ސަޢޫދީ ޢަރަބިއްޔާގެ ހަކަތައިގެ އުމްރާނީ ވަސީލަތްތަކަށް ލިބުނު ގެއްލުންތަކާއި، ތެޔޮ އެކްސްޕޯޓްކުރާ މަގުތަކަށް ކުރިމަތިވެފައިވާ ނުރައްކާތަކާ ގުޅިގެން ދުނިޔޭގެ ބާޒާރުގައި ތެލުގެ އަގު ފީފާއަކަށް 108 ޑޮލަރަށްވުރެ މައްޗަށް އުފުލިއްޖެއެވެ.
ތެލުގެ އަގު މިހާ ބޮޑަށް އުފުލިގެންދިޔައީ، ސަޢޫދީ އަރާމްކޯގެ މުހިންމު ’އީސްޓް-ވެސްޓް ޕައިޕްލައިން‘ ކުއްލި ގޮތަކަށް ބަންދުކުރަން ޖެހުމާއި، އަދި ސަޢޫދީގެ މައި ސިޓީތަކަށް އަމާޒުކޮށް ހޫޘީން ދެމުންގެންދާ ބެލިސްޓިކް މިސައިލާއި ޑްރޯން ޙަމަލާތައް އިތުރުވުމާ ގުޅިގެންނެވެ. މީގެ ސަބަބުން ސަޢޫދީއިން ދުނިޔޭގެ ބާޒާރަށް ތެޔޮ ފޯރުކޮށްދިނުމުގެ ޤާބިލުކަމާމެދު ވަނީ ބޮޑެތި ސުވާލުތަކެއް އުފެދިފައެވެ.
ބްރެންޓް ކްރޫޑްގެ އަގު ފީފާއަކަށް 108.40 ޑޮލަރަށް އުފުލިފައިވާއިރު، މިއީ މިއަހަރުގެ ތެރޭގައި އެއް ދުވަހެއްގެ ތެރޭގައި ތެލުގެ އަގު މިހާ ބޮޑަށް މައްޗަށް ދިޔަ ފުރަތަމަ ފަހަރެވެ. ޑަބްލިއު.ޓީ.އައި ކްރޫޑްގެ އަގުވެސް ވަނީ ފީފާއަކަށް 104 ޑޮލަރަށްވުރެ މައްޗަށް ގޮސްފައެވެ.
އީސްޓް-ވެސްޓް ޕައިޕްލައިނަކީ ހޮރްމޫޒް ކަނޑުއޮޅިއަށް ބަރޯސާނުވެ، ދުވާލަކު 5 މިލިއަން ފީފާގެ ތެޔޮ ރަތް ކަނޑުގެ ޔަންބޫ ބަނދަރަށް ފޮނުވުމަށް ސައުދީން ބޭނުންކުރާ މައި ހޮޅިއެވެ. މި ހޮޅީގެ އޮޕަރޭޝަންތައް ހުއްޓުމަކަށް އައުމަކީ ސައުދީގެ ތެޔޮ އެކްސްޕޯޓަށް ލިބުނު ވަރަށް ބޮޑު ހީނަރުކަމެކެވެ.
ތެޔޮ ހޮޅި ބަންދުވުމުގެ އިތުރުން، ހޫޘީން ވަނީ ރަތް ކަނޑުގެ އައްސޭރިފަށާއި ބާބުލް މަންދަބު ކަނޑުއޮޅީގެ މައްޗަށް ފުރިހަމަ ކޮންޓްރޯލް ނަގާފައެވެ. މީގެ ސަބަބުން ޔަންބޫ ބަނދަރަށް ތެޔޮ ފޯރުކޮށްދެވުނު ކަމުގައިވިޔަސް، ރަތް ކަނޑުގެ މަގުން ރައްކާތެރިކަމާއެކު ބޯޓުފަހަރު ދަތުރުކުރުމުގެ ފުރުސަތު މިހާރު ވަނީ ބަންދުވެފައެވެ.
ޚަމީސް މުޝައިތު، އަބްހާ އަދި ޠާއިފްއަށް ދިން ޙަމަލާތަކުގެ ސަބަބުން، ސަޢޫދީގެ އެތެރޭގައިވާ ތެޔޮ ޕަމްޕްކުރާ މަރުކަޒުތަކާއި ގުދަންތަކަށް އޮތް ނުރައްކާ ހާމަވެ، ތެޔޮ އުފެއްދުމުގެ އޮޕަރޭޝަންތައް ދިގު މުއްދަތަކަށް ހުއްޓިދާނެކަމުގެ ބިރު ވަނީ އުފެދިފައެވެ.
