ކުރީގެ ސަރުކާރުތަކުން އެކި ފަރާތްތަކުން ނަގާފައިވާ ބޮޑެތި ދަރަނިތަކުގެ ތެރެއިން މިހާތަނަށް 1.3 ބިލިޔަން ޑޮލަރު މި ސަރުކާރުން ދައްކައި ޚަލާސްކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ވެރިކަން ކުރާ ޕީއެންސީގެ މަތީ މަޖިލީހުގެ ނިންމުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ވަނީ ޤައުމުގެ އިޤްތިޞާދު މިފަދަ ބޮޑެތި ދަރަނިތަކުން ސަލާމަތްކުރުމަށް ސަރުކާރުން ގެންގުޅުއްވާ ޚާއްޞަ ސިޔާސަތުތަކުގެ މައްޗަށް އަލިއަޅުއްވާލައްވާފައެވެ.
މިގޮތުން ދަރަނި ދެއްކުމުގެ ތެރެއިން ކުރީގެ ސަރުކާރުން އިންޑިއާއިން ނަގާފައިވާ 150 މިލިޔަން ޑޮލަރުގެ ލޯނުވެސް މިހާރު މުޅިން ދައްކައި ނިންމާފައިވާކަން އެމަނިކުފާނު ފާހަގަކުރެއްވިއެވެ.
މިއީ ދަރަނީގެ ނުރައްކަލުން ޤައުމު މިންޖުކޮށް، ސަރުކާރުގެ މުހިންމު ހަރުމުދާތައް ރަހުނުން މިނިވަންކުރުމަށް އެޅުނު ވަރަށް މުހިންމު ފިޔަވަޅެއް ކަމަށްވެސް ރައީސް ވިދާޅުވިއެވެ.
