ދުނިޔޭގެ ހަކަތައިގެ ބާޒާރަށާއި ކަނޑުދަތުރުފަތުރަށް ބޮޑު ނުރައްކަލެއް ކުރިމަތިކުރުވަމުން، އީރާނުގެ މަދަދު ލިބޭ ހޫޘީން ޔަމަނުގެ ރަތް ކަނޑުގެ އައްސޭރިފަށާއި މުހިންމު ރަށްތަކެއް ހިފައި، ބާބުލް މަންދަބު ކަނޑުއޮޅީގެ މައްޗަށް ފުރިހަމަ ކޮންޓްރޯލް ނަގައިފިއެވެ.
މިއާއެކު، ސައުދީ އަރަބިއްޔާގެ ރިޔާޟް އަދި މަދީނާ ސަރަޙައްދަށް އަމާޒުކޮށް ދިން ހަމަލާތަކަކާ ގުޅިގެން، އެ ޤައުމުގެ އެންމެ މުހިންމު އެއް ތެޔޮ ހޮޅި ކަމަށްވާ ’އީސްޓް-ވެސްޓް ޕައިޕްލައިން‘ ރައްކާތެރިކަމުގެ ފިޔަވަޅެއްގެ ގޮތުން ބަންދުކޮށްފައިވާކަމަށް ސައުދީ އެނަރޖީ މިނިސްޓްރީން ވަނީ ކަށަވަރުކޮށްދީފައެވެ.
މޯކާ ބަނދަރު ހިފުމަށްފަހު، ހޫޘީން ވަނީ ކުއްލި ހަމަލާތަކެއް ދީގެން ރަތް ކަނޑުގައިވާ ޕެރިމް، ޒުޤަރު އަދި ހާނިޝް ރަށް ފަދަ ސްޓްރެޓީޖިކް ރަށްތައް ހިފާފައެވެ. މި ރަށްތައް ހިފުމާއެކު، ރަތް ކަނޑުގެ އައްސޭރިފަށާއި ބާބުލް މަންދަބު ކަނޑުއޮޅީގެ މައްޗަށް ހޫޘީންނަށް ފުރިހަމަ އަސްކަރީ ކޮންޓްރޯލް ލިބިގެންދާނެ ކަމަށް މާހިރުން ބުނެއެވެ. މިއީ ބައިނަލްއަޤްވާމީ ވިޔަފާރި ބޯޓުފަހަރަށް އޮތް ވަރަށް ބޮޑު ނުރައްކަލެކެވެ. ޖާސޫސީ މަޢުލޫމާތުތައް ބުނާގޮތުން، މި އޮޕަރޭޝަންތައް ހިންގާފައިވަނީ އީރާނުގެ އައި.އާރު.ޖީ.ސީގެ އިސް ކޮމާންޑަރުންގެ ސީދާ ބެލުމުގެ ދަށުންނެވެ.
ސަޢޫދީ އެނަރޖީ މިނިސްޓްރީން ހާމަކުރިގޮތުގައި، ރިޔާޟް އަދި މަދީނާ ސަރަޙައްދުގައިވާ އީސްޓް-ވެސްޓް ޕައިޕްލައިންއަށް ވަނީ އެތައް ހަމަލާތަކެއް އަމާޒުވެފައެވެ. މި ހަމަލާތަކުގައި އެތަނުގައި މަސައްކަތްކުރާ ބައެއް މުވައްޒަފުންނަށް އަނިޔާވެ، ފަރުވާދޭން ޖެހިފައިވެއެވެ.
ހޮރްމޫޒް ކަނޑުއޮޅިއަށް ބަރޯސާވުން ކުޑަކުރުމަށް ސައުދީން ބިނާކޮށްފައިވާ މި މުހިންމު ތެޔޮ ހޮޅި ބަންދުކުރަން ޖެހުމަކީ ސައުދީގެ ތެޔޮ އެކްސްޕޯޓްކުރުމުގެ ޤާބިލުކަމަށް ލިބުނު ވަރަށް ބޮޑު ހީނަރުކަމެކެވެ. ރަތް ކަނޑުގެ މަގު ބަންދުވުމާއި ސަޢޫދީގެ ތެޔޮ ހޮޅިއަށް ލިބުނު ގެއްލުމާއެކު، ދުނިޔޭގެ ބާޒާރުގައި ތެލުގެ އަގު ވަނީ ފީފާއަކަށް 100 ޑޮލަރަށްވުރެ މައްޗަށް އުފުލިފައެވެ.














