ފައިސާ ބަލައިގަތުމުގެ އިންތިޒާމު ހަމަޖެއްސުމަށް ފޮނުވި އޮފީސް މެމޯއެއްގެ ހަގީގަތް އޮޅުވާލައިގެން އެންމެ ނޭދެވޭ ގޮތުގައި ފަތުރަމުންދާތީ، މިނިސްޓަރު ޑރ. ޢަބްދުﷲ މުއްޠަލިބް ކަންބޮޑުވުން ފާޅުކުރައްވައިފިއެވެ.
މިނިސްޓަރު މުއްޠަލިބް މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، ދައުރުވަމުންދާ ލިޔުމަކީ ހަމައެކަނި ފައިސާ ބަލައިގަތުމުގެ ކަންކަން ފަސޭހަކޮށްދިނުމުގެ ގޮތުން އެތެރޭގައި ފޮނުވާފައިވާ އޮފީސް މެމޯއެއް ކަމަށެވެ. ނަމަވެސް އެ މެމޯގެ ހަގީގަތް އޮޅޭގޮތަށް ވާހަކަ ފަތުރަމުންދަނީ އެންމެ ގޯސް މާނަ ނެގޭ ގޮތަށް ކަމަށް މިނިސްޓަރު ފާހަގަކުރެއްވިއެވެ.
An office memo, sent only to facilitate receipt of a payment, is being spun in the worst possible way, harming a civil staff and an elderly man who has fought for 23 years to correct an injustice. The Ministry will issue a statement tomorrow.
— Abdulla Muththalib (@muththo) September 8, 2026
މިނިސްޓަރު އިތުރަށް ވިދާޅުވީ، މިކަމުގެ ސަބަބުން ސިވިލް ސާވިސްގެ މުވައްޒަފަކަށާއި، އޭނާއަށް ލިބުނު ބޮޑު ބޭއިންސާފެއް ރަނގަޅުކުރުމަށްޓަކައި ވޭތުވެދިޔަ 23 އަހަރު ދުވަހު މަސައްކަތްކުރި ދުވަސްވީ މީހަކަށް ނުހަނު ބޮޑު ގެއްލުމާއި ހިތާމަ ލިބެމުންދާ ކަމަށެވެ.
މީސް މީޑިއާގައި އާންމުވެފައިވާ ލިޔުމަކުން ފެންނަ ގޮތުގައި ހުޅުމާލެއިން 1،250 އަކަފޫޓުގެ ބިމެއް، އަކަފޫޓަކަށް 375ރ. ގެ ރޭޓުން ވަނީ ވިއްކައިފައެވެ. ހައުސިން މިނިސްޓްރީގެ އޮފީސް މެމޯގައިވާ ގޮތުން ބިމުގެ ޖުމްލަ އަގަކީ 468,750ރ. އެވެ.
އެ މެމޯގައިވާ ގޮތުން އެޑްވާންސަށް ދައްކަން ޖެހޭނީ 50،000ރ. އެވެ. ބާކީ ބައި ފަސް އަހަރަށް ބަހާލާފައިވާ ކަމަށް ވެސް އޭގައިވެއެވެ.
ހުޅުމާލެ ދެވަނަ ފިޔަވަހިން ނުއަގުގައި ބިމެއް ވިއްކި ކަމަށް ބުނެ ދައުރުކުރަމުން ދަނީ އިންސާފު ނުލިބި 23 އަހަރުވެފައިވާ މީހަކާ ގުޅޭ ލިޔެކިޔުންތަކެއް ކަމަށް މިނިސްޓަރު މުއްތަލިބް ވަނީ ވިދާޅުވެފައެވެ.
މި މައްސަލައާ ގުޅިގެން ކަން ހިނގާފައިވާ ގޮތުގެ ތަފުސީލު ހާމަކުރުމަށްޓަކައި، މިނިސްޓްރީގެ ފަރާތުން މިއަދުގެ ވަގުތެއްގައި ރަސްމީ ބަޔާނެއް ނެރުމަށް ހަމަޖެހިފައިވާ ކަމަށްވެސް މިނިސްޓަރު މުއްޠަލިބް ވަނީ ވިދާޅުވެފައެވެ.
