ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ބެލުމުގެ ދަށުގައިވާ ފްލެޓްތަކުގެ ކުޑަދޮރުތަކާއި ބެލްކަނިތަކުގެ ރައްކާތެރިކަން އިތުރުކުރުމަށްޓަކައި، އެހީތެރިކަމަށް އެދުނު ފަރާތްތަކަށް އެ އެހީތެރިކަން ފޯރުކޮށްދިނުމުގެ މަސައްކަތް އެ ކުންފުނިން ފަށައިފިއެވެ.
މިގޮތުން، ހިޔާ ފްލެޓްތަކުގެ ތެރެއިން އެހީތެރިކަމަށް އެދުނު ބައެއް އެޕާޓްމަންޓުތަކުގެ ކުޑަދޮރުތަކުގައި ގްރިލް ހަރުކުރުމުގެ މަސައްކަތް މިއަދު ވަނީ ކުރިއަށް ގެންގޮސްފައެވެ. އެޗްޑީސީން ބުނެފައިވާ ގޮތުގައި، މިއީ އެ ފްލެޓްތަކުގައި ދިރިއުޅޭ އާއިލާތަކާއި، ހާއްސަކޮށް ކުޑަކުދިންގެ ރައްކާތެރިކަމާއި އަމާންކަން ކަށަވަރުކުރުމަށް އެޅުނު މުހިންމު ފިޔަވަޅެކެވެ.
އެޗްޑީސީން އަބަދުވެސް އެންމެ ބޮޑު އިސްކަމެއް ދެނީ ކުންފުނީގެ ބެލުމުގެ ދަށުގައިވާ ފްލެޓްތަކުގައި ދިރިއުޅޭ ރައްޔިތުންނާއި މުޅި ހުޅުމާލޭގެ މުޖުތަމައުގެ ސަލާމަތާއި ރައްކާތެރިކަން ކަށަވަރުކުރުމަށް ކަމަށް އެ ކުންފުނިން ވަނީ ބުނެފައެވެ.
މީގެއިތުރުން، އެއްމެދު އިމާރާތްތަކުގެ ރައްކާތެރިކަމުގެ ފެންވަރު މަތިކުރުމުގެ ގޮތުން، ކުޑަދޮރުތަކާއި ބެލްކަނީގެ ރެއިލިންގ ފަދަ ތަންތަން ހުރީ ކަނޑައެޅިފައިވާ މިންގަނޑުތަކާ އެއްގޮތަށްތޯ ބަލައި، އެފަދަ ތަންތަން ގަވާއިދަށް ފެއްތުމަށާއި މަރާމާތުކުރުމަށް ރައްޔިތުންނަށް އެހީތެރިކަން ފޯރުކޮށްދިނުމަށް ވަނީ ނިންމައިފައެވެ.
އެހެންކަމުން، ހުޅުމާލޭގެ އެއްމެދު އިމާރާތްތަކުގެ އެޕާޓްމަންޓުތަކުގައިވާ ކުޑަދޮރުތަކާއި ބެލްކަނީ ރެއިލިންގ ފަދަ ތަންތަން މަރާމާތުކުރުމަށް އެހީތެރިކަން ބޭނުންވާ ފަރާތްތަކަށް، އެކަމަށް އެދި ހުށަހެޅުމުގެ ފުރުސަތު މިހާރު ވަނީ ހުޅުވާލެވިފައެވެ.
