މުޤައްދަސް މައްކާއާ ދިމާލަށް އައި ގޮވާތަކެތި ހަރުކޮށްފައިވާ ޑްރޯނެއް ވައްޓާލުމަށްފަހު، މައްކާގެ ސަލާމަތާއި ރައްކާތެރިކަމަކީ އެއްވެސް ބަޔަކަށް ހުރަސްނުކުރެވޭނެ ”ރެޑް ލައިނެއް“ ކަމަށް ބުނެ ސަޢޫދީ އިސްވެ އޮންނަ ކޯލިޝަނުން ޔަމަނުގެ ހޫޘީންނަށް ވަރުގަދަ އިންޒާރެއް ދީފިއެވެ.
އަންގާރަ ދުވަހުގެ ރޭ ހިނގި މި ޙާދިސާއާ ގުޅިގެން ސަޢޫދީގެ ހުޅަނގުގެ ސަރަޙައްދުތަކުގައި ކުއްލި ނުރައްކަލުގެ އެލާޓްތަކެއް ނެރުނެވެ. ސަޢޫދީއިން މިކަމުގެ ބަދަލުހިފުމުގެ ގޮތުން ހަރުކަށި ފިޔަވަޅުތަކެއް އަޅާނެކަމަށް ބުނެފައިވާއިރު، ހޫޘީން ވަނީ މައްކާއަށް ހަމަލާދޭން އުޅުނުކަމަށް ކުރާ ތުހުމަތުތައް ދޮގުކޮށްފައެވެ. އެމީހުން ބުނާގޮތުގައި މިއީ ޙަމަލާތައް ވަރުގަދަކުރުމަށް ސަޢޫދީއިން ހަދަމުންދާ ދޮގުތަކެކެވެ.
އަންގާރަ ދުވަހުގެ ރޭ މައްކާގެ ދެކުނުން އައި ޑްރޯނެއް ސަޢޫދީގެ ރޯޔަލް އެއަރ ޑިފެންސް ފޯސަސް އިން ވަނީ އަމާޒަށް ވާސިލުވުމުގެ ކުރިން ވައްޓާލާފައެވެ. ކޯލިޝަންގެ ތަރުޖަމާނު މޭޖަރ ޖެނެރަލް ތުރުކީ އަލް-މާލިކީ ބުނި ގޮތުގައި މައްކާގެ މަނާ ސަރަޙައްދަށް ޑްރޯން ވަނުމުގެ ކުރިން ވަނީ ނައްތާލެވިފައެވެ.
އަލް-މާލިކީ ބުނީ މިއީ ދުނިޔޭގެ އެތައް މިލިއަން މުސްލިމުންގެ އިޙްސާސްތަކާ ކުޅެ، ޙައްޖު/ޢުމްރާވެރިންގެ ހިތްތަކުގައި ބިރުވެރިކަން އުފެއްދުމަށް ދިން ޓެރަރިސްޓް ޙަމަލާއެއް ކަމަށެވެ. އަދި މައްކާގެ ދިފާޢުގައި އަޅަންޖެހުނު ކޮންމެ ފިޔަވަޅެއް އެޅުމަށް ފަސްނުޖެހޭނެކަމަށް އޭނާ ބުންޏެވެ.
ހޫޘީންގެ ޕޮލިޓިކަލް ބިއުރޯއިން ވަނީ ސަޢޫދީގެ މި ތުހުމަތުތައް ވަގުތުން ދޮގުކޮށްފައެވެ. ހޫޘީންގެ ތަރުޖަމާނު ޙާޒިމް އަލް-އަސަދު ބުނެފައިވަނީ، މައްކާއަށް ޙަމަލާދޭކަމަށް ބުނެ ދައްކާ ވާހަކަތަކަކީ އެއްވެސް ބަޔަކު މިހާރު ޤަބޫލުނުކުރާނެ ބޯދާ ދޮގުތަކެއް ކަމަށެވެ.
ހޫޘީން ބުނާގޮތުގައި އެމީހުންގެ ޙަމަލާތައް އަމާޒުކުރަނީ ހަމައެކަނި ސަޢޫދީގެ އަސްކަރީ މަރުކަޒުތަކަށާއި ތެލުގެ ވަސީލަތްތަކަށެވެ. މައްކާގެ ވާހަކަ ސަޢޫދީއިން ދައްކަނީ ބައިނަލްއަޤްވާމީ މުޖުތަމަޢުގެ ހަމްދަރުދީ ހޯދުމަށް ކަމަށް ހޫޘީން ތުހުމަތުކުރެއެވެ.
57 މުސްލިމް ޤައުމު ހިމެނޭ އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިން ވަނީ މި ޢަމަލު ވަރަށް ބޮޑަށް ކުށްވެރިކޮށް، މުޤައްދަސް ބިންތަކަށް ޙަމަލާދިނުމަކީ ބަލައިގަނެވޭނެ ކަމެއް ނޫންކަމަށް ބުނެފައެވެ. ޙަމަލާތައް އިތުރުވުމާ ގުޅިގެން ސަޢޫދީގައި ހުންނަ އެމެރިކާގެ އެމްބަސީން ވަނީ، އެމެރިކާގެ ރައްޔިތުން ސަޢޫދީއަށް ދަތުރުކުރުމުގައި އިތުރަށް ވިސްނުމަށް އަންގައި ޓްރެވަލް އެޑްވައިޒަރީއެއް ނެރެފައެވެ.
