ކީރިތި ޤުރުއާން ކިޔެވުމުގެ 38 ވަނަ ގައުމީ މުބާރާތް ރަސްމީކޮށް ފަށައިފިއެވެ.
މި މުބާރާތް ރަސްމީކޮށް ފައްޓަވައިދެއްވީ އިސްލާމީ މަރުކަޒުގެ ޖަލްސާކުރާ މާލަމުގައި މި މަހުގެ 10 ވަނަ ދުވަހުގެ ރޭ ބޭއްވި ހާއްސަ ރަސްމިއްޔާތެއްގައި، ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަޠީފެވެ. މި ރަސްމިއްޔާތުގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދާއި، ތަޢުލީމީ ވަޒީރު ޑރ. އިސްމާޢީލް ޝަފީޢުގެ އިތުރުން ކަމާބެހޭ ވުޒާރާތަކާއި ކީރިތި ޤުރުއާނާ ބެހޭ ގައުމީ މަރުކަޒުގެ އިސްވެރިން ބައިވެރިވެވަޑައިގެންނެވިއެވެ.
ކީރިތި ޤުރުއާން ކިޔެވުމުގެ 38 ވަނަ ގައުމީ މުބާރާތަކީ، މުބާރާތުގެ އޮނިގަނޑަށް ބޮޑެތި އިސްލާހީ ބަދަލުތަކެއް ގެނައުމަށްފަހު އިންތިޒާމުކުރެވިފައިވާ މުބާރާތެކެވެ. އެގޮތުން މިއަހަރުގެ އޮޑިޝަން ބުރު މާލެ ސަރަހައްދުގެ އިތުރުން ރާއްޖޭގެ 20 ސަރަހައްދެއްގައި ވަނީ ކުރިއަށް ގެންގޮސްފައެވެ. މި އޮޑިޝަން ބުރުގައި 2,742 ބައިވެރިން ވާދަކޮށްފައިވާއިރު، ސެމީ ފައިނަލް ބުރަށް ހޮވިފައިވަނީ 379 ދަރިވަރުންނެވެ.
މުބާރާތުގެ ސެމީ ފައިނަލް ބުރުގެ ކިޔެވުން 11 ސެޕްޓެމްބަރު ވަނަ ދުވަހުން ފެށިގެން 14 ސެޕްޓެމްބަރު ވަނަ ދުވަހަށް ކުރިއަށްދާއިރު، ފައިނަލް ބުރުގެ ކިޔެވުން އޮންނާނީ 16 ސެޕްޓެމްބަރު ވަނަ ދުވަހުން 17 ސެޕްޓެމްބަރު ވަނަ ދުވަހާއި ހަމައަށެވެ.
ކީރިތި ޤުރުއާން ކިޔެވުމުގެ ގައުމީ މުބާރާތުގެ ފެންވަރު މަތިކޮށް، ފާހަގަކޮށްލެވޭ ފަދަ ފުރިހަމަ މުބާރާތެއްގެ ގޮތުގައި ކުރިއަށް ގެންދިއުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަރަށް ހާއްސަ އިސްކަމެއް ދެއްވައިގެން ކުރައްވަމުން ގެންދަވާ މުހިންމު މަސައްކަތެއްކަން ފާހަގަކޮށްލެވެއެވެ.
