ޅަފަތުގެ ތުއްތުކުދިންނަށް ދޭ ފަރުވާ ނުވަތަ ނިއޯނޭޓަލް ހިދުމަތް ފުޅާކުރުމަށްޓަކައި، ޒަމާނީ އާލާތްތައް ހޯދުމުގެ އިތުރުން އެ ދާއިރާއިން ގާބިލު މީހުން ބިނާކުރުމަކީ ކޮންމެހެން މުހިންމު ކަމެއް ކަމަށް ރައީސުލްޖުމްހޫރިއްޔާގެ އަނބިކަނބަލުން، ސާޖިދާ މުޙައްމަދު މިއަދު ވިދާޅުވެއްޖެއެވެ.
މެޑަމް ސާޖިދާ މި މޭރުމުން ވިދާޅުވީ، ޅަފަތުގެ ސިއްހީ ފަރުވާއަށް ހާއްސަކޮށްގެން ބޭއްވި ”ނިއޯކެއަރ ކޮންފަރެންސް“ އިފްތިތާހުކޮށްދެއްވައި ދެއްކެވި ވާހަކަފުޅުގައެވެ. މި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން މެޑަމް ސާޖިދާ ވިދާޅުވީ، ރާއްޖޭގައި ނިއޯނޭޓަލް ކެއަރގެ ހިދުމަތް ފެށިގެން އައިއިރު އެތައް ގޮންޖެހުންތަކަކާ ކުރިމަތިލާން ޖެހުނު ނަމަވެސް، މިއަދު މި ދާއިރާއިން ފާހަގަކޮށްލެވޭ ފަދަ ބޮޑެތި ކުރިއެރުންތަކެއް ހޯދާފައިވާ ކަމަށެވެ.
އަދި މިފަދަ ނާޒުކު ހާލަތްތަކުގައި ޑޮކްޓަރުން ނިންމަވާ ހަރުދަނާ ނިންމެވުންތަކާއި، ނަރުހުންގެ އޯގާތެރި އަޅާލުމާއެކު ލިބިދޭ ހިތްވަރަކީ ކަންބޮޑުވެފައި ތިބޭ މައިންބަފައިންނަށް ލިބޭ އެންމެ ބޮޑު ހިތްހަމަޖެހުން ކަމުގައި އެކަމަނާ ވިދާޅުވިއެވެ.
ރާއްޖޭގެ ކޮންމެ ސަރަހައްދެއްގައި އުފަންވާ ކުއްޖަކަށް ވިޔަސް، އެ ކުއްޖަކަށް ބޭނުންވާ ފުރިހަމަ ސިއްހީ ފަރުވާއާއި ރައްކާތެރިކަން ކަށަވަރުވާންޖެހޭނެކަން ފާހަގަކުރައްވަމުން މެޑަމް ސާޖިދާ ވިދާޅުވީ، އެކަން ހާސިލުކުރެވޭނީ ޒަމާނީ ސިއްހީ ވަސީލަތްތަކާއި ޓެކްނޮލޮޖީ ގާއިމުކުރުމުގެ އިތުރުން، އެ ތަކެތި ބޭނުންކުރަން ދަންނަ ތަމްރީނު ލިބިފައިވާ ސިއްހީ ހިދުމަތްތެރިން ތިބެގެން ކަމަށެވެ. އެހެންކަމުން މި ދާއިރާގެ ވަސީލަތްތައް ތަރައްގީކުރުމަށް އިންވެސްޓްކުރުމާއެކު، އިންސާނީ ވަސީލަތް ބިނާކުރުމަށް އިސްކަންދޭންޖެހޭ ކަމަށް އެކަމަނާ ވިދާޅުވިއެވެ.
މިކަމަށް އަލިއަޅުއްވާލައްވަމުން މެޑަމް ސާޖިދާ ވިދާޅުވީ، ހަމައެކަނި ޒަމާނީ ޓެކްނޮލޮޖީއަކުން ފުރާނައެއް ސަލާމަތެއް ނުކުރެވޭނެ ކަމަށެވެ. މެޝިނަކުން ތުއްތުކުއްޖާގެ ހިތުގެ ވިންދު ބަލައިދިން ނަމަވެސް، އެ ވިންދުން ބުނެދޭ ސިއްހީ މާނަ ދެނެގަންނަން އެނގޭނީ އެކަމުގެ ފުރިހަމަ ތަމްރީނު ލިބިފައިވާ ފަންނީ މީހުންނަށް ކަމަށް އެކަމަނާ ފާހަގަކުރެއްވިއެވެ.
މީގެއިތުރުން، ނިއޯނޭޓަލް ހިދުމަތް އިތުރަށް ހަރުދަނާކުރުމަށްޓަކައި މެދުކެނޑުމެއްނެތި ތަމްރީނު ދިނުމާއި، މެންޓަރޝިޕް ޕްރޮގްރާމްތަކުގެ ތެރެއިން އެކަކު އަނެކެއްގެ ތަޖުރިބާއިން ދަސްކުރުމުގެ ފުރުސަތު ފަހިކޮށްދިނުން މުހިންމު ކަމަށް ވިދާޅުވިއެވެ. އަދި މި ކޮންފަރެންސްގެ ޒަރީއާއިން އެކި ސިއްހީ މަރުކަޒުތަކުގެ ބައިވެރިންގެ މެދުގައި ބަދަލުކުރެވޭ މައުލޫމާތާއި ތަޖުރިބާތަކަކީ ގައުމީ ފެންވަރުގައި މި ހިދުމަތް ކުރިއެރުވުމަށް އެޅޭ މުހިންމު ބާރަކަށް ވެގެންދާނެ ކަމަށް އުންމީދުކުރައްވާ ކަމަށްވެސް ވިދާޅުވިއެވެ.
އެކަމަނާގެ ވާހަކަފުޅު ނިންމަވާލައްވަމުން ވަނީ، މިއަދާއި މާދަމާ މި ގައުމަށް އުފަންވާ ކޮންމެ ތުއްތު ކުއްޖަކަށް ވެސް އެންމެ ފުރިހަމަ ފަރުވާ ކަށަވަރުކޮށްދިނުމަށް އެންމެން އެކުގައި އަޒުމް ކަނޑައެޅުމަށް ގޮވާލައްވާފައެވެ. މި ރަސްމިއްޔާތުގައި މެޑަމް ސާޖިދާ ވަނީ ”ނިއޯކެއަރ އެންޑް އެންއައިސީޔޫ ނިއުސް ބުލެޓިން“ ރަސްމީކޮށް ނެރެދެއްވައިފައެވެ.
