މަހަކު 60،000 ރުފިޔާއަށްވުރެ ގިނައިން އާމްދަނީ ލިބޭ ފަރާތްތަކުން އާސަންދައިގެ ޚިދުމަތް ހޯދާއިރު އަމިއްލަ ޖީބުން ކޮންޓްރިބިއުޓް ކުރަންޖެހޭ ގޮތަށް އާސަންދަ ނިޒާމު އިޞްލާޙު ކުރަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމަކީ ކޮންމެހެން ބޭނުންތެރި އިޞްލާޙެއް ކަމަށް ވިދާޅުވެ، ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަޙްމަދު އަޒާން އެ ނިންމެވުމަށް ފުރިހަމައަށް ތާއީދުކުރައްވައިފިއެވެ.
ރައީސް ޑރ. މުޢިއްޒު ބޭއްވެވި ނޫސްވެރިންގެ ބައްދަލުވުމެއްގައި އިއުލާންކުރެއްވި މި ނިންމެވުމާ ގުޅިގެން މެންބަރު އަޒާން ކުރެއްވި ސޯޝަލް މީޑިއާ ޕޯސްޓެއްގައި ވިދާޅުވީ، މިއީ ދައުލަތުގެ ވަސީލަތްތައް އެންމެ ބޭނުންޖެހިފައިވާ ފަރާތްތަކަށް ސީދާ ގޮތެއްގައި ފޯރުކޮށްދިނުމަށް އެޅުނު މުހިންމު ފިޔަވަޅެއް ކަމަށެވެ. މި ބަދަލާއެކު އަހަރަކު ގާތްގަނޑަކަށް 287 މިލިއަން ރުފިޔާ ދައުލަތަށް ސަލާމަތް ކުރެވޭނެ ކަމަށް އަންދާޒާ ކުރެވެއެވެ.
އަޒާން އިތުރަށް ފާހަގަކުރެއްވި ގޮތުގައި، އާސަންދަ ނިޒާމު އިޞްލާޙުކުރުމާއި ސަބްސިޑީތައް ހައްގުވެރިންނަށް ސީދާ ދެވޭނެ ނިޒާމެއް ގާއިމުކުރުމަކީ ބައިނަލްއަގުވާމީ މާލީ އިދާރާތައް ކަމަށްވާ އައިއެމްއެފް (IMF) އާއި ވޯލްޑް ބޭންކުން ވެސް ރާއްޖެއަށް ދެމުން އަންނަ މުހިންމު ލަފައެކެވެ. ރައީސް މުޢިއްޒުގެ ސަރުކާރުން މި ނެންގެވީ އެ މިޞްރާބަށް އެޅުއްވި ވަރަށް މުހިންމު ފިޔަވަޅެއް ކަމަށް އޭނާ ވިދާޅުވިއެވެ.
President @MMuizzu ‘s decision to require those earning above MVR 60,000 a month to contribute towards their Aasandha coverage is a necessary reform that I fully support. With projected annual savings of MVR 287 million, this will help direct public resources towards those who…
— Ahmed Azaan (@axanner) September 7, 2026
މީގެއިތުރުން، މިއީ ހަމައެކަނި އާސަންދައިން ފެށޭ ބަދަލެއްގެ ގޮތުގައި ނުބާއްވައި، ދައުލަތުގެ އެހެނިހެން ދާއިރާތަކުން ދެވޭ ސަބްސިޑީތައް ވެސް ހައްގުވެރިންނަށް އެކަނި ލިބޭނެ ފަދަ ޓާގެޓެޑް ސަބްސިޑީ ނިޒާމަކަށް ބަދަލުކުރުމުގެ ފެށުމަކަށް ވާންޖެހޭނެ ކަމަށްވެސް އަޒާން ވިދާޅުވިއެވެ.
