ދިވެހިރާއްޖެ އިސްލާމްވިތާ 900 އަހަރު ފުރުމުގެ ތާރީހީ މުނާސަބަތާ ގުޅުވައިގެން ބިނާކުރާ، ރާއްޖޭގެ އެންމެ ބޮޑު މިސްކިތް ކަމަށްވާ ޖާމިއުއްސުލްތާން މުޙައްމަދު ބިން ޢަބްދުﷲ އަދި އިސްލާމީ ހަޟާރަތާބެހޭ މަރުކަޒުގެ ބިންގާ އެޅުމުގެ ރަސްމިއްޔާތު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޝަރަފުވެރިކޮށްދެއްވައިފިއެވެ.
މިއަދު ހަވީރު ހުޅުމާލޭ ދެވަނަ ފިޔަވަހީގައި ބޭއްވި މި ރަސްމިއްޔާތަށް ރައީސުލްޖުމްހޫރިއްޔާ ވަޑައިގަތުމުން އެމަނިކުފާނަށް މަރުހަބާ ދެންނެވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދެވެ.
ހުޅުމާލޭ ދެވަނަ ފިޔަވަހީގެ ލޮޓް ނަންބަރު 23248 ގައި ބިނާކުރާ މި މަރުކަޒުގެ ބިންގާއަޅުއްވައި ދެއްވީ ރައީސުލްޖުމްހޫރިއްޔާގެ އިތުރުން، އިސްލާމީ ކަންތައްތަކާ ބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދާއި، ސަޢޫދީ ޢަރަބިއްޔާގެ އަލް-ރާޖިޙީ ކުންފުނީގެ ސީއީއޯ އިންޖިނޭރު ބަންދަރު ޢަބްދުﷲ އަލް-ރާޖިޙީއާއި، ސަޢޫދީ ޢަރަބިއްޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޔަޙްޔާ ޙަސަން އަލް ޤަހްޠާނީ އަދި އެޗްޑީސީގެ މެނޭޖިންގ ޑިރެކްޓަރު ބްރިގޭޑިއަރ ޖެނެރަލް (ރިޓަޔަރޑް) ޢަލީ ޒުހައިރެވެ.
މި މަޝްރޫއަކީ ސަޢޫދީ ޢަރަބިއްޔާގެ މަޝްހޫރު އަލްް-ރާޖިޙީ ކުންފުނީގެ ދީލަތި އެހީއާއި ހަރަދުގައި ކުރިއަށްގެންދާ ބިޔަ މަޝްރޫއެކެވެ. އެއްފަހަރާ 10،000 މީހުންނަށް ނަމާދުކުރެވޭ ޖާގައިގެ މި މިސްކިތަކީ ރާއްޖޭގައި މިހާތަނަށް ބިނާކުރެވޭ އެންމެ ބޮޑު މިސްކިތެވެ.
އަޅުކަން ކުރުމުގެ ޖާގައިގެ އިތުރުން، އިސްލާމީ ތައުލީމާއި ސަގާފަތް ކުރިއެރުވުމަށް ގިނަ ވަސީލަތްތަކެއް މި މަރުކަޒުގައި ހިމެނެއެވެ. އޭގެ ތެރޭގައި އިމާމުންނާއި އިދާރީ މަސައްކަތްތަކަށް ހާއްސަ އޮފީސްތަކާއި، އިސްލާމީ ކުތުބުހާނާއަކާއި، ކަލްޗަރަލް ސެންޓަރެއްގެ އިތުރުން ކީރިތި ޤުރުއާނާ ގުޅޭ ތާރީހީ މައުލޫމާތުތައް ދައްކުވައިދޭ ހާއްސަ ޤުރުއާން މިއުޒިއަމެއް ހިމެނެއެވެ.
ހަމައެއާއެކު، އިސްލާމީ އަދި ތާރީހީ އެކި މައުރަޒުތައް ބޭއްވުމަށް ހާއްސަ ހޯލަކާއި، އިޖުތިމާއީ ތަފާތު ހަރަކާތްތައް ހިންގާނެ މަލްޓިޕަރޕަސް ކޮމިއުނިޓީ ހޯލެއްގެ އިތުރުން، މިސްކިތަށް ޒިޔާރަތްކުރާ ފަރާތްތަކާއި ފަތުރުވެރިންނަށް ހާއްސަ ވިޒިޓާސް އޭރިއާއަކާއި، އިސްލާމީ ފޮތް ފިހާރައަކާއި ގިފްޓް ޝޮޕެއްވެސް މި އިމާރާތުގައި ގާއިމުކުރެވޭނެއެވެ. މި މަރުކަޒު ވެގެންދާނީ ދިވެހި ރައްޔިތުންނަށާއި ރާއްޖެ ޒިޔާރަތްކުރާ އެންމެހައި ފަރާތްތަކަށް އިސްލާމީ ތަރުބިއްޔަތާއި ސަގާފަތާއި ތާރީހު ފޯރުކޮށްދިނުމުގައި ވަރަށް މުހިންމު ދައުރެއް އަދާކުރާނެ ފަހުރުވެރި ބިނާއަކަށެވެ.












