ޗައިނާ މޯލްޑިވްސް ފްރެންޑްޝިޕް ބްރިޖް (ސިނަމާލެ ބްރިޖް) ގެ ތަނބެއްގައި މިދިޔަ ބުރާސްފަތި ދުވަހުގެ ރޭ ބޯޓެއް ޖެހި ހިނގި ހާދިސާގައި، ބްރިޖުގެ މައިގަނޑު ސްޓްރަކްޗަރަށް މާބޮޑު ގެއްލުމެއް ލިބިފައި ނުވާ ކަމަށް ހައުސިންގ މިނިސްޓަރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
މިނިސްޓަރު މުއްޠަލިބް މީސް މީޑިއާގައި ކުރެއްވި ޕޯސްޓެއްގައި ވިދާޅުވީ، މި ހާދިސާއަކީ ވަރަށް ނުރައްކާތެރި ހާދިސާއެއް ކަމަށެވެ. އެހެންކަމުން ހާދިސާ ހިނގި ވަގުތާއި އިއްޔެ ހެނދުނު، ބްރިޖުގެ މަރާމާތުގެ މަސައްކަތްތައް ކުރަމުން އަންނަ ކުންފުނި ކަމަށްވާ ޗައިނާގެ ސެކަންޑް ހާބަރ އިންޖިނިއަރިންގ ކޮމްޕެނީ (އެސްއެޗްއީސީ) ގެ އިންޖިނިއަރުން ބްރިޖު ބަލައި، ސްޓްރަކްޗަރަލް އެސެސްމަންޓެއް ވެސް ހަދާފައިވާ ކަމަށް މިނިސްޓަރު ވިިދާޅުވިއެވެ.
އެ ކުންފުނިން ބެލި ބެލުމުން، ބްރިޖުގެ ސްޓްރަކްޗަރަށް މާބޮޑު ގެއްލުމެއް ލިބިފައި ނުވާ ކަމަށާއި، ނަމަވެސް ބޭރުފުށުން ކުދިކުދި ކޫރުތަކެއް އެޅިފައިވާކަން ފާހަގަކުރެވިފައިވާ ކަމަށް މިނިސްޓަރު ވިދާޅުވިއެވެ. އަދި ޗައިނާ ސަރުކާރުގެ ހިލޭ އެހީގެ ދަށުން އެސްއެޗްއީސީއާއެކު ހަދާފައިވާ މޮނިޓަރިންގ އަދި މެއިންޓެނަންސް އެއްބަސްވުމުގެ ދަށުން، ކަނޑައެޅިފައިވާ މިންގަނޑުތަކާ އެއްގޮތަށް އެ ކުންފުނިން ބްރިޖު މަރާމާތުކުރާނެ ކަމަށް ވެސް ވިދާޅުވިއެވެ.
Last night's incident at China Maldives Friendship Bridge was a near miss.
Engineers from Second Harbour Engineering Company (SHEC), the builder of the bridge, carried out inspections last night and again this morning. Alhamdhulillah, there is no structural damage, only surface… pic.twitter.com/tApb6fbllA— Abdulla Muththalib (@muththo) September 11, 2026
މިނިސްޓަރު އިތުރަށް ވިދާޅުވީ، މާލެ ސަރަޙައްދުގައި ކޮންޓްރޯލުން ނެއްޓިގެންދާ އުޅަނދެއްގެ ސަބަބުން މިހާރު ހުރި ދެ ބްރިޖަށާއި، ވެލާނާ އިންޓަރނޭޝަނަލް އެއާޕޯޓުގެ އިތުރުން މުހިންމު އެހެން އުމްރާނީ ވަސީލަތްތަކަށް ބޮޑު ނުރައްކަލެއް ކުރިމަތިވެދާނެ ކަމަށެވެ. މިއީ މުޅި މާލޭ ސަރަހައްދުގައި ދިރިއުޅޭ ފަރާތްތަކުގެ ދިރިއުޅުމަށް ވަރަށް ބޮޑު އަސަރެއް ކޮށްފާނެ ފަދަ ކަމަކަށް ވުމުން، ނުރައްކާތެރި ހާދިސާއެއް ހިނގުމުގެ ކުރިން ރައްކާތެރިކަމުގެ ފިޔަވަޅުތައް އެޅުމަކީ ސަރުކާރުން އިސްކަންދޭ ކަމެއް ކަމަށް ވިދާޅުވިއެވެ.
އެގޮތުން، ކޮންޓްރޯލުން ނެއްޓިގެން އޮޔާދާ އުޅަނދުތައް ބްރިޖާ ހަމައަށް ދިޔަނުދީ ހިފެހެއްޓުމުގެ ގާބިލުކަން ހުރި ދެ ޓަގް ބޯޓު ހޯދުމުގެ މަސައްކަތް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިހާރު ކުރަމުންދާ ކަމަށާއި، ކުރިއަށް އޮތް ދެ މަހެއްހައި ދުވަހުގެ ތެރޭގައި އެ ޓަގް ބޯޓުތައް ރާއްޖެ ގެނެވޭނެ ކަމަށް މިނިސްޓަރު ވިދާޅުވިއެވެ. މީގެއިތުރުން، ބަނދަރުގައި އުޅަނދުފަހަރު އަޅާފައި ބަހައްޓާ އުސޫލުތައް އަލުން މުރާޖައާކޮށް، ކޯސްޓްގާޑާއި ކަމާބެހޭ އެހެނިހެން އިދާރާތަކާ ގުޅިގެން ކުއްލި ހާލަތްތަކުގައި މުވާސަލާތުކޮށް ހަރަކާތްތެރިވާނެ ގަވާއިދުތަކެއް އެކުލަވާލައްވާނެ ކަމަށް ވެސް މިނިސްޓަރު މުއްޠަލިބް ވަނީ ހާމަކުރައްވައިފައެވެ.
ޖުމްލަ 200 މިލިއަން ޑޮލަރު ހަރަދުކޮށްގެން ތަރައްގީކޮށްފައިވާ ސިނަމާލެ ބްރިޖަކީ 1.4 ކިލޯމީޓަރުގެ ދިގު ބްރިޖެކެވެ. މޫދުގައި ހަތް މައި ތަނބު ޖަހައިގެން ތަރައްގީކޮށްފައިވާ މި ބްރިޖު ރަސްމީކޮށް ހުޅުވާފައިވަނީ 2018 ވަނަ އަހަރުގެ އޮގަސްޓް މަހުގެ ތެރޭގައެވެ.
