އޮންލައިން ނޫސް ”އަދަދު“ ގެ ނޫސްވެރިން މަސްތުވާތަކެތި ބޭނުންކުރާ ޕާޓީތަކަށް ދިޔުމަކީ އެމީހުންގެ އަމިއްލަ ކަމެއް ކަމަށް އެ ނޫހުގެ ޗީފް އެގްޒެކެޓިވް އޮފިސަރު (ސީއީއޯ) ހުސެއިން ފިޔާޒު މޫސާ ވިދާޅުވެއްޖެއެވެ.
ފިޔާޒު މިހެން ވިދާޅުވީ، ދާދިފަހުން ފުލުހުންގެ ޑްރަގް އެންފޯސްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން މާލޭގައި ހިންގި ހާއްސަ އޮޕަރޭޝަނެއްގައި، ގިނަ އަދަދެއްގެ މަސްތުވާތަކެއްޗާއެކު ހައްޔަރުކުރި ތިން މީހުންގެ ތެރޭގައި އަދަދު ނޫހުގެ ޕްރެޒެންޓަރަކު ހިމެނޭ ކަމަށް ”އެކިއެމްވީ“ އިން ރިޕޯޓުކުރި ޚަބަރަކާ ގުޅިގެންނެވެ.
މި ޚަބަރާ ގުޅިގެން ހިތްހަމަނުޖެހުން ފާޅުކޮށް ފިޔާޒު އެކިއެމްވީގެ ނަންބަރަށް ފޮނުވި މެސެޖުތަކެއްގައި ވަނީ، އެ ނޫހުގައި މަސައްކަތްކުރާ ނޫސްވެރިން ކުރާ ހުރިހާ ކަމެއްގެ ޒިންމާ ނޫހުން ނަގަން ނުޖެހޭނެ ކަމަށް ބުނެފައެވެ. އަދި ހައްޔަރުކުރި މީހާއަކީ ކުރިން އެ ނޫހުގައި އުޅުނު މީހެއް ކަމަށާއި، އޭނާ ވަކިވެފައިވާކަން ފޭސްބުކުން ފެންނަން ހުންނާނެ ކަމަށް ބުނެ ޚަބަރު ދޮގުކުރަން ފިޔާޒު މަސައްކަތް ކުރެއްވިއެވެ. އެހެންނަމަވެސް މީގެ ފަސް ދުވަސް ކުރިން މި ޚަބަރު އެކިއެމްވީގައި ޝާއިއުކުރީ ހައްޔަރުކުރި ފަރާތުގެ ސޯޝަލް މީޑިއާ ޕްރޮފައިލްތަކަށާއި، އަދަދު ނޫހުގައި ޝާއިއުކޮށްފައިވާ ކޮންޓެންޓްތަކަށް ބެލުމަށްފަހުގައެވެ. އޭނާގެ ޕްރޮފައިލްގައިވެސް އޭނާ އަދަދު ނޫހުުން ވަކިވިކަމެއް ހާމަކޮށްފައެއް ނުވެއެވެ.
މީގެއިތުރުން އަދަދު ނޫހުގެ ފިރިހެން ނޫސްވެރިއެއްވެސް މީގެކުރީގައި މަސްތުވާތަކެތީގެ ކުށުގައި ހައްޔަރުކޮށްފައިވެއެވެ. އަދި މީގެކުރިން ފުލުހުން ބުނި ގޮތުގައި އެ ނޫސްވެރިޔާ އަކީ ފުލުހުންގެ ވާޖިބަށް ހުރަސް އެޅުމުގެ ކުށުގެ ރެކޯޑްވެސް އޮތް މީހެކެވެ.
އަދަދު ނޫހުގެ ދެ ނޫސްވެރިއަކު މިހާރުވެސް މަސްތުވާތަކެތި ބޭނުންކުރާ ޕާޓީތަކަށް ދާ ކަމަށް މަޢުލޫމާތު ލިބޭކަމަށާއި، އެކަމުގެ ސަބަބުން ދެރަގޮތެއް ވެދާނެ ކަމަށް ބުނެ ފިޔާޒުއަށް ހެޔޮއެދޭ ފަރާތަކުން މެސެޖު ކުރުމުން ފިޔާޒު ވަނީ ”އެއީ އެމީހެއްގެ އަމިއްލަ ކަމެއް“ ކަމަށް ބުނެ ޖަވާބު ދީފައެވެ. އަދި އޭގެ އިތުރުން ”މި ރާއްޖޭގެ ގިނަ ބަޔަކު މަސްތުގައި“ އުޅޭ ކަމަށް ވެސް އޭނާ ވަނީ މެސެޖުގައި ފާހަގަކޮށްފައެވެ.
މަސްތުވާތަކެތީގެ ވަބާއާ ދެކޮޅަށް މުޖުތަމައު ހޭލުންތެރިކުރުވުމުގައި މީޑިއާތަކުގެ ދައުރު ބޮޑުއިރު، ނޫސްވެރިންގެ ފަރާތުން ފެންނަ މިފަދަ ނޭދެވޭ އަމަލުތަކަކީ އަމިއްލަ ކަމެއްގެ ގޮތުގައި ދޫކޮށްލުމަކީ ބަލައިގަނެވޭނެ ކަމެއް ނޫނެވެ.
