ލ. ގަމުގައި ސަރުކާރުން ކުރިއަށްގެންދާ 100 ހައުސިންގ ޔުނިޓު އެޅުމުގެ މަޝްރޫޢުގެ 95.5 އިންސައްތަ މަސައްކަތް ނިމި، މިހާރު ކުރިއަށްދަނީ އެންމެ ފަހުގެ ފިނިޝިންގ މަސައްކަތްތައް ކަމަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރއިން ހާމަކޮށްފިއެވެ.
ކޮންސްޓްރަކްޝަން މިނިސްޓްރީން ބުނީ ދަޢުލަތުގެ ޕީއެސްއައިޕީ (ޕަބްލިކް ސެކްޓަރ އިންވެސްޓްމަންޓް ޕްރޮގްރާމް) ބަޖެޓުން ޚަރަދުކޮށްގެން ގަމުގައި ކުރިއަށްގެންދާ މި މަޝްރޫޢުގެ ބޮޑުބައި މިހާރު ނިމިފައިވާ ކަމަށެވެ. އެގޮތުން ހުރިހާ ޔުނިޓުތަކެއްގެ މައިގަނޑު އޮނިގަނޑު އެއްކޮށް ނިމި، މިހާރު ކުރިއަށްދަނީ އިމާރާތްތަކުގައި ކުލަލުމާއި، ޓައިލްސް ޖެހުން ފަދަ އެންމެ ފަހުގެ ފިނިޝިންގ މަސައްކަތްތަކެވެ.
ލ. ގަމުގައި 100 ހައުސިންގ ޔުނިޓު އެޅުމުގެ މަޝްރޫޢު pic.twitter.com/0NYT43eIhC
— Ministry of Infrastructure, Housing and Urban Dev. (@MIHUDmv) September 8, 2026
މި މަޝްރޫޢުގެ ދަށުން ގަމުގައި އިމާރާތްކޮށްފައިވަނީ 1،000 އަކަފޫޓުގެ، 3 ކޮޓަރީގެ ހައުސިންގ ޔުނިޓްތަކެކެވެ. ރައްޔިތުންނަށް ދިރިއުޅެން ފަސޭހަވާނެހެން ފަރުމާކޮށްފައިވާ މި ޔުނިޓްތަކުގެ ކޮންމެ ކޮޓަރިއަކަށް ވަކި ފާޚާނާއެއް ހުންނާނެއެވެ. މީގެއިތުރުން ފުޅާ ސިޓިންރޫމަކާއި، ބަދިގެއާއި، ކާގެއާއި، ލޯންޑަރީގެ އިތުރުން ސްޓޯ ރޫމެއް ވެސް ކޮންމެ އެޕާޓްމަންޓެއްގައި ހިމެނެއެވެ.
މި މަޝްރޫޢާ ގުޅޭގޮތުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ލ. ގަމުގެ ރައްޔިތުންނާ ބައްދަލުކުރައްވައި ވިދާޅުވެފައިވަނީ، މިހާރު ނިމުމަކާ ހަމައަށް ގޮސްފައިވާ 100 ހައުސިންގ ޔުނިޓު ޚާއްޞަކުރާނީ އެ ރަށުގެ ރައްޔިތުންގެ ބޯހިޔާވަހިކަމުގެ މައްސަލަ ޙައްލުކުރުމަށް ކަމަށެވެ. އަދި ރަށުން ބޭރު މީހުން ބަދަލުކުރުމަށް އެއިން އެއްވެސް ޔުނިޓެއް ދޫނުކުރައްވާނެ ކަމުގެ ޔަޤީންކަން ރައީސް ވަނީ ދެއްވާފައެވެ.
މީގެއިތުރުން ރައީސް މުޢިއްޒު ވަނީ ގަމުގެ ބޯހިޔާވަހިކަން އިތުރަށް ފުޅާކުރުމުގެ ގޮތުން އިތުރު 100 ހައުސިންގ ޔުނިޓު އެޅުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާ ހަވާލުކުރެވިފައިވާ ކަމަށް ވިދާޅުވެފައެވެ. އަދި އެހެން ފަރާތަކާ ހަވާލުކޮށްގެން އިތުރު 100 ޔުނިޓުގެ މަސައްކަތްވެސް ވަރަށް އަވަހަށް ފެށިގެންދާނެ ކަމަށާއި، މިގޮތުން އެކި މަރުޙަލާތަކަކަށް ބަހާލައިގެން ޖުމްލަ 500 ހައުސިންގ ޔުނިޓު ގަމުގައި ތަރައްޤީކުރުމަކީ ސަރުކާރުގެ އަމާޒެއް ކަމަށް އެމަނިކުފާނު ވަނީ ހާމަކުރައްވާފައެވެ.
