ޗުއްޓީއަށް ނުވަތަ އެކި ބޭނުންތަކުގައި ގައުމުން ބޭރަށް ދާއިރު ބޯޑިން ޕާހާއި ޓިކެޓުގެ ފޮޓޯ ނަގައި މީސްމީޑިއާއަށް ދޫކޮށްލުމަކީ ގިނަ ބައެއްގެ އާދައަކަށް ވެފައިވީ ނަމަވެސް، މިއީ އަމިއްލަ ސައިބާ ސަލާމަތާއި ރައްކާތެރިކަން ބޮޑު ނުރައްކަލެއްގެ ތެރެއަށް ހުށަހެޅިގެންދާ ކަމެއް ކަމަށް ސައިބާ ސެކިއުރިޓީ މާހިރުން އިންޒާރު ކުރައްވައިފިއެވެ.
ދަތުރުވެރިންގެ ރައްކާތެރިކަމަށްޓަކައި މީސްމީޑިއާގައި ބޯޑިން ޕާސްގެ ފޮޓޯ އާންމުކުރުން ހުއްޓާލުމަށް މާހިރުން އިލްތިމާސްކުރައްވަނީ، އެ ފޮޓޯތަކުގައި ހުންނަ ބާކޯޑުތަކާއި ބުކިން ކޯޑުތައް ބޭނުންކޮށްގެން ކުށްވެރިންނަށް އެ މީހެއްގެ ދަތުރުގެ މައުލޫމާތުތަކަށް ނުފޫޒު ފޯރުވުމުގެ ފުރުސަތު އޮންނާތީއެވެ.
ސައިބާ މާހިރުން ފާހަގަކުރާ ގޮތުގައި، ބޯޑިން ޕާހުގައިވާ ކޯޑުތައް ބޭނުންކޮށްގެން އެމީހެއްގެ ފްލައިޓް އައިޓިނަރަރީއާއި ހޮޓެލް ބުކިންތަކުގެ މައުލޫމާތު ހޯދައި، އެ ބުކިންތަކަށް ބަދަލުތައް ގެނައުމާއި، ބުކިން ކެންސަލްކުރުން ނުވަތަ އަތުލައިގަތުން ފަދަ ނުރައްކާތެރި އަމަލުތައް ހިންގުމުގެ މަގު ފަހިވެގެންދެއެވެ.
ބޯޑިން ޕާސްތަކުގައި ހުންނަ 2ޑީ ބާކޯޑުތަކާއި 6 އަކުރުގެ ޕީއެންއާރު (PNR) ކޯޑަކީ ހަމައެކަނި ދަތުރުކުރާ ތާރީޚާއި ވަގުތު އެނގޭ އެއްޗެއް ނޫނެވެ. އޭގެ ތެރޭގައި ދަތުރުވެރިޔާގެ ފުރިހަމަ ނަމާއި، ޓިކެޓު ނަންބަރާއި، ފްރީކުއެންޓް ފްލަޔާ ނަންބަރުގެ އިތުރުން އަމިއްލަ އެކި މައުލޫމާތުތައް ރައްކާކުރެވިފައި ހުރެއެވެ. އިންޓަނެޓުން ފަސޭހައިން ލިބޭ ބާކޯޑު ރީޑަރުތައް ބޭނުންކޮށްގެން ކުށްވެރިންނަށް މި މައުލޫމާތުތައް ވަގުތުން ނެގެއެވެ.
މިފަދަ މައުލޫމާތުތައް ނާޖާއިޒު ގޮތުގައި ބޭނުންކޮށްގެން އެއާލައިން އެކައުންޓްތައް ހެކްކުރުމާއި، މޭލްސް/ޕޮއިންޓްސް ވަގަށް ނެގުމުގެ އިތުރުން ދަތުރުވެރިޔާގެ ނަމުގައި އެހެން ކުށްތައް ކުރުމުގެ ފުރުސަތުވެސް އޮވެއެވެ. އެހެންކަމުން ދަތުރުގެ އުފާވެރިކަން ހިއްސާކުރަން ބޭނުންވި ނަމަވެސް، ބޯޑިން ޕާހާއި ޓިކެޓުގެ ބާކޯޑާއި މައުލޫމާތު އެނގޭ ފޮޓޯ މީސްމީޑިއާގައި ނުޖެހުމަށާއި، ފޮޓޯއެއް ހިއްސާކުރާނަމަ އެފަދަ މައުލޫމާތުތައް ފޮރުވައި ނުވަތަ ބްލަރ ކުރުމަށް ސެކިއުރިޓީ މާހިރުން އިރުޝާދު ދެއްވައެވެ.
