މި ވަގުތު ވެސް ރާއްޖޭގެ އެކި ކަންކޮޅުތަކުގައި 2،000 އަށްވުރެ ގިނަ ދަރިވަރުން ގުރްއާން ހިތުދަސްކުރަމުން އަންނަކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މީޑިއާތަކަށް ހިއްސާކުރެއްވި މެސެޖެއްގައި މިނިސްޓަރު ޝަހީމް ވިދާޅުވީ، ރާއްޖޭގައި ގުރްއާން ހިތުދަސްކުރާ ދަރިވަރުންނާއި ހާފިޒުންގެ އަދަދު އިތުރުވަމުން ދިއުމަކީ އުފާވެރި ކަމެއް ކަމަށެވެ. ވަކިން ހާއްސަކޮށް ޒުވާނުން ގުރްއާން ހިތުދަސްކުރުމަކީ ރާއްޖޭގެ އިސްލާމީ މުސްތަގުބަލު އުޖާލާކޮށްދޭނެ ކަމެއް ކަމަށް ވެސް މިނިސްޓަރު ވަނީ ވިދާޅުވެފައެވެ.
މިނިސްޓަރު ޝަހީމް ވިދާޅުވީ، ހާފިޒުންގެ އަދަދު 322 އަށް އަރާފައިވާ ކަމަށާއި، ރަމަޟާން މަހުގެ ތެރޭގައި ގިނަ އަދަދެއްގެ ހާފިޒުން ދަސްވެނިވާނެ ކަމަށް ލަފާކުރެވޭ ކަމަށެވެ. ރާއްޖޭގެ ކަންކޮޅުތަކުގައި 2،000 އަށްވުރެ ގިނަ ދަރިވަރުން ގުރްއާން ހިތު ދަސްކުރަމުން އަންނަ ކަމަށާއި، އެންމެ ގިނަ ދަރިވަރުން ގުރްއާން ހިތުދަސްކުރަމުންދަނީ ގުރްއާނާ ބެހޭ މަރުކަޒާއި އިލްމު އިންސްޓިޓިއުޓްގައި ކަމަށް މިނިސްޓަރު ވިދާޅުވިއެވެ. ހާފިޒުން އިތުރުކުރުމަކީ ސަރުކާރުން ވަރަށް ބޮޑު އަހައްމިއްޔަތު ކަމެއްދީގެން ކުރަމުން އަންނަ މަސައްކަތެއްކަން ފާހަގަކުރައްވައި ޝަހީމް ވިދާޅުވީ، މި ދައުރުގެ ތެރޭގައި ހާފިޒުންގެ އަދަދު 500 އަށް އެރުވުމަކީ އެންމެ ބޮޑު އަމާޒު ކަމަށެވެ.
ހާފިޒުންނަށް ހިތްވަރު ދިނުމުގެ ގޮތުން އެ ފަރާތްތަކަށް ދައުލަތުން ދޭ އިނާޔަތް އިތުރުކޮށްފައިވާކަން ފާހަގަކުރައްވަމުން ޝަހީމް ވިދާޅުވީ، ގުރްއާން ހިތުދަސްކުރުމުގެ މަޝްރޫއުތައް ވެސް މި ސަރުކާރުން ފުޅާކޮށްފައިވާ ކަމަށެވެ.
ރާއްޖޭގެ ހުރިހާ ރަށަކަށް ގުރްއާނުގެ އިލްމު ފުޅާކުރުމަށް ސަރުކާރުން ކަނޑައަޅާފައިވާ ސިޔާސަތުގެ ދަށުން 30 ރަށެއްގައި ގުރްއާނާ ބެހޭ މަރުކަޒުގެ ގޮފިތައް ރަޖިސްޓްރީކޮށް އަމަލީ ގޮތުން ހިންގަން ފަށާފައިވާކަން ފާހަގަކުރައްވައި ޝަހީމް ވިދާޅުވީ، އިތުރު 20 ތަނެއް ރަޖިސްޓްރީކުރުމުގެ މަސައްކަތް ވެސް ހަލުވި ދުވެލީގައި ކުރިއަށްދާ ކަމަށެވެ. މީގެ އިތުރުން، އިތުރު 38 ތަނެއް ބިނާކުރުމުގެ މަސައްކަތް ކުރިއަށްދާ ކަމަށާއި، އަމާޒަކީ 2 އަހަރު ތެރޭގައި ހުރިހާ ރަށަކަށް މި މަޝްރޫއު ފުޅާކުރުން ކަމަށް މިނިސްޓަރު ވިދާޅުވިއެވެ.
ޝަހީމް އިތުރަށް ވިދާޅުވީ، ރަށް ރަށުގައި ހިންގާ ގުރްއާން މަރުކަޒުގެ ގޮފިތަކުގައި އިމާމުންނަށް ވެސް ގުރްއާން ކިޔަވައިދިނުމުގެ މަސްއޫލިއްޔަތު ވަޒީފާ ބަޔާނަށް އިތުރުކުރަމުން އަންނަ ކަމަށެވެ.
