ތިން މިނިސްޓްރީގައި ރޯވި ހާދިސާގެ މައުލޫމާތު ނޭނގޭ ކަމަށް ބުނެ ކުރީގެ ރައީސް އަބްދުﷲ ޔާމީން އަބްދުލްގައްޔޫމް ފުލުހުންގެ ތަހުގީގަށް ފިލައިފިއެވެ.
ރޭ ޕީއެންއެފުން ބޭއްވި ފްރަންޓު ޖަލްސާގައި ރައީސް ޔާމީން ވަނީ ތިން މިނިސްޓްރީގައި ރޯކޮށްލީކަމަށް ތުހުމަތުކުރައްވާފައެވެ. އަދި އެކަން ކުރެއްވީ ރައީސް ޑރ. މުހައްމަދު މުއިއްޒުއަށްވެސް އެނގިވަޑައިގަންނަވާ މީހެއްކަމުގެ ތުހުމަތު ކުރެއްވިއެވެ. އަދި އެ މައުލޫމާތު ފުލުހުންގެ އިދާރާގައި އެބަހުރި ކަމަށްވެސް ރައީސް ޔާމީން ވިދާޅުވި އެވެ.
އެ ތުހުމަތުތައް ރައީސް މުއިއްޒު މިއަދު ދޮގުކުރައްވައި ވިދާޅުވީ ރައީސް ޔާމީން ފަދަ ވެރިކަން ކުރައްވާފައިވާ ބޭފުޅަކު އެފަދަ ތުހުމަތެއް ކުރެއްވުމުން ހިތާމަކުރައްވާ ކަމަށެވެ.
ރައީސް ޔާމީންގެ ވާހަކަތައް ތަހުގީގުކުރަން ހޯމް މިނިސްޓަރު އަލީ އިހްސާންވެސް ވަނީ ފުލުހުންނަށް އަންގައިފައެވެ.
ރައީސް ޔާމީން ކުރެއްވި ތުހުމަތުތައް ރައީސް މުއިއްޒު ދޮގުކުރެއްވިއިރު ރައީސް ޔާމީންގެ ގާނޫނީ ވަކީލުންގެ ޓީމުގެ ފަރާތުން ހަމްޒާ ލަތީފު ސޮއިކުރައްވައި ކޮމިޝަނަރު އޮފް ޕޮލިސް އަހުމަދު މުހައްމަދަށް މިއަދު ފޮނުއްވި ސިޓީގައި ވަނީ ފުލުހުން ރައީސް ޔާމީނާ މިއަދުގެ އެކި ވަގުތުތަކުގައި ޗިޓެއް ހަވާލުކުރަން މަސައްކަތް ކުރި ކަމަށެވެ
އެ ޗިޓުގައި ބަޔާންކޮށްފައިވާ ގޮތުގައި ފުލުހުން ދެކެވަޑައިގަންނަވާ ގޮތުގައި ރައީސް ޔާމީނަކީ ގްރީން ބިލްޑިން ގައި ހިނގި އަލިފާނުގެ ހާދިސާއާ ގުޅިގެން ފުލުހުން ހިންގާ ތަހުގީގަށް މައުލޫމާތު ދެވިދާނެ ބޭފުޅެއް ކަމަށާއި ނަމަވެސް ގްރީން ބިލްޑިންގައި ހިނގި އަލިފާނުގެ ހާދިސާއާ ބެހޭ ގޮތުން އާންމުކޮށް ޝާއިއުކޮށްފައިވާ މައުލޫމާތެއް ފިޔަވައި އެެއްވެސް އިތުރު މައުލޫމާތެެއް ރައީސް ޔާމީނަށް ލިބިވަޑައިގެންފައި ނެތް ކަމަށް ހަމްޒާގެ ސިޓީގައި ވިދާޅުވިއެވެ.
”އާންމު މަހައްލެއްގައިވެސް އަޅުގަނޑުގެ މުވައްކިލު ވިދާޅުވެފައިވާނީ އެ މައްސަލައަކީ ފުލުހުން ތަހުގީގުކުރައްވާފައިވާ މައްސަލައެއްކަމަށްވާތީ އެ ހާދިސާ ހިނގަން މެދުވެރިވި ސަބަބުން އެނގިވަޑައިގަންނަވާނީ ދިވެހި ފުލުހުންނަށް ކަމަށެވެ“ ހަމްޒާގެ ސިޓީގައިވެއެވެ.
ހަމްޒާ ވިދާޅުވީ، ރައީސް ޔާމީންގެ ފަރާތުން ތަހުގީގަށް އިތުރު ކުރިއެރުމެއް ލިބޭނެ މައުލޫމާތެއް ދެވެން ނެތް ހާލަތުގައި ފުލުހުންގެ މަރުކަޒަށް ހާޒިރުވުމަކީ ބޭނުންތެރިކަމެއް ކަމުގައި ފުލުހުންވެސް ގަބޫލުފުޅު ނުކުރައްވާނެކަން ޔަގީންކުރައްވާ ކަމަށެވެ.
ރައީސް ޔާމީނަކީ ދެއުޅިއެއްނުވާޒާތުގެ ވާހަކަދައްކަވާބޭފުޅެއް އެއީ މިހާރަކައް އައިސް ދެވަނަ ނަޝީދު ދައްކަވާވާހަކަ ދިމާނުވާނެ އެއީ ނަޝީދާގުޅުނުފަހުން ރައީސް ޔާމީނު ގަބޫލުކުރައްވާނެ މީތެދެއްކަން