ޕީއެންސީގެ އެކުވެރިކަމާއި ޖޯޝުގައި މަސައްކަތްކޮށްފިނަމަ 2028 ވަނަ އަހަރުގެ ރިޔާސީ އިންތިޚާބު ފަސޭހަކަމާއެކު ރައީސް ޑރ. މުޙައްމަދު މުޢިއްޒަށް ކާމިޔާބުކޮށްދެވޭނެކަމުގެ ޔަޤީންކަން އެބައޮތްކަމަށް ޕީއެންސީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
ޢަބްދުއްރަޙީމް މިހެން ވިދާޅުވީ ޕީއެންސީގެ ޤައުމީ މަޖިލިސް ނުވަތަ ކޮންގްރެސް ކާމިޔާބުކަމާއެކު ނިންމާލުން ފާހަގަކުރުމަށް ބޭއްވި ޚާއްޞަ ހަފްލާގައި ވާހަކަފުޅު ދައްކަވަމުންނެވެ. އެއީ ސިޔާސީ ޖަލްސާއެއް ނޫންކަން ފާހަގަކުރައްވައި، ކޮންގްރެސްގެ ކާމިޔާބީއަށްޓަކައި ޕާޓީގެ ރައީސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި ޕާޓީގެ އެންމެހާ މެންބަރުންނަށް އޭނާ ވަނީ ތަހުނިޔާ ދަންނަވާފައެވެ.
ޤައުމީ މަޖިލީހުގެ ކަންކަން އެންމެ ފުރިހަމައަށް އިންތިޒާމުކޮށް ނިންމާލުމުގައި ޕާޓީގެ ވިލަރެސް ކޮމިޓީންނާއި، މުވައްޒަފުންގެ އިތުރުން ސަޕޯޓަރުން ކުރި އިޚްލާޞްތެރި މަސައްކަތްތަކަށް ޢަބްދުއްރަޙީމް ވަނީ ޝުކުރެއް އަދާކުރައްވާފައެވެ. ޚާއްޞަކޮށް، ވިލަރެސް ކޮމިޓީގައި އިސްކޮށް މަސައްކަތް ކުރެއްވި ޕާޓީގެ ނައިބު ރައީސް އަދި ޕާލިމަންޓްރީ ގުރޫޕުގެ ލީޑަރު އިބްރާހީމް ފަލާޙުގެ ނަންފުޅު އޭނާ ޚާއްޞަ ގޮތެއްގައި ފާހަގަކުރެއްވިއެވެ.
މިހާތަނަށް ރާއްޖޭގައި ބޭއްވުނު އެންމެ އިންތިޒާމު ރަނގަޅު، އެންމެ ބޮޑު ކޮންގްރެސް ބޭއްވީ ޕީއެންސީންކަން ފާހަގަކުރައްވަމުން ޢަބްދުއްރަޙީމް ވިދާޅުވީ، މިއީ އެހެން އެއްވެސް ސިޔާސީ ޕާޓީއަކަށް ގޮންޖަހާލެވޭނެ ފަދަ އިވެންޓެއް ނޫން ކަމަށެވެ. އަދި މި ކޮންގްރެސްއިން ފެނިގެންދިޔައީ ދިވެހިރާއްޖޭގައި މިއަދު އޮތް އެންމެ ބޮޑު ސިޔާސީ ޕާޓީގެ ބަދަހިކަމާއި ޖޯޝު ކަމަށްވެސް އޭނާ ވިދާޅުވިއެވެ.
ދިވެހިރާއްޖެއަށް މިއަދު ބޭނުންވަނީ ރައްޔިތުންގެ އަޑުއަހައި، ރައްޔިތުންނާ މަޝްވަރާކޮށްގެން ކަންކަން ނިންމަވާނެ ވެރިއެއްކަން ފާހަގަކުރައްވަމުން، ރައީސް ޑރ. މުޙައްމަދު މުޢިއްޒަކީ އެފަދަ ވެރިއެއްކަން މި ކޮންގްރެސްއިން ސާބިތުވެގެން ގޮސްފައިވާކަމަށް ޢަބްދުއްރަޙީމް ވިދާޅުވިއެވެ. އަދި ޤައުމުގައި އޮންނަންޖެހެނީ ބިނާކުރަނިވި، ޤައުމީ ފިކުރުގެ ވެރިކަމެއް ކަމަށާއި، އެ ފިކުރު މިއަދު އޮތީ ރައީސް މުޢިއްޒާއެކުގައި ކަމަށްވެސް ވިދާޅުވިއެވެ.
2026 ވަނަ އަހަރުގެ ކޮންގްރެސް ޕާޓީގެ މަތީ މަޖިލިސް ކާމިޔާބުކަމާއެކު ނިންމާލުމުގެ އުފާ ފާޅުކުރުމަށާއި، އިންތިޒާމުތަކުގައި ބައިވެރިވި އެންމެހައި ފަރާތްތަކުގެ އަގުވަޒަންކުރުމުގެ ގޮތުން ބޭއްވި ޚާއްޞަ ހަފްލާގެ ތެރެއިން.#Congress2026
#DhiveheengeRaajje
#CongressPartyMV pic.twitter.com/JnST510i7P— PNC Secretariat (@pnc_secretariat) September 20, 2026
ވާހަކަފުޅު ނިންމަވާލައްވަމުން ޢަބްދުއްރަޙީމް ވަނީ، އެއްވެސް މެންބަރަކު އެންމެ އިންޗިއެއްވެސް ފަހަތަށް ޖެހިވަޑައިނުގެން، މި އުފެދުނު ރޫޙާއި ޖޯޝުގައި އެއް އަޒުމެއްގައި ނުކުމެ، 2028 ވަނަ އަހަރުގެ ރިޔާސީ އިންތިޚާބު ރައީސް ޑރ. މުޙައްމަދު މުޢިއްޒަށް ބޮޑުތަނުން ކާމިޔާބުކޮށްދިނުމަށްޓަކައި ހުރިހާ މެންބަރުން ގުޅިގެން މަސައްކަތް ކުރުމަށް ގޮވާލައްވާފައެވެ.
