އޭޝިއަން ފުޓްބޯޅަ ކޮންފެޑެރޭޝަން (އޭއެފްސީ) 20 އަހަރުން ދަށުގެ އޭޝިއަން ކަޕް ކޮލިފައިންގެ ޑިވެލޮޕްމަންޓް ފޭސް ކާމިޔާބުކަމާއެކު ނިންމާލައި، މުބާރާތުގެ ކޮލިފައިން ފޭހުން ފުރުޞަތު ހޯދި ރާއްޖޭގެ 20 އަހަރުން ދަށުގެ ޤައުމީ ފުޓްބޯޅަ ޓީމު އެނބުރި ރާއްޖެ އައުމުން ހޫނު މަރުޙަބާއެއް ކިޔައިފިއެވެ.
ރާއްޖޭގެ ޒުވާން ޓީމު މާލެ އައުމުން މާފަންނު ބަސް ޓާމިނަލް ސަރަޙައްދުން އެ ޓީމަށް މަރުޙަބާ ވިދާޅުވީ ކުޅިވަރާއި ހަށިހެޔޮކަމާ ބެހޭ ވުޒާރާގެ ސްޓޭޓް މިނިސްޓަރު އަޙްމަދު ރައްޒާޤާއި، ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް އަޙްމަދު ޠާރިޤް (ޓޮމް) ގެ އިތުރުން އެ އެސޯސިއޭޝަނުގެ އިސްވެރިންނެވެ.
މި މުބާރާތުގެ ކޮލިފައިން ފޭސްއަށް ރާއްޖެ ދަތުރުކުރީ، ޑިވެލޮޕްމަންޓް ފޭސްގައި ވާދަކުރި ގްރޫޕުގެ ދެވަނަ ޓީމުގެ ގޮތުގައެވެ. އެއީ ކުޅުނު މެޗުތަކުން ޖުމްލަ 6 ޕޮއިންޓް ހޯދައިގެންނެވެ. އެގޮތުން މުބާރާތުގެ ފުރަތަމަ މެޗުގައި ބުރުނާއީއާ ބައްދަލުކޮށް 2-0 އިން ރާއްޖެ މޮޅުވިއިރު، ދެވަނަ މެޗުގައި އަވައްޓެރި ސްރީލަންކާގެ މައްޗަށް ރާއްޖެއިން ވަނީ 4-0 ގެ ފުރިހަމަ ނަތީޖާއަކުން ކުރިހޯދާފައެވެ. މިއީ މުބާރާތަށް ފުރުމުގެ ކުރިންވެސް ކޯޗު ޝާކިރު ކަނޑައެޅި މައިގަނޑު އަމާޒެވެ.
ޒުވާން ޤައުމީ ޓީމުން ހޯދި މި ކާމިޔާބީއަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވަނީ ތައުރީފު ކުރައްވާފައެވެ. ވަޒީރު ވިދާޅުވީ ޑިވެލޮޕްމަންޓް ފޭސްގައި ކުޅުންތެރިން ދެއްކި މޮޅު ކުޅުމާމެދު ފަޚުރުވެރިވެވަޑައިގަންނަވާ ކަމަށެވެ. އަދި ކުރިއަށް އޮތް ކޮލިފައިން ފޭސްއަށް ނުކުންނައިރުވެސް އެއް ޓީމެއްގެ ގޮތުގައި އިތުރު ހިތްވަރެއް ލައިގެން މަސައްކަތްކޮށް، ރާއްޖޭގެ ފުޓްބޯޅައަށާއި ޤައުމަށް އިތުރު ރީތި ނަމާއި ކާމިޔާބީ ހޯދައިދިނުމަށް ވަޒީރު ވަނީ ޓީމުގެ ކުޅުންތެރިންނަށް އިލްތިމާސްކުރައްވާފައެވެ.
