ދިވެހިރާއްޖޭގެ މުވާސަލާތީ މައި ކުންފުނި ދިރާގުގެ ސަރުކާރު ހިއްސާ 51 އިންސައްތައަށް ބޮޑުކުރުމަށާއި، މާލޭ ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) ގެ ބޭރު ކުންފުންޏަކަށް ވިއްކާލާފައިވާ ހިއްސާތައް އަނބުރާ ހޯދުމުގެ މަސައްކަތް ސަރުކާރުން ފަށައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވިދާޅުވީ، ކެބިނެޓުން މިހާރު މި ދެ ނިންމުން ނިންމައި އެ މަސައްކަތްތައް ފަށާފައިވާ ކަމަށެވެ.
ރައީސް ވިދާޅުވީ، ދިރާގަކީ ސަރުކާރުގެ މެޖޯރިޓީ ހިއްސާ އޮތް އަގުހުރި ކުންފުންޏެއް ކަމަށާއި، ނަމަވެސް އެމްޑީޕީގެ ފުރަތަމަ ވެރިކަމުގައި އެ ކުންފުނީގެ މެޖޯރިޓީ ހިއްސާ ވިއްކާލާފައިވާ ކަމަށެވެ. އެހެންކަމުން ރައްޔިތުންގެ ހެވާއި ލާބައަށާއި އިޤްތިޞާދު ފުޅާކޮށް ކުރިއެރުވުމަށްޓަކައި ދިރާގުގެ 51 އިންސައްތަ ހިއްސާ (މެޖޯރިޓީ ކޮންޓްރޯލް) ސަރުކާރަށް ހޯދުމަކީ ކޮންމެހެން ކުރަންޖެހޭ ކަމެއް ކަމުގައި ރައީސް ފާހަގަކުރެއްވިއެވެ. އެމަނިކުފާނު ވިދާޅުވީ، ދިރާގުގެ މެޖޯރިޓީ ހިއްސާ ސަރުކާރަށް އަނބުރާ ހޯދުމަށް ކުރަންޖެހޭ އިދާރީ، ޤާނޫނީ އަދި މާލީ އެންމެހައި މަސައްކަތްތައް ބާރު ސްޕީޑުގައި މިހާރު ކުރިއަށްދާ ކަމަށެވެ.
ދިރާގުގެ އިތުރުން އެމްޑަބްލިޔުއެސްސީއާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، އެމްޑީޕީގެ ސަރުކާރުން ބޭރުގެ ކުންފުންޏަކަށް ވިއްކާލާފައިވާ އެމްޑަބްލިޔުއެސްސީގެ 20 އިންސައްތަ ހިއްސާ އަނބުރާ ގަތުމަށް ވެސް ސަރުކާރުން ނިންމާފައިވާ ކަމަށެވެ. މި ބަދަލާއެކު އެމްޑަބްލިޔުއެސްސީ ވެގެންދާނީ ސައްތައިން ސައްތަ (100 ޕަސެންޓް) ސަރުކާރު ހިއްސާވާ ކުންފުންޏަކަށެވެ.
މި ނިންމުމަކީ ރައްޔިތުންނަށް ދެވޭ ޚިދުމަތްތައް އިތުރަށް ހަރުދަނާކުރުމަށްޓަކައި ނިންމެވި ވަރަށް މުހިންމު ނިންމުމެއްކަން ފާހަގަކުރައްވަމުން، ރައީސް ވިދާޅުވީ އިރާދަކުރެއްވިއްޔާ މި ދެ މަސައްކަތްވެސް ވަރަށް އޮމާންކަމާއެކު ކާމިޔާބުކަމާއެކީ ނިންމާލެވޭނެ ކަމަށެވެ.
އަދި މި ކަންކަމާ ގުޅޭ އިތުރު ތަފުސީލުތައް، ކުރިއަށް އޮތް ދުވަސްތަކުގައި ފިނޭންސް މިނިސްޓަރާއި ކަމާގުޅޭ އެހެނިހެން ވަޒީރުން ހާމަކުރައްވަމުން ގެންދަވާނެ ކަމަށްވެސް ރައީސް މުޢިއްޒު ވިދާޅުވިއެވެ.
