާފުވެގެން އަދަބު ދިނުމަކީ ސަބަބުވެރި ވިސްނުމަކުން ބަލާއިރު އެއްވެސް ގޮތަކަށް ބަލައިގަނެވޭނެ ކަމެއް ނޫނެވެ.
