ސަރުކާރުގެ ހަރަދުތައް ކުޑަކުރުމުގެ ސިޔާސަތުގެ ދަށުން މިހާތަނަށް 205 ސިޔާސީ މުވައްޒަފުން މަގާމުތަކުން ވަކިކޮށްފައިވާ ކަމަށް ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.
ދައުލަތުގެ މީޑިއާ (ޕީއެސްއެމް) އަށް ދެއްވި ބަސްދީގަތުމެއްގައި މުންދު ވިދާޅުވީ، ސަރުކާރުގެ ހަރަދުތައް ކުޑަކުރުމުގެ ސިޔާސަތުގެ ދަށުން، މިހާތަނަށް 4 މަގާމެއްގައި ތިބި 205 ސިޔާސީ މުވައްޒަފުން ވަކިކޮށްފައިވާ ކަމަށެވެ. އޭގެ ތެރޭގައި ސްޓޭޓް މިނިސްޓަރުންނާއި، ޑެޕިއުޓީ މިނިސްޓަރުންނާއި، ސީނިއަރ ޕޮލިޓިކަލް ޑިރެކްޓަރުންގެ އިތުރުން ޕޮލިޓިކަލް ޑިރެކްޓަރުން މަގާމުތަކުން ވަކިކޮށްފައިވާ ކަމަށް މުންދު ވަނީ ވިދާޅުވެފައެވެ.
މުންދު ވިދާޅުވީ، ސިޔާސީ އެކި މަގާމުތަކުގައި ތިބި މުވައްޒަފުން ވަޒީފާއިން ވަކިކުރުމުގެ މަސައްކަތް އެއްކޮށް އަދި ނުނިމޭ ކަމަށާއި، ކުރިއަށް އޮތް ތަނުގައި ވެސް އިތުރު ސިޔާސީ މުވައްޒަފުން ވަކިކުރުމުގެ މަސައްކަތް ސަރުކާރުން ކުރަމުންގެންދާނެ ކަމަށެވެ. މިކަމުގެ ސަބަބުން ދައުލަތުގެ ހަރަދުތައް ބޮޑުތަނުން ސަލާމަތްކުރެވިގެންދާނެ ކަމަށް ވެސް މުންދު ވަނީ ވިދާޅުވެފައެވެ.
”މިހާތަނަށް މި މަސައްކަތުގެ ތެރެއިން 205 މުވައްޒަފަކު ވަކިކޮށްފައިމިވަނީ. އޭގެތެރޭގައި ސްޓޭޓް މިނިސްޓަރ، ޑެޕިއުޓީ މިނިސްޓަރ، ސީނިއަރ ޕޮލިޓިކަލް ޑައިރެކްޓަރ އަދި ޕޮލިޓިކަލް ޑައިރެކްޓަރގެ މަޤާމުގައި ތިއްބެވި މުވައްޒަފުންގެ ތެރެއިން 205 މުވައްޒަފުން ވަކިކުރެވިއްޖެ. އަދި ނުނިމޭ މަސައްކަތެއް. އެހެންވީމަ ކުރިއަށް އޮތްތަނުގައި މި އަދަދަށް ބަދަލުތަކެއް އަތުވެދާނެ.“ – މުންދު ވިދާޅުވިއެވެ.
މީގެ އިތުރުން ސަރުކާރު ހިއްސާވާ ކުންފުނިތައް ރައިޓް ސައިޒް ކުރުމުގެ މަސައްކަތް ކުރަމުންދާކަން ފާހަގަކުރައްވައި މުންދު ވިދާޅުވީ، މި މަސައްކަތް އެއްކޮށް ނިމޭއިރު، މި ސަރުކާރުން ވަޒީފާތަކަށް ނެގި މުވައްޒަފުންގެ އަދަދަށްވުރެ ބޮޑު އަދަދެއް އުނިވެގެން ދާނެ ކަމަށެވެ. އެގޮތުން މި މަސައްކަތް ނިމޭއިރު 7،000 އާއި 8،000 އާއި ދެމެދުގެ މުވައްޒަފުން މަދުކުރެވިގެންދާނެ ކަމަށް މުންދު ވިދާޅުވިއެވެ.
ރައިޓް ސައިޒްކުރުމަށް މި ސަރުކާރުން އަޅަމުން އަންނަ ހަރުދަނާ ފިޔަވަޅުތައް ގިނަ ބަޔަކު ބަލައިގަންނަކަން ފާހަގަކޮށްލަންޖެހެއެވެ. ސަބަބަކީ ވަޒީފާ ގެއްލޭ ފަރާތްތަކަށް ވެސް މާލީ ގޮތުންނާއި އެހެނިހެން ގޮތްގޮތުން އެހީތެރިކަން ފޯރުކޮށްދޭތީއެވެ.
