މާލޭގެ މަޖީދީމަގުގައި ހުންނަ ހީނާމާގޭ ޕާކިންގ ޒޯނާއި، ސޯސަންމަގުގައި ހުންނަ ޕާކިންގ ޒޯނުގައި ޒަމާނީ ފެންވަރުގެ ޕާކިންގ އިމާރާތްތަކެއް ތަރައްގީކުރުމުގެ އަމަލީ މަސައްކަތުގެ އެއްބަސްވުމުގައި އަންނަ ހަފުތާގައި ސޮއިކުރެވޭނެ ކަމަށް އިކޮނޮމިކް އެންޑް ޓްރާންސްޕޯޓް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓަރު ވިދާޅުވީ، އެ ދެ ބިމުގައި ޕާކިންގ އިމާރާތްތައް ތަރައްގީކުރާނެ ފަރާތްތައް މިހާރު ހަމަޖެހިފައިވާ ކަމަށެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަމާޒަކީ، އަންނަ އަހަރުގެ ނޮވެމްބަރު މަހުގެ ނިޔަލަށް އެ ދެ އިމާރާތުގެ މަސައްކަތް އެއްކޮށް ނިންމަވައި، އާންމުންނަށް ހިދުމަތް ދޭން ފެށުން ކަމަށްވެސް މިނިސްޓަރު ފާހަގަކުރެއްވިއެވެ.
މި ދެ މަޝްރޫއު އަމިއްލަ ކުންފުނިތަކަކާ ހަވާލުކޮށްގެން ކުރިއަށްގެންދިޔަ ނަމަވެސް، ޕާކިންގ ފީ ކަނޑައަޅާނީ ސަރުކާރުން ކަމަށާއި، އެ ފީ ވެގެންދާނީ އަންމު ރައްޔިތުންނަށް އަތްފޯރާ، ލުއިފަސޭހަ އަގުތަކަކަށް ކަމަށް މިނިސްޓަރު ވިދާޅުވިއެވެ.
”ހީނާމާގޭ ބިމުގައި ޒަމާނީ ޕާކިންގ ވަސީލަތެއް ގާއިމުކުރުމަށްޓަކައި އަޅުގަނޑުމެންނަށް ބަޔަކު އައިޑެންޓިފައި ކުރެވި، އެ ފަރާތާއެކު މިހާރު މަޝްވަރާތައް ކުރިއަށް އެބަދޭ. ހަމައެއާއެކު ރައީސް މުޢިއްޒު ވަނީ މިފަދަ ދެވަނަ އިމާރާތެއް އެޅުމަށް ބޭނުންވާ ބިންވެސް ކަނޑައަޅުއްވާފައި. އެއީ ގައުމީ ޔުނިވަރސިޓީގެ އިމާރާތާ ޖެހިގެން އޮތް ބިން،“ – މިނިސްޓަރު ސަޢީދު ވިދާޅުވިއެވެ.
މި އިމާރާތްތައް ފަރުމާކުރެވެނީ ދެ ފުރޮޅުލީ އަދި ހަތަރު ފުރޮޅުލީ އުޅަނދުފަހަރަށް ވަކިން ހާއްސަ ޒޯންތަކެއް ހިމެނޭ ގޮތަށެވެ.
މާލެއަށް ދިމާވެފައިވާ ޕާކިންގ މައްސަލައަށް ދާއިމީ ހައްލެއް ގެނައުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، މިފަދަ އިމާރާތްތަކުގެ އިތުރުން ޖާގަ ކުދި ސަރަހައްދުތަކުގައި ޒަމާނީ ”މެކޭނިކަލް ޕާކިންގ“ ނިޒާމުތައް ގާއިމުކުރުމަށް ހަމަޖެހިފައިވާ ކަމަށްވެސް މިނިސްޓަރު ވަނީ އިތުރަށް ވިދާޅުވެފައެވެ.
