ބައިނަލްއަގުވާމީ ބީޗް ވޮލީބޯޅަ މުބާރާތެއްގައި އިންސާފުކުރި ފުރަތަމަ ދިވެހި އަންހެން ރެފްރީގެ ތާރީހީ ޝަރަފު، އޭޝިއަން އިންޓަރނޭޝަނަލް ރެފްރީ ކެންޑިޑޭޓް އައިދާ އަބްދުލްހަކީމް ހޯދައިފިއެވެ.
އާއިދާ މި ފަހުރުވެރި ކާމިޔާބީ ހާސިލުކޮށްފައިވަނީ މިހާރު ބޫޓާނުގައި ކުރިއަށްދާ ”ކާވާ ބީޗް ވޮލީބޯލް ޓުއާ – ބޫޓާން އޯޕަން 2026“ ގައެވެ. މި މުބާރާތުގައި އޭނާ ވަނީ ފުރަތަމަ ރެފްރީއެއްގެ ގޮތުގައި ކޯޓަށް ނުކުމެ، ނުހަނު އިތުބާރާއި ފުރިހަމަ ހުނަރާއެކު މެޗުތަކުގައި އިންސާފުކޮށްދީ ގިނަ ބައެއްގެ ސަމާލުކަމާއި ތައުރީފު ހޯދައިފައެވެ. މިއާއެކު، އާއިދާ މިވަނީ ރާއްޖޭގެ ކުޅިވަރުގެ ދިގު ތާރީހުގައި އަންހެނުން ހޯދަމުންދާ ކާމިޔާބީތަކުގެ ސަފުހާތަކުގައި އޭނާގެ ނަން ރަން އަކުރުން ފަވާލައިފައެވެ.
މިއީ ކުޅިވަރުގެ މައިދާނުގައި އިންސާފުކުރުމަށް ދިވެހި އަންހެނުންނަށް ލިބިގެންދިޔަ ވަރަށް ބޮޑު ބާރެކެވެ. އަދިހަމައެހެންމެ މިއީ ދުނިޔެއާއި ސަރަހައްދީ ފެންވަރުގެ ބޮޑެތި މުބާރާތްތަކުގައި ދިވެހި އޮފިޝަލުންގެ ހުނަރާއި ދައުރު ދުވަހުން ދުވަހަށް ފުޅާވެ، ބަލައިގަންނަމުން އަންނަކަމުގެ އަލިގަދަ ހެއްކެކެވެ.
ވޮލީ ބޯލް އެސޯސިއޭޝަން އޮފް ދަ މޯލްޑިވްސް (ވީއޭއެމް) ގެ ނައިބު ރައީސްކަން ވެސް ކުރަމުން ގެންދާ އާއިދާ ވަނީ 2015 ވަނަ އަހަރު ރެފްރީކަމުގެ ގައުމީ ކޯސް ވެސް ފުރިހަމަކޮށްފައެވެ. އަދި 2024 ވަނަ އަހަރު ކާވާ ބީޗް ރެފްރީ ކޯސް ފުރިހަމަކުރުމަށްފަހު، މި އަހަރުގެ މެއި މަހު އޭނާ ވަނީ އޭވީސީ ކޯސް ވެސް ފުރިހަމަކޮށްފައިކަން ފާހަގަކޮށްލަންޖެހެއެވެ.
އޭޝިއަން ވޮލީބޯލް ކޮންފެޑެރޭޝަން (އޭވީސީ) އިން މުޅި އޭޝިއާ ސަރަހައްދުގައި ބީޗް ވޮލީބޯޅަ ކުރިއަރުވައި ފުޅާކުރުމަށް ކުރަމުންދާ މަސައްކަތްތަކުގެ ތެރެއިން، އޮފިޝަލުން ތަމްރީނުކުރުމަށް ލިބޭ މިފަދަ ބައިނަލްއަގުވާމީ ފުރުސަތުތަކުގެ ބޭނުން ދިވެހި އޮފިޝަލުން ދަނީ އެންމެ ފުރިހަމަ ގޮތުގައި ހިފަމުންނެވެ. އާއިދާގެ މި ކާމިޔާބީއަކީ، ކުޅިވަރުގެ މައިދާނުގައާއި ވަކިން ހާއްސަކޮށް ކުޅިވަރުގައި އިންސާފުކުރުމުގެ ދާއިރާއިން ކުރިއަށްދާން ބޭނުންވާ ޒުވާން ގިނަ އަންހެންނަށް ލިބިގެންދިޔަ ވަރަށް ބޮޑު ހިތްވަރެކެވެ.
