ގދ. ގައްދޫ ކައުންސިލުން ފޯރުކޮށްދެމުން އައި އެއްގަމާއި ކަނޑު އުޅަނދުފަހަރުގެ ލައިސަންސް ދޫކުރުމުގެ އެންމެހައި ހިދުމަތްތައް މެދުކަނޑާލައިފިއެވެ.
މިކަމާ ގުޅިގެން އެ ރަށު ކައުންސިލުން ހާމަކުރި ގޮތުގައި، ރައްޔިތުންނަށް ލުއިފަސޭހަކަން ހޯދައިދިނުމަށް ފެށި މި ހިދުމަތް މެދުކަނޑާލަން ޖެހުނީ ޒިންމާދާރު ފަރާތްތަކެއްގެ އިހުމާލުންނާއި، މާލީ ބޮޑެތި މަންފާތަކެއް ހޯދުމަށްޓަކައި ގާނޫނާއި ގަވާއިދާ ހިލާފަށް ހިންގާފައިވާ ގިނަ އަމަލުތަކެއްގެ ސަބަބުންނެވެ.
ކައުންސިލުން ބުނި ގޮތުގައި، ފަސްވަނަ ދައުރުގެ ކައުންސިލަރުން މަގާމާ ހަވާލުވި ފަހުން ވެސް ލައިސަންސް ދޫކުރުމުގެ ނިޒާމާ މެދު ގިނަ ޝަކުވާތަކެއް ވަނީ ލިބިފައެވެ. އެގޮތުން، މި ހިނގާ މަހުގެ 6 ވަނަ ދުވަހު ކައުންސިލްގެ ރައީސަށް ލިބުނު އިތުބާރު ހުރި މައުލޫމާތަކާ ގުޅިގެން ބެލިބެލުމުން، މާލޭގައި ހުރި ފަރާތަކުން އޮގަސްޓް 30 ގައި ލައިސަންސަށް އެދުމުން، ޖެހިގެން އައި އޮގަސްޓް 31 ވަނަ ދުވަހު ގަވާއިދާ ހިލާފަށް އެ ފަރާތަށް ގައްދޫ ކައުންސިލުން ލައިސަންސް ދޫކޮށްފައިވާކަން ވަނީ ފާހަގަކުރެވިފައެވެ.
މި މައްސަލަ އިތުރަށް ބެލުމުން، މިއީ ހަތަރުވަނަ ދައުރުގެ ކައުންސިލްގެ ބައެއް މެންބަރުންގެ ބައިވެރިވުމާއެކު ހިންގާފައިވާ ނާތަހުޒީބު ޖަރީމާއެއްކަން އެނގިފައިވާ ކަމަށް ކައުންސިލުން ބުންޏެވެ. އަދި މިފަދަ އަމަލުތަކުގެ ސަބަބުން، އިދާރާގެ ސިވިލް ސަރވިސް މުވައްޒަފުންނަށް މަޖުބޫރުވެގެން ގިނަ ކަންތައްތަކެއް ކުރަންޖެހި، އޭގެ ހުރިހާ ގެއްލުމަކާއި ތަކުލީފެއް އުފުލަން ޖެހުނީ އެ މުވައްޒަފުންނަށް ކަމަށްވެސް ކައުންސިލުން ފާހަގަކުރިއެވެ.
ގައްދޫ ކައުންސިލުން އިތުރަށް ހާމަކުރި ގޮތުގައި، މި މަހުގެ 17 ވަނަ ދުވަހު ކަމާބެހޭ ވުޒާރާގެ އިސް ދެ ބޭފުޅަކު އެ ރަށަށް ވަޑައިގެން ހިންގެވި މޮނިޓަރިންގ މަސައްކަތުން ވެސް، ގަވާއިދާ ހިލާފު ގިނަ ކަންތައްތަކެއް ހިނގާފައިވާކަން ވަނީ ކަށަވަރުވެފައެވެ.
އެގޮތުން، ގްރޭޓަރ މާލެ ސަރަހައްދުގައި މާލެއިން ލައިސަންސް ދޫކުރާ ނިސްބަތާ އެއްވަރަށް ގައްދޫއިން ލައިސަންސް ދޫކޮށްފައިވާކަން ފާހަގަކުރެވުނެވެ. ވޭތުވެދިޔަ އެއް އަހަރު ދުވަހުގެ ތެރޭގައި ގައްދޫއިން 1،600 އަށްވުރެ ގިނަ ލައިސަންސް ދޫކޮށްފައިވާއިރު، މިއީ މަހަކު އެވްރެޖުކޮށް 133 ލައިސަންސެވެ. ނަމަވެސް، އިމްތިހާނު ހެދުމުގައި ހަރަކާތްތެރިވި އެގްޒެމިނަރުންގެ މައުލޫމާތަށް ބަލާއިރު، ހަފުތާއަކު ދެތިން މީހަކު ވެސް ޕްރެކްޓިކަލް އިމްތިހާނު ފުރިހަމަކޮށްފައި ނުވާކަން ވަނީ އެނގިފައެވެ.
އެއްގަމާއި ކަނޑު އުޅަނދުފަހަރުގެ ލައިސަންސް ހިދުމަތް އަލުން ފެށުމަށްޓަކައި ސަރުކާރުގެ ކަމާގުޅުންހުރި އިދާރާތަކާއެކު މަޝްވަރާކުރަމުންދާ ކަމަށް ކައުންސިލުން ބުންޏެވެ. އަދި ހިނގަމުންދާ ފަސްވަނަ ދައުރުގައި ހިޔާނާތާއި ކޮރަޕްޝަނަށް އެއްވެސް ޖާގައެއް ނުދީ، އިދާރީ ހިންގުން ހަރުދަނާކޮށް، ގާނޫނާއި ގަވާއިދުތައް ތަންފީޒުކުރުމާއެކު ރައްޔިތުންނަށް އެންމެ ލާބަހުރި ގޮތުގައި ހިދުމަތް ދިނުމުގައި ދެމިއޮންނާނެ ކަމުގެ ފުރިހަމަ ޔަގީންކަން ކައުންސިލުން ވަނީ ދީފައެވެ.
