ގައުމު ބިނާކުރުމުގެ މައިގަނޑު އަސާސަކީ އިންސާނީ ވަސީލަތްތައް އަޚްލާޤީ މިންގަނޑުތަކުގެ މަތީގައި ހަރުދަނާކުރުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އަޙްލާޤީ ގޮތުން ޤައުމު ބިނާނުކޮށް ކިތަންމެ ގިނަ ބުރިޖުތަކާއި އިމާރާތްތައް އެޅި ކަމުގައިވިޔަސް އެއީ އެއްވެސް މާނައެއް ހުރި ކަމެއް ނޫން ކަމަށް އެމަނިކުފާނު ވިދާޅުވީ ޕީއެންސީގެ މަތީ މަޖިލީހުގެ ނިންމުމަށް ސޯޝަލް ސެންޓަރުގައި ބޭއްވި ޚާއްޞަ ޖަލްސާގައި ވާހަކަފުޅު ދައްކަވަމުންނެވެ.
ޤައުމީ ފިކުރަކީ އެންމެ ފުރަތަމަ ޤައުމު އިސްކުރުން ކަމަށާއި މާޒީގައި މި ޤައުމު ދިރުވައިދިނީ އަމިއްލަ މަޞްލަޙަތަށްވުރެ ޤައުމުގެ މަޞްލަޙަތު އިސްކޮށްގެން ކަމަށް ރައީސް ފާހަގަކުރެއްވިއެވެ. ހުރިހާ ކަމެއްގެވެސް ބިންގަލަކީ އިސްލާމްދީން ކަމަށްވާތީ، ވެރިކަމާ ހަވާލުވެވަޑައިގެންނެވި ދުވަހުން ފެށިގެންވެސް އެންމެ އިސްކަމެއް ދެއްވީ ބަޝަރީ ގޮތުން އިންސާނުން ބިނާކުރުމަށް ކަމަށް އެމަނިކުފާނު ވިދާޅުވިއެވެ.
ވޭਤުވެދިޔަ އަހަރުތަކުގެ ތެރޭގައި ސިޔާސީ އެކި އޮއިވަރުތަކުގެ ސަބަބުން މުޖުތަމަޢުގެ އިޖުތިމާޢީ ފޭރާމާއި އަޚްލާޤީ ބިންގާ ގެއްލިފައިވާ ކަމަށާއި، އެކަންކަން ރަނގަޅުކޮށް އިސްލާމީ ރީތި އުސޫލުތައް އާލާކުރަންޖެހޭ ކަމަށް ރައީސް ވިދާޅުވިއެވެ. އަދި ދިވެހިންގެ ކިބައިގައި ކުރިން ހުރި އެކަކު އަނެކަކަށް އަޅައިލުމާއި އިޙްތިރާމްކުރުމުގެ ރީތި އާދަތައް އަލުން އާލާކުރުމަށްޓަކައި ޚާއްޞަ ޤައުމީ މަޝްރޫޢެއް ފަށައިގެން ކުރިއަށްދާކަން އެމަނިކުފާނު ފާހަގަކުރެއްވިއެވެ.
ސިޔާސީ ފިކުރު ކޮންމེއްހާ ތަފާތުވި ނަމަވެސް ޤައުމީ މަޞްލަޙަތު ކުރިއަށް ނެރުމަށާއި، ޚަބަރު ފަތުރާ ވަސީލަތްތަކާއި އަމިއްލަ ފަރުދުންވެސް ޒިންމާދާރުކަމާއެކު ޙަޤީޤަތް ބަލައިގެން ކަންކަން ހާމަކުރުމަށް ރައީސް ވަނީ އިލްތިމާސްކުރައްވާފައެވެ.
