ކުރީގެ ރައީސް އަދި އެމްޑީޕީގެ ޗެއަރޕާސަން މުޙައްމަދު ނަޝީދާއި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ސިއްރު ގުޅުމުގެ ސަބަބުން އެމްޑީޕީ މެންބަރުން ތިބީ ހިތްނުތަނަވަސްވެފައި ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެ.
ޝުޖާއު މި މޭރުމުން ވިދާޅުވީ ޕީއެންއެފްގެ ޓައުން ހޯލް ޖަލްސާއެއްގައި ޔާމީން ދެއްކެވި ވާހަކަތަކަކަށް ރައްދު ދެއްވައި މީސް މީޑިއާގައި ހިއްސާކުރެއްވި ޕޯސްޓެއްގައެވެ. އެ ޖަލްސާގައި ވާހަކަދައްކަވަމުން ޔާމީން ވިދާޅުވީ، ކަޅު ބާޒާރުގައި ޑޮލަރު މާރުކުރުން ހުއްޓުވުމަށްޓަކައި ގާނޫނަށް ގެނައި އިސްލާހުގެ ސަބަބުން އެންމެ ބޮޑަށް ރުޅިގަދަވެފައި ތިބީ ޕީއެންސީއަށް ނިސްބަތްވާ މަޖިލިސް މެންބަރުން ކަމަށެވެ. ސަބަބަކީ އެންމެ ގިނައިން ކަޅު ބާޒާރުގައި ޑޮލަރުގެ މުއާމަލާތްކުރަނީ އެ މެންބަރުން ކަމަށްވާތީ ކަމަށް ޔާމީން ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާ ދެކޮޅަށް ރައްޔިތުންގެ މަޖިލީހުގެ ތެރޭގައި ވަރަށް ސިއްރުން އިންގިލާބެއް ހިނގަމުން އަންނަ ކަމަށާއި އަދި ވަރަށް އަވަހަށް ހާލަތު ބަދަލުވެގެންދާނެ ކަމަށް ވެސް ޔާމީން ވަނީ ވިދާޅުވެފައެވެ. ޔާމީންގެ މި ވާހަކަތަކަށް ރައްދުދެއްވަމުން ޝުޖާއު ވިދާޅުވީ، ރައްޔިތުންގެ މަޖިލީހުގެ ތެރޭގައި އެފަދަ އެއްވެސް ކަމެއް ނުހިނގާ ކަމަށެވެ. އަދި ހާލަތު ބަދަލުވުމަށް އުންމީދު ކުރައްވަނީ ކީއްވެގެންތޯ ސުވާލު އުފައްދަވައި ޝުޖާއު ވިދާޅުވީ މަޖިލިސް މެންބަރުން ތިއްބެވީ ރައީސް މުޢިއްޒާއެކު ވަރަށް ގަދަކޮށް ކަމަށެވެ.
މަޖިލިސްތެރޭ ތިވިދާޅުވާފަދަ ކަމެއް ނުހިނގާ!އެހެން ނަމަވެސް ރައީސް ނަޝީދާ މަނިކުފާނުގެ ސިއްރު ގުޅުމުގެ ސަބަބުން MDP މެމްބަރުންގެ ހިތްނުތަނަވަސްކަން އޮތްކަން އެމީހުންގެ ވާހަކަތަކުން ހާމަވޭ!
ހާލަތު ބަދަލު ވުމަށް ކީއްކުރަން ކުރާ އުންމީދެއްތޯ؟ހިތްޕުޅު ގޯސްވާނޭ ކަމެއްނެތް އަޅުގަނޑުމެން… https://t.co/dRHnt0lXFu— Ibrahim Shujau (@IbrahimShujaau) September 3, 2026
އެހެންނަމަވެސް ނަޝީދާއި ޔާމީނުގެ ސިއްރު ގުޅުމުގެ ސަބަބުން އެމްޑީޕީއަށް ނިސްބަތްވާ މެންބަރުންގެ ހިތްނުތަނަވަސްކަން އޮތްކަން އެ މެންބަރުންގެ ވާހަކަތަކުން ހާމަވާ ކަމަށް ޝުޖާއު ވިދާޅުވިއެވެ.
ޝުޖާއުގެ އިތުރުން ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހިމް ފަލާޙު ވެސް ވަނީ ޔާމީނުގެ ވާހަކަތަކަށް ހޫނު ރައްދެއް ދެއްވައިފައެވެ. ފަލާޙު ވިދާޅުވީ، 20 ވަނަ މަޖިލިސް ރޫޅަން މަސައްކަތްކުރަމުން ދަނިކޮށް ދައުރު ނިމެނީ ކަމަށާއި، މަޖިލީހުގެ ހުރިހާ މެންބަރުން ތިބީ ސާބިތުކަމާއެކު ރައީސް މުޢިއްޒާއެކު ވަރަށް ގަދަކޮށް ކަމަށެވެ.
މިފަހަކަށް އައިސް ނަޝީދާއި ޔާމީން ވަނީ ވަރަށް އެއްކޮށް ސިޔާސީ މައިދާނުގައި މަސައްކަތް ކުރައްވައިފައެވެ. ނަޝީދާއި ޔާމީން އެކުގައި މަސައްކަތްކުރައްވަމުން ގެންދަވާތީ އެމްޑީޕީއާއި ޕީއެންއެފްއަށް ނިސްބަތްވާ އާންމު މެންބަރުން ގެންދަނީ އެކަމަށް ވަރަށް ބޮޑަށް ފާޑުކިޔަމުންނެވެ.
