ޒަމާނަށް އަންނަ ބަދަލުތަކާއެކު، މުދައްރިސުންގެ އިލްމާއި ތަޖުރިބާއަކީ ތައުލީމީ ދާއިރާއަށް ކޮންމެހެން ވެސް ބޭނުންތެރި މުހިއްމު އެއްޗެއް ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަޠީފް މިއަދު ވިދާޅުވެއްޖެއެވެ.
ނައިބު ރައީސް މި މޭރުމުން ވިދާޅުވީ، ނެޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) އިން އިންތިޒާމުކޮށްގެން މި މަހުގެ 12 ވަނަ ދުވަހުން ފެށިގެން 13 ވަނަ ދުވަހާއި ހަމައަށް ކުރިއަށްގެންދާ އަށް ވަނަ އިންޓަރނޭޝަނަލް ޓީޗަރސް ކޮންފަރެންސް ފެށުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ. މި ރަސްމިއްޔާތުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، ގައުމުގެ މުސްތަގުބަލު ބިނާކުރުމަށް މުދައްރިސުން ކުރައްވާ މިންނެތް މަސައްކަތުގައި މިފަދަ ބައިނަލްއަގުވާމީ މަހާސިންތާތަކަކީ ވަރަށް މުހިންމު ދައުރެއް އަދާކުރާ ހަރަކާތްތަކެއް ކަމަށެވެ.
މީގެއިތުރުން، މިފަދަ ހަރަކާތްތަކުގެ ސަބަބުން ދުނިޔޭގެ ފެންވަރުގައި ތައުލީމީ ދާއިރާގައި ބޭނުންކުރަމުން އަންނަ އެންމެ ރަނގަޅު އުސޫލުތަކާއި އުކުޅުތަކާ ގުޅޭގޮތުން މަޝްވަރާކުރެވި، މުދައްރިސުން އިސްނަގައިގެން ކުރިއަށްގެންދާ ދިރާސާތަކަށް ފުޅާ ދާއިރާއެއްގައި އަލިއަޅުވާލުމުގެ ފުރުސަތު ފަހިވެގެންދާނެކަން ވެސް އެމަނިކުފާނު ފާހަގަކުރެއްވިއެވެ.
ދުނިޔެއަށް އަންނަ ކުރިއެރުންތަކާއެކު ތައުލީމީ ނިޒާމު ވެސް ތަރައްގީވާންޖެހޭކަން ފާހަގަކުރައްވަމުން، އާޓިފިޝަލް އިންޓެލިޖެންސް (އޭއައި) ފަދަ ޒަމާނީ ޓެކްނޮލޮޖީތަކަކީ މުދައްރިސުންނަށާއި ދަރިވަރުންނަށް ގިނަ ފަސޭހަތަކެއް ފޯރުކޮށްދޭ ވަސީލަތްތަކެއް ކަމުގައި ނައިބު ރައީސް ވިދާޅުވިއެވެ. އެހެންނަމަވެސް، އެއްވެސް ޓެކްނޮލޮޖީއަކަށް ޒިންމާދާރު މުދައްރިސެއްގެ މަގާމާއި ދައުރު އަދާނުކުރެވޭނެކަން އެމަނިކުފާނު ވަނީ ހަނދާންކޮށްދެއްވައިފައެވެ.
”އެއްވެސް ޓެކްނޮލޮޖީއަކަށް ޒިންމާދާރު ޓީޗަރެއްގެ ދައުރު އަދާނުކުރެވޭނެ. ޓެކްނޮލޮޖީން ވަސީލަތްތައް ފޯރުކޮށްދިން ނަމަވެސް ދަރިވަރުންނަށް އެ ކުދިންގެ ފުލް ޕޮޓެންޝަލް ރިއަލައިޒް ކުރުވަނީ ޓީޗަރުން. އެހެންވެ އަޅުގަނޑުމެންގެ އަމާޒަކަށްވާންޖެހޭނީ ދުނިޔެއަށް އަންނަ ބަދަލުތަކާއެކު ޓީޗަރުންނަށް ބޭނުންވާ އިލްމާއި ވަސީލަތްތައް ފޯރުކޮށްދިނުން،“ – ނައިބު ރައީސް ވިދާޅުވިއެވެ.
ހަމައެއާއެކު، އެއްވެސް ދަރިވަރަކު ބާކީނުކޮށް ތައުލީމު ފޯރުކޮށްދިނުމުގައި ހަމަހަމަކަމާއެކު ޝާމިލުކުރުމުގެ ވެއްޓެއް ގާއިމުކުރުމުގެ މުހިންމުކަމަށް އަލިއަޅުއްވާލައްވަމުން، ދަރިވަރެއްގެ ކާމިޔާބީ ވަޒަންކުރާ ހަމައެކަނި މިންގަނޑަކީ އިމްތިހާނުގެ ނަތީޖާ ކަމުގައި ވެގެންނުވާނެ ކަމަށް އެމަނިކުފާނު ވިދާޅުވިއެވެ. އަދި ގައުމުގެ ކުރިއެރުމަށާއި، ވިލުންތެރި އިގުތިސާދެއް ބިނާކުރުމަށްޓަކައި ޓެކްނިކަލް އަދި ވޮކޭޝަނަލް ތަމްރީނުތަކަކީ ކޮންމެހެން މުހިންމު ދާއިރާއެއްކަން ވެސް ނައިބު ރައީސް ފާހަގަކުރެއްވިއެވެ.
މުދައްރިސުންގެ ބުރަ މަސައްކަތާއި އިސްނެގުމާ ނުލައި އެއްވެސް ސިޔާސަތެއް، މަންހަޖެއް އަދި އީޖާދީ މަސައްކަތެއް ކާމިޔާބު ނުވާނެކަން ފާހަގަކުރައްވަމުން ނައިބު ރައީސް ވަނީ، ތައުލީމީ ދާއިރާ މިހާރަށްވުރެ ބޮޑަށް ތަރައްގީކުރުމަށްޓަކައި ސަރުކާރުގެ ފުރިހަމަ އެއްބާރުލުން ލިބޭނެކަމުގެ ޔަގީންކަން ވެސް ދެއްވައިފައެވެ.
”ރީއިމޭޖިންގ، ރީތިންކް، ރިފޯމް – އެޑްވާންސިންގ އިނޮވޭޝަން ފޯ އެން އެކުއިޓަބަލް އެންޑް ރެޒިލިއެންޓް ފިއުޗަރ“ މި ޝިއާރުގެ ދަށުން ބާއްވާ މި ކޮންފަރެންސްގައި، ރާއްޖެއާއި ރާއްޖެއިން ބޭރުގެ ގިނަ އަދަދެއްގެ މުދައްރިސުންނާއި، ތަައުލީމީ ދާއިރާގެ އިސްވެރިންގެ އިތުރުން ދިރާސާވެރިން ބައިވެރިވެވަޑައިގެން ތައުލީމީ ދާއިރާގެ ކުރިމަގު ބައްޓަންކުރުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެއްވުމަށް ވަނީ ހަމަޖެހިފައެވެ.
