ދަރިން ތިބި ނަމަވެސް އެއްވެސް އަޅާލުމެއް ނުލިބި، ގދ. ފަރެސްމާތޮޑާގައި ނިކަމެތި ހާލުގައި އެކަނި ދިރިއުޅެމުންދިޔަ ދުވަސްވީ ފިރިހެނަކު ދައުލަތުގެ ބެލުމުގެ ދަށަށް ގެންގޮސްފިއެވެ.
އުމުރުން 70 އަހަރުން މަތިވެފައިވާ މި މީހާ ދައުލަތުގެ ބެލުމުގެ ދަށަށް ގެންގޮސްފައިވަނީ، އޭނާގެ ސިއްހީ ހާލަތު ދަށްވެ އަމިއްލައަށް އުޅެވޭ ފަދަ ހާލަތެއްގައި ނެތުމުން، އެ ރަށު ކައުންސިލާއި ފުލުހުން ގުޅިގެން ކަމާބެހޭ އިދާރާތަކުގައި އެދުމާ ގުޅިގެންނެވެ.
މައުލޫމާތު ލިބިފައިވާ ގޮތުގައި، އޭނާގެ އެއްބަނޑު އެއްބަފާ މީހުން އެ ރަށުގައި ދިރިއުޅެއެވެ. އަދި ކައިވެނިކޮށްގެން އުޅޭ ބޮޑެތި ދެ ދަރިން ތިބި ނަމަވެސް، އެ މީހުން ދިރިއުޅެނީ ރަށުން ބޭރުގައެވެ. ދަރިންނަކީ މާ ތަނަވަސް ބަޔަކަށް ނުވާތީ އެ މީހުން ރަށަށް އަންނަނީ ވަރަށް މަދުންނެވެ. މީގެ ކުރިން އަންހެން ދަރިފުޅު ރަށުގައި އުޅުނު ދުވަސްވަރު ބައްޕަ ބެލެހެއްޓި ނަމަވެސް، ޖެހުނު މައްސަލައެއްގެ ސަބަބުން އޭނާ ގެއިން ނެރެލާފައިވާ ކަމަށް ވަނީ މައުލޫމާތު ލިބިފައެވެ.
އަމިއްލަ ގެދޮރެއް ނެތް އެ މީހާ، އެހެން މީހެއްގެ ގޭގައި އެކަނި ދިރިއުޅޭތާ ގާތްގަނޑަކަށް 15 އަހަރު ވެދާނެ ކަމަށް ރަށުގެ މީހުން ބުނެއެވެ. ކުރިން އަމިއްލައަށް ކަންކަން ކޮށްގެން އުޅުނު ނަމަވެސް، ވޭތުވެދިޔަ ފަސް އަހަރެއްހާ ދުވަހުގެ ތެރޭގައި އޭނާގެ ސިއްހީ ހާލަތު ވަނީ ވަރަށް ބޮޑަށް ދަށަށް ގޮސްފައެވެ. އެގޮތުން ލޮލުގެ ބައްޔެއްގެ ސަބަބުން އެއް ލޮލުގެ ފެނުން މުޅިން ގެއްލިފައިވާއިރު، އަނެއް ލޮލަށް ވެސް ފެންނަނީ ވަރަށް ފުސްކޮށެވެ. މިކަމުގެ ސަބަބުން ޒަރޫރީ ބޭނުންތައް ފުއްދުމާއި ގައިން ތާހިރުވުން ފަދަ އާދައިގެ ކަންކަން ކުރުމަށް ވެސް އޭނާއަށް ވަނީ ނުކުޅެދިފައެވެ.
އެ ގެއަށް އޭނާ ބަދަލުވިއިރު ކަރަންޓާއި ފަންކާ ފަދަ އަސާސީ އެއްވެސް ހިދުމަތެއް ނެތެވެ. ނަމަވެސް ރަށުގެ ރައްޔިތުންގެ ދީލަތި އެހީތެރިކަމާއެކު ކަރަންޓުގެ ހިދުމަތް ހަމަޖައްސައިދީ، ކެއިންބުއިމުގެ ކަންކަމުގައި އާންމުން އެހީތެރިކަން ފޯރުކޮށްދެމުން ދިޔައެވެ. އެހެން ނަމަވެސް، އޭނާ އަބަދުވެސް އެދެމުން ދިޔައީ ދަރިންނާއި އާއިލާގެ ލޯތްބާއި އަޅާލުމަށެވެ. އެ އަޅާލުން ނުލިބޭތީ އަބަދުވެސް އޭނާ ހިތާމަކޮށް، ޝަކުވާ ކުރަމުން ދިޔަ ކަމަށް މައުލޫމާތު ދިން ފަރާތުން ބުންޏެވެ.
އޭނާގެ ހާލަތު ދުވަހެއް ދުވަހަކަށް ގޯސްވަމުން ދިޔުމާ ގުޅިގެން، ރަށު ކައުންސިލާއި ފުލުހުންގެ އިސްނެގުމުގެ މަތިން މިހާރު ވަނީ އޭނާ ދައުލަތުގެ ރައްކާތެރިކަމުގެ ދަށަށް ގެންގޮސް، އެކަށީގެންވާ ރަނގަޅު މާހައުލެއް ހަމަޖައްސައިދީފައެވެ.
