އެމެރިކާ އަދި އީރާނާ ދެމެދު އުފެދިފައިވާ އަސްކަރީ ނުތަނަވަސްކަން އިންތިހާއަށް އިތުރުވެ، ދެ ޤައުމުން އެކަކު އަނެކަކުގެ ތެޔޮ ޓޭންކަރުތަކަށާއި އުޅަނދުފަހަރަށް ވަރުގަދަ ހަމަލާތަކެއް ދޭން ފަށައިފިއެވެ.
މި ހަމަލާތަކާ ގުޅިގެން ދުނިޔޭގެ ބާޒާރުގައި ސާފުނުކުރާ ތެލުގެ އަގު ފީފާއަކަށް 100 އެމެރިކާ ޑޮލަރަށް އުފުލުމުގެ ބިރު ވަނީ ބޮޑުވެފައެވެ.
އެމެރިކާގެ އަސްކަރިއްޔާއިން ހާމަކުރި ގޮތުގައި، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން އެމެރިކާގެ ކަނޑުގެ ސިފައިންގެ މަނަވަރަކަށް ބެލިސްޓިކް މިސައިލް ހަމަލާތަކެއް ދިނުމާ ގުޅިގެން، ރައްދުގައި އެމެރިކާއިން ވަނީ އީރާނުގެ ސާފުނުކުރާ ތެޔޮ އުފުލާ ފަސް ޓޭންކަރެއް ހަލާކުކޮށްލާފައެވެ.
އެމެރިކާގެ މި ހަމަލާތަކަށް ރައްދު ދެމުން އައި.އާރު.ޖީ.ސީ އިން ބުނެފައިވަނީ، އެ ލަޝްކަރުން އެމެރިކާގެ ދެ އުޅަނދަކަށާއި، ތެޔޮ އުފުލާ އަށް ޓޭންކަރަކަށް އަމާޒުކޮށް ކާމިޔާބު ހަމަލާތަކެއް ދީފައިވާ ކަމަށެވެ. މީގެ އިތުރުން، އެމެރިކާގެ ހިތްވަރާއި އެހީތެރިކަމާއެކު ކަނޑުއޮޅީގެ ”މަނާ އަދި ނުރައްކާތެރި ސަރަޙައްދެއް“ ހުރަސްކުރަން އުޅުނު ޤަވާޢިދާ ޚިލާފު އިތުރު 10 އުޅަނދަކަށް ވެސް ހަމަލާދީފައިވާ ކަމަށް އީރާނުން ބުނެއެވެ.
ހަމައެއާއެކު، އުރުދުންގައި އެމެރިކާ ސިފައިން ޤާއިމުވެ ތިބޭ އަސްކަރީ މަރުކަޒަކަށް ވެސް އައި.އާރު.ޖީ.ސީ ގެ ފައުޖުތަކުން ހަމަލާދީފައިވާ ކަމަށް އެ ޖަމާޢަތުން ވަނީ އިޢުލާނުކޮށްފައެވެ. އަދި ކުވައިތާއި ބަޙްރައިން ސަރަޙައްދުގައި ހުރި ތެޔޮ ޓޭންކަރުތަކަށް ހަމަލާދޭނެ ކަމުގެ އިންޒާރު ދެމުން، އީރާނުގެ ކަނޑުގެ ސިފައިން ވަނީ އެ އުޅަނދުފަހަރުގެ ފަޅުވެރިން ވަގުތުން އުޅަނދުތައް ދޫކޮށް ދިއުމަށް އަންގާފައެވެ.
މި ހަމަނުޖެހުންތަކާ ގުޅިގެން އެމެރިކާގެ ޚާރިޖީ ވަޒީރު މާކޯ ރޫބިއޯ ވަނީ ތެހެރާނަށް ވަރުގަދަ އިންޒާރެއް ދެއްވާފައެވެ. އޭނާ ވިދާޅުވީ، އެމެރިކާގެ އަސްކަރީ މަނަވަރުތަކަށް ހަމަލާދޭން މަސައްކަތްކުރާ ކޮންމެ ފަހަރަކު، އޭގެ ބަދަލުހިފުމުގެ ގޮތުން އީރާނުގެ ތެޔޮ ޓޭންކަރުތަކަށް އެމެރިކާއިން ދެމުންގެންދާ ހަމަލާތައް މެދުކެނޑުމެއްނެތި ކުރިއަށް ގެންދާނެ ކަމަށެވެ.
