މަސްވެރިކަން ތަރައްޤީކޮށް ކުރިއެރުވުމަށް ސަރުކާރުން ކުރަމުންދާ މަސައްކަތްތަކުގެ ދަށުން، ގއ. ދާންދޫގެ އިރުން 16 މޭލު ބޭރުގައި މިއަދު އައު ދޮށީ ކަނދުފައްޗެއް އަޅައިފިއެވެ.
މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން މަޢުލޫމާތު ދެއްވި ގޮތުގައި، މިއަދު އެޅި މި ދޮށީ ކަނދުފަތީގެ ނަންބަރަކީ O10D02-01 އެވެ. އަދި މި ކަނދުފަތި އަޅާފައިވާ ލޮކޭޝަނަކީ: 0°37.300’ 73°44.100’E އެވެ.
ދާންދޫ ބޭރުގައި މި ޤާއިމްކުރެވުނު ދޮށީ ކަނދުފަތީގެ ސަބަބުން އެ ސަރަޙައްދުގެ މަސްވެރިކަން އިތުރަށް ކުރިއަރައިގެންދާނެ ކަމަށް އެ ވުޒާރާއިން ވިދާޅުވެއެވެ. މީގެއިތުރުން، މި ކަނދުފަތީގެ ސަބަބުން އެ ސަރަޙައްދުގެ މަސްވެރިންނަށާއި، ޚާއްޞަކޮށް ޒުވާން މަސްވެރިންގެ އިތުރުން ސްޕޯޓްސް ފިޝިންގް ނުވަތަ ކުޅިވަރުގެ ގޮތުގައި މަސްވެރިކަންކުރާ ފަރާތްތަކަށް ވަރަށް ބޮޑު ލުއިފަސޭހަކަމެއް ލިބިގެންދާނެއެވެ.
ރާއްޖޭގެ އެކި ކަންކޮޅުތަކުގައި ކަނދުފަތި އެޅުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސްވެރިކަމުގެ ސިނާޢަތް ކުރިއެރުވުމަށް ގެންގުޅުއްވާ ސިޔާސަތުގެ ދަށުން ޚާއްޞަ އިސްކަމެއް ދީގެން ކުރިއަށްގެންދާ މުހިންމު މަސައްކަތެކެވެ. އެގޮތުން، ކުރިއަށް އޮތް ތަނުގައިވެސް ރާއްޖޭގެ އެކި ސަރަޙައްދުތަކުގައި ކަނދުފަތި ޤާއިމްކުރުމުގެ މަސައްކަތް ފިޝަރީޒް މިނިސްޓްރީން ހުއްޓުމެއްނެތި ކުރިއަށް ގެންދާނެ ކަމަށް އެ ވުޒާރާއިން ހާމަކުރައްވައެވެ.
