ދިވެހިރާއްޖެއަކީ އިސްލާމީ، މިނިވަން ދައުލަތެއްގެ ގޮތުގައި ބިނާކުރެވޭނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަދަ ހިންގުންތެރި، ގާބިލު ލީޑަރަކަށް ކަމަށް ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ނައިބު ރައީސް މި މޭރުމުން ވިދާޅުވީ، ވެރިކަން ކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މަތީ މަޖިލީހުގެ ހާއްސަ ބައްދަލުވުމުގައި ވާހަކަފުޅު ދައްކަވަމުންނެވެ. މި ބައްދަލުވުމުގައި ވަނީ 2028 ވަނަ އަހަރު ބާއްވާ ރިޔާސީ އިންތިހާބުގެ ޕީއެންސީ ޓިކެޓު، އެތެރޭގެ ޕްރައިމަރީއަކާ ނުލައި ރައީސް މުޢިއްޒަށް އެރުވުމަށް ފާސްކޮށްފައެވެ. މި ނިންމުން ފާސްވެގެންދިޔައީ ޖަލްސާގައި ބައިވެރިވެވަޑައިގެންނެވި 1,119 މެންބަރުންގެ އިއްތިފާގުންނެވެ.
މިކަމާ ގުޅޭގޮތުން ހުށަހެޅުނު ގަރާރަށް ތާއީދުކުރައްވައި ވާހަކަފުޅު ދައްކަވަމުން ނައިބު ރައީސް ވިދާޅުވީ، ރައީސް މުޢިއްޒަށް ރިޔާސީ ޓިކެޓު އެރުވުމަށް ތާއީދުކުރައްވަނީ، ގައުމުގެ ހަމަޖެހުމާއި ތަރައްގީ އަދި ސަލާމަތާއި ރައްކާތެރިކަން ދެމެހެއްޓެވުމަށް އެމަނިކުފާނު ކުރައްވާ އިހުލާސްތެރި މަސައްކަތްޕުޅުތަކުގެ ސަބަބުން ކަމަށެވެ. މީގެއިތުރުން، ދިވެހިރާއްޖެއަކީ އިސްލާމީ ހިދާޔަތުގައި ދެމިއޮތް ގައުމެއްކަން ޔަގީންކުރައްވައި، އެ މަތިވެރި ބިންގަލުގެ މަތީގައި ޒުވާން ޖީލު ބިނާކުރުމަށް އެމަނިކުފާނު ފައްޓަވާފައިވާ ހަރުދަނާ މަސައްކަތްޕުޅުތައް ވެސް އެމަނިކުފާނު ފާހަގަކުރެއްވިއެވެ.
”މިގައުމުގައި ހަމަޖެހުން، ތަރައްގީއާއި ރައްކާތެރިކަން އަޅުގަނޑުމެންނަށް ކަށަވަރު ކުރެވޭނީ، މި ގައުމުގެ މިނިވަންކަމާ އެކީގައި ދައުލަތެއް ކުރިއަށްދެވޭނީ ވެސް، އަޅުގަނޑުމެންނަށް މި ފަސްގަނޑުގައި މިގޮތަށް ވާހަކަ ދައްކަން ފުރުސަތު ވެސް ލިބޭނީ، ރާއްޖޭގެ މިނިވަންކަން ކަށަވަރުކޮށްދެވިފައި އޮތްކަން، އެމަނިކުފާނަށް އެނގިވަޑައިގެން އެކަމަށް އެމަނިކުފާނު ކެރިވަޑައިގެން މަސައްކަތްޕުޅު ކުރައްވަން ފެއްޓެވީތީ.“ – ނައިބު ރައީސް ވިދާޅުވިއެވެ.
ނައިބު ރައީސް އިތުރަށް ވިދާޅުވީ، ދިވެހިންގެ މުއްސަނދި ސަގާފަތާއި ގައުމީ އާދަކާދަތަކަށް އިސްކަންދެއްވައި، ގައުމިއްޔަތު އާލާކުރުމަށް ރައީސް މުޢިއްޒު ކުރައްވާ މަސައްކަތްޕުޅަކީ އެމަނިކުފާނަށް ދެވަނަ ދައުރެއް ހައްގުވާ މުހިންމު ސަބަބެއް ކަމުގައެވެ. އަދި ގައުމީ ތަރައްގީގެ ބިންގަލަކީ އިސްލާމީ ހިދާޔަތާއި ގައުމިއްޔަތު ކަމަށްވާއިރު، ގައުމު ބިނާކުރުމުގެ ލީޑަރޝިޕް ނެންގެވުމަށް އެންމެ އެކަށޭނަ ބޭފުޅަކީ ރައީސް މުޢިއްޒުކަން ޕީއެންސީގެ މަތީ މަޖިލީހުން އިއްތިފާގުވާ ކަމަށްވެސް ވިދާޅުވިއެވެ.
މި ގަރާރުގެ ބަހުސްގައި ބައިވެރިވެވަޑައިގެންނެވި މެންބަރުން ވެސް ވަނީ، ގައުމުގެ ކުރިމަގަށްޓަކައި ރައީސް މުޢިއްޒަށް ދެވަނަ ދައުރެއް ދިނުމަކީ ކޮންމެހެން މުހިންމު ކަމެއްކަން ފާހަގަކުރައްވައިފައެވެ. އަދި ސަރުކާރުގެ މެނިފެސްޓޯގައިވާ ވައުދުތައް ފުރިހަމައަށް ހާސިލުކުރުމަށްޓަކައި އެމަނިކުފާނަށް ދެވަނަ ދައުރެއް ލިބިވަޑައިގަތުން މުހިންމު ކަމުގައި މެންބަރުން ވިދާޅުވިއެވެ. ޕީއެންސީގެ އަސާސީ ގަވާއިދު ބަޔާންކުރާ ގޮތުން، ވެރިކަމުގެ ފުރަތަމަ ދައުރު ފުރިހަމަކުރައްވަމުން ގެންދަވާ ޕާޓީގެ ރައީސަށް، ޕްރައިމަރީއަކާ ނުލައި ރިޔާސީ ޓިކެޓް އެރުވުމުގެ އިހުތިޔާރު މަތީ މަޖިލީހަށް ލިބިގެންވެއެވެ. މި ނިންމުމާއެކު، 2028 ވަނަ އަހަރުގެ ރިޔާސީ އިންތިހާބުގައި ޕީއެންސީގެ ފަރާތުން ވާދަކުރައްވާނެ ކެންޑިޑޭޓަކީ ރައީސް މުޢިއްޒެވެ.
