ޣައްޒާގައި އިޒްރޭލުގެ އިސްިތިއުމާރީ ވެރިކަމުން ހިންގަމުންދާ ޤަތުލުޢާއްމާ ދެކޮޅަށް އަޑުއުފުލާ އިޒްރޭލުގެ ރައްޔިތުންނާ ދެކޮޅަށް ހަރުކަށި ފިޔަވަޅުތަކެއް އެޅުމުގެ ގޮތުން، އިޒްރޭލުގެ އަސްކަރިއްޔާ (އައި.ޑީ.އެފް) އަށް ފާޑުކިޔާ މީހުންގެ ރައްޔިތުކަން ކަނޑާލެވޭ ފަދަ ޤާނޫނެއް ގެނައުމަށް ބޮޑުވަޒީރު ބެންޖަމިން ނަތަންޔާހޫ ގޮވާލައިފިއެވެ.
މި އިންޒާރު ދީފައިމިވަނީ، ޣައްޒާގައި ހަނގުރާމައިގެ ޖަރީމާ ހިންގައި ޢާންމުން މެރުމަށް އިޒްރޭލުން އާޓިފިޝަލް އިންޓެލިޖެންސް (އޭއައި) ބޭނުންކުރާ ގޮތް ފަޅާއަރުވާލައި ތައްޔާރުކޮށްފައިވާ ޑޮކިއުމެންޓަރީ ފިލްމު ’ނާޒާ’ގެ ޑައިރެކްޓަރުން ކަމަށްވާ ޔުވަލް އަބްރަހަމް އަދި ރޭޗަލް ޒޯރ އަށް އަމާޒުކޮށްގެންނެވެ. މި ފިލްމަށް ދާދިފަހުން ވެނިސް ފިލްމު ފެސްޓިވަލްގައި ވަނީ ޚާއްޞަ އެވޯޑެއްވެސް ލިބިފައެވެ.
އެކްސްގައި ޢާންމުކުރި ވީޑިއޯއެއްގައި ނަތަންޔާހޫ ބުނެފައިވަނީ، އައި.ޑީ.އެފްގެ ސިފައިންގެ އަގުވައްޓާލާ މީހުންގެ ”ޖީބަށާއި ރައްޔިތުކަމަށް“ ޙަމަލާދޭނެ ކަމަށާއި، އެފަދަ މީހުންނަށް އިޒްރޭލުގައި ޖާގައެއް ނެތް ކަމަށެވެ. އަދި އަބުރުގެ ދަޢުވާތަކުގައި ނަގައިދޭ ޖޫރިމަނާ 20 ގުނަ ބޮޑުކުރުމަށްވެސް އޭނާ ވަނީ ގޮވާލާފައެވެ.
އިޒްރޭލުގެ ކަލްޗަރ މިނިސްޓަރު މިކީ ޒޯހަރ ވަނީ، މި ދެ ޑައިރެކްޓަރުންނަކީ ޤައުމަށް ޣައްދާރުވެފައިވާ ބައެއް ކަމަށް ކަނޑައަޅައި، އެމީހުންގެ ރައްޔިތުކަން ކަނޑާލުމަށް އިމިގްރޭޝަނަށް ރަސްމީކޮށް އަންގާފައެވެ. އަދި ފިލްމަށް މަޢުލޫމާތުދިން މީހުން ހޯދުމަށް ޖާސޫސީ އިދާރާ (ޝިން ބެޓް) އަށްވެސް ވަނީ ގޮވާލާފައެވެ.
’ނާޒާ‘ އަކީ އިޒްރޭލުގެ އަސްކަރިއްޔާއިން ”ކޮލެޓަރަލް ޑެމޭޖް“ އަށް ކިޔާ ނަމެކެވެ. މި ފިލްމުގައި އިޒްރޭލުގެ ޖާސޫސީ އިދާރާގެ 24 އޮފިސަރަކު ދީފައިވާ މަޢުލޫމާތުތަކަށް ބަލާއިރު، ޣައްޒާގައި އެތައް ހާސް ބަޔަކު މަރުވަމުންދަނީ އޮޅުމަކުން ނޫން ކަމަށާއި، އެއީ އޭއައި ބޭނުންކޮށްގެން ގަސްތުގައި ރާވައިގެން ހިންގާ ޤަތުލުޢާއްމެއްކަން ވަނީ ސާބިތުކޮށްދީފައެވެ.
އޮކްޓޯބަރު 2023 އިން ފެށިގެން އިޒްރޭލުން ވަނީ ޣައްޒާގެ 73,000 އަށްވުރެ ގިނަ މީހުން ޝަހީދުކޮށްލާފައެވެ. މީގެ ތެރޭގައި 21,000 ކުޑަކުދިން ހިމެނެއެވެ. ނަމަވެސް އިޒްރޭލުން ބުނަމުންދަނީ އެމީހުން ޙަރަކާތްތެރިވަނީ ބައިނަލްއަޤްވާމީ ޤާނޫނުތަކާ އެއްގޮތަށް ކަމަށެވެ.
ނަތަންޔާހޫ އަބަދުވެސް އިޒްރޭލަކީ މެދުއިރުމަތީގެ ”އެންމެ ފުރިހަމަ ޑިމޮކްރެސީ“ ކަމަށް ބުނަމުންދިޔަ ނަމަވެސް، ޙަޤީޤަތް ހާމަކުރާ އަމިއްލަ ރައްޔިތުންނާ މެދު ކަންތައްކުރާ ގޮތުން އެކަން ވަނީ ދޮގުވެފައެވެ. ފިލްމުގެ ޑައިރެކްޓަރުންގެ ޢާއިލާތައް ދިރިއުޅޭ ގޭގެ ކައިރިއަށް އެއްވެ، އެމީހުންނަށް މަރުގެ އަދަބު ދިނުމަށް ގޮވާލައި ހައްދުފަހަނައަޅާފައިވާ ޔަހޫދީން ދަނީ މުޒާހަރާކުރަމުންނެވެ.
