ޗައިނާގެ ވިޔަފާރިވެރިއެއް ކަމަށްވާ އުމުރުން 53 އަހަރުގެ ޗެން ޖިންވެއި، 33 އަހަރު ދުވަހުގެ ތެރޭގައި 1.5 މިލިއަން އެމެރިކާ ޑޮލަރު ހޭދަކޮށްގެން ދުނިޔޭގެ 233 ގައުމަކާއި ސަރަހައްދަކަށް ދަތުރުކޮށް ރެކޯޑެއް ހަދައިފިއެވެ.

Ads by

މިމަހު އޭނާގެ އުފަންރަށް ކަމަށްވާ ޒެޖިއާންގް ޕްރޮވިންސަށް އެނބުރި ގޮސްފައިވާއިރު، ސައުތު ޗައިނާ މޯނިންގް ޕޯސްޓުން ރިޕޯޓުކޮށްފައިވާ ގޮތުގައި އޭނާ މިހާރު ހިމެނެނީ ޗައިނާގައި މިފަދަ ކާމިޔާބީއެއް ހާސިލުކޮށްފައިވާ ގާތްގަނޑަކަށް 70 މީހުންގެ ތެރޭގައެވެ.

ޔަންގްޒީ އީވްނިންގް ނިއުސް އިން ބުނެފައިވާ ގޮތުގައި އޭނާގެ މި ދަތުރުތައް ފެށުނީ 1993 ވަނަ އަހަރު ސިންގަޕޫރާއި، މެލޭޝިއާ އަދި ތައިލެންޑަށް ކުރި ދަތުރަކުންނެވެ. އެ ދުވަސްވަރަކީ އިންޓަނެޓް އެހާ އާންމު ދުވަސްވަރަކަށް ނުވުމާއެކު، އޭނާ ބޭނުންވީ ފޮތްތަކުން ކިޔުމުގެ ބަދަލުގައި އަމިއްލަ ލޮލުން ދުނިޔޭގެ ކަންކަން ދެކެލުމަށެވެ.

މި ފުރަތަމަ ދަތުރުން ލިބުނު ހިތްވަރާއެކު، އުމުރުން 50 އަހަރުވުމުގެ ކުރިން ދުނިޔޭގެ ހުރިހާ ގައުމަކަށާއި ސަރަހައްދަކަށް އަދި ދުނިޔޭގެ ދެ ތަނޑިއަށް ދަތުރުކޮށް، ޗައިނާގެ އެންމެ ޒުވާން ގްލޯބަލް ޓްރެވަލަރަށް ވުމަށް އޭނާ އަޒުމް ކަނޑައެޅިއެވެ. މީގެ ތެރޭގައި އދ. ގެ 193 ގައުމުގެ އިތުރުން ދުނިޔޭގައިވާ ހުރިހާ ޑިޕެންޑެންޓް ސަރަހައްދުތައް ވެސް ހިމެނެއެވެ.

މި އަމާޒަށް ވާސިލުވުމަށްޓަކައި އޭނާ ނިންމީ ވިސާ ހޯދަން އުނދަގޫ އަދި މޫސުން ގޯސް، އެންމެ ދާން އުނދަގޫ ތަންތަނަށް ފުރަތަމަ ދިއުމަށެވެ. އެގޮތުން އެންޓާޓިކާއަށް ދިއުމަށް އޭނާ ދެ ފަހަރެއްގެ މަތިން މަސައްކަތްކުރަން ޖެހުނެވެ. ނޮވެމްބަރު 2015 ގައި ފްރާންސްގެ އެކްސްޕެޑިޝަން ބޯޓެއް ކަމަށްވާ ’ލެ ބޮރިއާލް‘ ގައި ކުރި ފުރަތަމަ ދަތުރުގައި ކަރަންޓް ޝޯޓެއްވެ އަލިފާނުގެ ހާދިސާއެއް ހިނގުމުން، ސަލާމަތްކުރެވެންދެން 10 ގަޑިއިރު ވަންދެން ކަނޑުމަތީގައި ހާލުގައި ޖެހިފައި އޮންނަން ޖެހުނެވެ. ނަމަވެސް ހިތްވަރު އެލުވާނުލައި، އޭގެ އެއްމަސް ފަހުން ޖެނުއަރީ 2016 ގައި އޭނާ ވަނީ ކާމިޔާބުކަމާއެކު އެންޓާޓިކާއަށް ގޮސްފައެވެ.

އޭނާއަށް އެންމެ ބޮޑު ގޮންޖެހުމަކާ ކުރިމަތިވީ ނިއުޒީލެންޑުގެ ދުރު ރަށެއް ކަމަށްވާ ޓޮކެލާއު އަށް ދިއުމަށެވެ. ވަރަށް ފުރިހަމައަށް ތައްޔާރުވެގެން 2019 ވަނަ އަހަރު ކުރަން އުޅުނު މި ދަތުރު، ކުއްލި ސިއްހީ މައްސަލައަކާ ގުޅިގެން އެންމެ ފަހު ވަގުތު ކެންސަލްކުރަން ޖެހުނެވެ. އެ ރަށަށް ދެވޭގޮތްވީ އޭގެ ހަތް އަހަރު ފަހުންނެވެ.

މީގެ އިތުރުން، އެފްރިކާއިން މެލޭރިއާ ޖެހުމާއި ގްރީސްގައި އައި ބިންހެލުމަކުންވެސް އޭނާ ވަނީ ސަލާމަތްވެފައެވެ. އޭނާ ބުނެފައިވާ ގޮތުގައި ކާރިސާއަކާ ކުރިމަތިވާއިރު އެންމެ ފުރަތަމަ ކުރަންޖެހޭ ކަމަކީ ހާސްނުވެ، ހަގީގަތް ގަބޫލުކޮށް، ހައްލެއް ހޯދުމެވެ.

ޗެން ދެކޭގޮތުގައި ދަތުރުކުރުމަކީ ހަމައެކަނި މަޝްހޫރު ތަންތަނަށް ގޮސް ފޮޓޯ ނެގުމެއް ނޫނެވެ. އޭނާ މަސައްކަތްކުރީ ކޮންމެ ތަނެއްގައިވެސް ވީހާވެސް ގިނަ ދުވަހަކު މަޑުކޮށް، އެތަނެއްގެ ސަގާފަތް ދަސްކުރުމަށެވެ.

މެއި 2023 ގައި ބައިޑޫ އިން ރިޕޯޓުކޮށްފައިވާ ގޮތުގައި އޭނާއަށް ވަނީ ޗައިނާގެ 10 ވަނަ ”ކޮންޓެމްޕަރަރީ ޒޫ ޝިއާކޭ“ ގެ ލަގަބު ދީފައެވެ. މިއީ މިންގް ޑައިނާސްޓީގެ މަޝްހޫރު ދަތުރުވެރިއަކަށް ނިސްބަތްކޮށް ދޭ ލަގަބެކެވެ. މިކަމުގެ އަގުވަޒަންކުރުމުގެ ގޮތުން ޗެން ވަނީ 198 ގައުމަކާއި ސަރަހައްދެއްގެ ފައިސާ ނޫޓު އެއްކޮށް، ލިޖިއާންގް ސިޓީގައި ހުންނަ ޒޫ ޝިއާކޭ މެމޯރިއަލް ހޯލަށް ހަދިޔާކޮށްފައެވެ.

ބޭރު ގައުމުތަކުގެ އިތުރުން ޗެން ވަނީ އޭނާގެ އަމިއްލަ ގައުމުވެސް ވަރަށް ފުރިހަމައަށް ބަލައި ހޯދާފައެވެ. 2020 ވަނަ އަހަރުގެ ކޮވިޑްގެ ބަލިމަޑުކަމަށްފަހު، އޭނާ ވެފައިވަނީ ޗައިނާގެ އެންމެ މަތީ ފެންވަރުގެ (5A) 318 ފަތުރުވެރި މަންޒިލަށް ޒިޔާރަތްކުރި ފުރަތަމަ މީހާއަށެވެ. މި ދަތުރަށް ދެ އަހަރު ހޭދަވިއެވެ.

ދަތުރުކުރުމުގެ އިތުރުން، އޭނާ ވަނީ ސްކޫލްތަކަށާއި، މަގުހެދުމުގެ މަޝްރޫއުތަކަށާއި، ކާރިސާތަކުގައި އެހީތެރިވުމަށް 745,000 އަށްވުރެ ގިނަ އެމެރިކާ ޑޮލަރު ހަދިޔާކޮށްފައެވެ. މިކަމާ ގުޅިގެން ޒެޖިއާންގްގެ ލެއިޝަރ އަދި ސްޕޯޓްސް ދާއިރާގެ އެންމެ ފާހަގަކޮށްލެވޭ އެއް ޝަހުސިއްޔަތުގެ ގޮތުގައި އޭނާ ވަނީ ބަލައިގަނެވިފައެވެ.

ތިރީހަކަށް އަހަރު ދުވަސް ދުނިޔެ ބެލުމުގައި ހޭދަކުރުމަށްފަހު، ޗެން މިހާރު ބޭނުންވަނީ އޭނާގެ ދަރިންނާއި މައިންބަފައިންނާއެކު ގިނަ ވަގުތު ހޭދަކުރުމަށެވެ. އަދި ދަތުރުފަތުރާއި އައުޓްޑޯ އެޑްވެންޗަރ ދާއިރާގެ ނުފޫޒުގަދަ 100 މީހުންނާ އިންޓަވިއުކޮށް، އެމީހުންގެ ހަޔާތުގެ ވާހަކަތައް ލިޔުމަށްވެސް އޭނާ ރާވާފައިވެއެވެ.

ޗެންގެ މި ދަތުރުތަކުގެ ވާހަކަ ޗައިނާގެ ސޯޝަލް މީޑިއާގައި ވަރަށް ބޮޑަށް ވައިރަލްވެފައިވާއިރު، ގިނަ ބަޔަކު އޭނާއަށް ތައުރީފުކުރެއެވެ. ނަމަވެސް ބައެއް މީހުން ފާހަގަކުރާ ގޮތުގައި މިއީ އާދައިގެ މީހަކަށް ކުރެވޭނެ ކަމެއް ނޫނެވެ. ސަބަބަކީ މިކަމަށް ވަރަށް ގިނަ ވަގުތާއި ފައިސާ ބޭނުންވާތީއެވެ.

އޭނާގެ މި ދިގު ދަތުރާ މެދު ވިސްނާލަމުން ޗެން ބުނެފައިވަނީ ”ވަގުތާއި ދިޔަވަރަކީ އެކަކަށްވެސް އިންތިޒާރުކުރާނެ އެއްޗެއް ނޫން“ ކަމަށެވެ.