ސްރީލަންކަން އެއާލައިންސްއަށް އެއާބަސް ބޯޓުތަކެއް ގަތުމުގައި ހިންގާފައިވާ ބޮޑު ކޮރަޕްޝަންގެ މައްސަލައެއްގައި، އެ ޤައުމުގެ ކުރީގެ ރައީސް މަހިންދަ ރާޖަޕަކްސާގެ ދަރިފުޅު އަދި އެސް.އެލް.ޕީ.ޕީ ގެ ޤާނޫނުހަދާ މަޖިލީހުގެ މެންބަރު ނަމާލް ރާޖަޕަކްސާ ހައްޔަރުކޮށް، ސެޕްޓެމްބަރު 18 އާ ހަމައަށް ބަންދުގައި ބަހައްޓަން ކޯޓުން އަމުރުކޮށްފިއެވެ.
ސްރީލަންކާގެ އެންޓި-ކޮރަޕްޝަން ކޮމިޝަން އިން ނަމާލް ހައްޔަރުކޮށްފައިވަނީ ހުކުރު ދުވަހުގެ ހެނދުނު އެ ކޮމިޝަނަށް ހާޒިރުކޮށް 5 ގަޑިއިރަށްވުރެ ދިގު މުއްދަތަކަށް ސުވާލުކުރުމަށްފަހުގައެވެ. ކޮލަމްބޯ މެޖިސްޓްރޭޓް ކޯޓަށް ހާޒިރުކުރުމުން މެޖިސްޓްރޭޓް އަސަންގަ އެސް. ބޮޑެރަގަމާ ވަނީ އޭނާ ރިމާންޑް ކުރުމަށް އަމުރުކޮށްފައެވެ.
ތަޙްޤީޤީ އިދާރާތަކުން ބުނާ ގޮތުގައި، 1.45 މިލިއަން ޔޫރޯ އާއި 800,000 އެމެރިކާ ޑޮލަރު (އޭރުގެ ނިސްބަތުން 100 މިލިއަން ރުޕީސް / މިހާރުގެ ނިސްބަތުން 817 މިލިއަން ރުޕީސް) ވަނީ ސިންގަޕޫރުގެ ބޭންކު އެކައުންޓްތަކެއް މެދުވެރިކޮށް ދައުރުކުރުމަށްފަހު، 2014 އާއި 2015 އާ ދެމެދު ނަމާލް ރާޖަޕަކްސާއަށް ނަގުދު ފައިސާއިން ހަވާލުކޮށްފައެވެ.
މި މައްސަލައިގެ ތަޙްޤީޤަށް ފްރާންސްގެ އެއާބަސް ކުންފުނީގެ އިސް އޮފިޝަލުންތަކެއް ސެޕްޓެމްބަރު މަހުގެ ކުރީކޮޅު ސްރީލަންކާއަށް ޒިޔާރަތްކޮށް ސީއައިއޭބީއޯސީ އަށް ބަޔާން ދީފައިވެއެވެ.
އިދިކޮޅު އެސް.އެލް.ޕީ.ޕީ އިން ވަނީ މިއީ ސެޕްޓެމްބަރު 12 ގައި އަނޫރާދަޕޫރާގައި ބޭއްވުމަށް ހަމަޖެހިފައިވާ އިދިކޮޅު ބޮޑު މުޒާހަރާ ހުއްޓުވުމަށް ސަރުކާރުން ހިންގާ ސިޔާސީ ބަދަލުހިފުމެއް ކަމަށް ބުނެފައެވެ. ނަމަވެސް ސަރުކާރުން ވަނީ މި ތުހުމަތުތައް ދޮގުކޮށްފައެވެ.
