މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ކުރީގެ މެނޭޖިން ޑިރެކްޓަރު މުހައްމަދު ޖުނައިދާއި، އެ ކުންފުނީގެ ޕްރޮކިއުމެންޓް ޑިޕާޓްމެންޓުގެ ހެޑްގެ މަގާމުގައި އޭރު ހުރި އަބްދުލްވައްހާބުގެ މައްޗަށް ކޮރަޕްޝަނުގެ ދައުވާކޮށްދިނުމަށް އެންޓި-ކޮރަޕްޝަން ކޮމިޝަން (އޭސީސީ) އިން ޕްރޮސެކިއުޓާ ޖެނެރަލްގެ އޮފީހުގައި އެދިއްޖެއެވެ.
އޭސީސީން ނެރުނު ބަޔާނެއްގައި ބުނެފައިވާ ގޮތުގައި މި މައްސަލައަކީ 2016 ވަނަ އަހަރާއި 2017 ވަނަ އަހަރާ ދެމެދު އެމްޕީއެލްއަށް 18 އެއާކޮންޑިޝަން ޔުނިޓު ގަތުމުގެ މުއާމަލާތާ ގުޅިގެން ހުށަހެޅުނު މައްސަލައެކެވެ.
އެ ކޮމިޝަނުން ހާމަކުރި ގޮތުގައި މި އޭސީތައް ގަތުމުގައި ކުންފުނީގެ ސްޓްރެޓެޖީއާއި ގަވާއިދާ ހިލާފަށް އަމަލުކޮށްފައިވެއެވެ. އެގޮތުން އެތަކެތި ގަނެފައިވަނީ އާންމުކޮށް އިއުލާނުކުރުމެއް ނެތި އަދި ކުންފުނީގެ ޑިރެކްޓަރުންގެ ބޯޑުގެ ނިންމުމެއް ސާފުކުރުމެއް ނެތިއެވެ.
މީގެއިތުރުން، އޭސީތައް ގަނެފައިވަނީ ތުހުމަތުކުރެވޭ ފަރާތްތަކާ ގުޅުން އޮތް އަމަލީ ވިޔަފާރިއަކުން، މާކެޓުގައި އެތަކެތި ލިބެންހުރި އަގަށްވުރެ އެތައް ގުނައެއް ބޮޑު އަގުގައެވެ.
މި 18 އޭސީ ޔުނިޓު ގަތުމަށްޓަކައި އެމްޕީއެލްއިން ޖުމްލަ 1,083,998.00 (އެއް މިލިއަން އަށްޑިހަ ތިންހާސް ނުވަސަތޭކަ ނުވަދިހަ އަށެއް) ރުފިޔާ ހަރަދުކޮށްފައިވާ ކަމަށް އޭސީސީގެ ތަހުގީގަށް ވަނީ އެނގިފައެވެ.
މި މައްސަލާގައި ދައުވާކޮށްދިނުމަށް އެދި އޭސީސީން ޕީޖީ އޮފީހަށް މައްސަލަ ހުށަހަޅާފައިވަނީ ހިނގަމުންދާ ސެޕްޓެމްބަރު މަހުގެ 16 ވަނަ ދުވަހުއެވެ.
އޭސީސީން އެދިފައިވަނީ މުއްތަހަމުންގެ މައްޗަށް ރަސްމީ ހައިސިއްޔަތު ނުވަތަ އެ ހައިސިއްޔަތުގެ ނުފޫޒު ނަހަމަގޮތުގައި ބޭނުންކޮށްގެން ނާޖައިޒު މަންފާއެއް ހޯދައިދިނުމުގެ ކުށުގެ ދައުވާއާއި، ދައުލަތަށް ފައިދާއެއް ލިބެން އޮތް ކަމެއްގައި އެނޫން ގޮތަކަށް އަމަލުކުރުމުގެ ކުށުގެ ދައުވާ އުފުލައިދިނުމަށެވެ.
