ޕީއެންސީގެ ކޮންގްރެސްގެ ނިންމުމަކާއެކު، އެއްވެސް ޕްރައިމަރީއަކާ ނުլައި ރައީސް ޑރ. މުޙައްމަދު މުއިއްޒަށް 2028ގެ ރިޔާސީ އިންތިޚާބުގެ ޓިކެޓު ރޭ ރަސްމީކޮށް އަރުވައިފިއެވެ.
ސޯޝަލް ސެންޓަރުގައި ބޭއްވި މި ޚާއްޞަ ޖަލްސާގައި މި ޓިކެޓު އެމަނިކުފާނާ ހަވާލުކޮށްފައިވަނީ ކޮންގްރެސްގެ ބައިވެރިންގެ އިއްތިފާގުން ފާސްކުރެވުނު ޚާއްޞަ ޤަރާރަކަށެވެ.
ވެރިކަން ކުރާ މައި ޕާޓީގެ އަސާސީ ގަވާއިދުގައިވާ ގޮތުން، ރައީސުލްޖުމްހޫރިއްޔާކަމުގެ މަޤާމުގައި ހުންނެވި ބޭފުޅަކު ދެވަނަ ދައުރަކަށް ކުރިމަތިލައްވަން ބޭނުންވެއްޖެނަމަ، ޕާޓީގެ މަޖިލީހަށް ހުށަހަޅައިގެން ޕްރައިމަރީއަކާ ނުލައި ޓިކެޓު ދިނުމުގެ ފުރުޞަތު އޮވެއެވެ. މިގޮތުން ހުށަހެޅުނު ޤަރާރު ފާސްކޮށްފައިވަނީ އިއްޔެ ބޭއްވި ވޯޓުގައި ބައިވެރިވި 1،119 މެންބަރުންގެ ޢިއްތިފާޤުންނެވެ.
ޤައުމުގެ މިނިވަންކަމާއި އިޤްތިޞާދީ އަދި އިޖުތިމާޢީ ދުޅަހެޔޮކަމަށްޓަކައި ރައީސް މުޢިއްޒު ކޮށްދެއްވަމުން ގެންދަވާ އަގުހުރި މަސައްކަތްޕުޅުތަކުގެ އަގުވަޒަންކުރުމުގެ ގޮތުން މިފަދައިން ނިންމާފައިވާއިރު، މިހާތަނަށް މި ޓިކެޓަށް އެއްވެސް އެހެން ބޭފުޅަކު ޝައުޤުވެރިކަން ފާޅުކުރައްވާފައެއް ނުވެއެވެ. ޕީއެންސީއަކީ މިވަގުތު ރާއްޖޭގެ އެންމެ ބޮޑު ސިޔާސީ ޕާޓީ ކަމަށްވާއިރު، ކުރިއަށް އޮތް އިންތިޚާބު ވަރަށް ފަސޭހައިން ކާމިޔާބުކުރެވޭނެ ކަމަށް ޕާޓީގެ އިސްވެރިން އަންނަނީ ވިދާޅުވަމުންނެވެ.
މި އިންތިޚާބަށް އިދިކޮޅު ފަރާތްތަކުންވެސް ތައްޔާރުވަމުންދާކަން ފާހަގަކޮށްލެވެއެވެ. އެގޮތުން ކުރީގެ ރައީސް ޢަބްދުﷲ ޔާމީން މި ސަރުކާރާ ދެކޮޅަށް އާ ޕާޓީއެއް އުފައްދަވައި، އިންތިޚާބުގައި ވާދަކުރައްވާނެކަން ވަނީ އިޢުލާނުކުރައްވާފައެވެ. މީގެއިތުރުން އިދިކޮޅު މައި ޕާޓީ ކަމަށްވާ އެމްޑީޕީގެ އިސް ބޭފުޅުން ކަމަށްވާ ކުރީގެ ރައީސް އިބްރާހީމް މުޙައްމަދު ޞާލިޙާއި، ކުރީގެ ފޮރިން މިނިސްޓަރު ޢަބްދުﷲ ޝާހިދުގެ އިތުރުން ކުރީގެ އިކޮނޮމިކް މިނިސްޓަރު ފައްޔާޒު އިސްމާޢީލާއި، ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަޙުމަދު ޝަމްހީދު ވެސް ވަނީ ރިޔާސީ ރޭހަށް ނުކުންނަވާނެކަން ހާމަކުރައްވާފައެވެ.
